Ibiciro ku masoko yo mu byaro byarazamutse kurusha mu mijyi muri Gashyantare

Yanditswe na Cyprien Niyomwungeri
Kuya 10 Werurwe 2017 saa 02:59
Yasuwe :
0 0

Ikigo cy’Igihugu gishinzwe Ibarurishamibare mu Rwanda (NISR), cyashyize ahagaragara igipimo cy’ihindagurika ry’ibiciro ku masoko muri Gashyantare uyu mwaka, aho muri uko kwezi mu mijyi ibiciro byazamutse ku gipimo cya 8.1% mu gihe mu cyaro byazamutse ku kigero cya 16.2% ugereranyije n’umwaka ushize.

Itangazo rya NISR rigaragaza ko ugereranyije Gashyantare na Mutarama 2017, mu mijyi ibiciro byazamutseho 1.1%. Iri zamuka rikaba ryaratewe n’ibiciro by’ibiribwa n’ibinyobwa bidasembuye byazamutseho 1,9% n’ibiciro by’amazu, amazi, amashanyarazi, gazi n’ibindi bicanwa byazamutseho 0,8%.

Ugereranyije Mutarama na Gashyantare 2017 mu bice by’ibyaro, ibiciro byazamutseho 2,3% bitewe ahanini n’izamuka ry’ ibiciro by’ibiribwa n’ibinyobwa bidasembuye byazamutseho 3,3% n’ibiciro by’amazu, amazi, amashanyarazi, gazi n’ibindi bicanwa byazamutseho 2,4%.

Ibiciro mu mijyi byiyongereyeho 8,1% mu kwezi gushize kwa Gashyantare 2017 ugereranyije na Gashyantare 2016. Muri Mutarama 2017 ryari ku kigereranyo kingana na 7,4%.

Bimwe mu byatumye ibi biciro bizamuka ni ibiciro by’ibiribwa n’ibinyobwa bidasembuye byazamutseho 17,6%, ibiciro by’amazu, amazi, amashanyarazi, gazi n’ibindi bicanwa 2,1% n’ibiciro by’ibijyanye n’ubwikorezi byazamutseho 8,3%. Iyo ugereranyije Gashyantare 2017 na Gashyantare 2016, usanga ibiciro by’ibintu bitarimo ibiribwa n’ibikomoka ku ngufu byarazamutseho 5,6 %.

Ibiciro mu byaro

Mu kwezi gushize kwa Gashyantare 2017 ibiciro mu byaro byiyongereyeho 16,2% ugereranyije na Gashyantare 2016. Muri Mutarama 2017 ryari ku kigereranyo kingana na 14,5%.

Iri zamuka rikaba ryaratewe n’ibiciro by’ibiribwa n’ibinyobwa bidasembuye byazamutseho 26,4% n’ibiciro by’ibijyanye n’uburezi byazamutseho 52,0%.

Ibiciro bikomatanyirijwe hamwe (mu mijyi no mu byaro)

Mu kwezi gushize kwa Gashyantare 2017 ibiciro mu Rwanda byiyongereyeho 13,4% ugereranyije na Gashyantare 2016. Muri Mutarama 2017 byiyongereyeho 12,0%. Bimwe mu byatumye ibiciro byiyongera ni ibiciro by’ibiribwa n’ibinyobwa bidasembuye byazamutseho 24,5% n’ibiciro by’ibijyanye n’uburezi byazamutseho 23,6%.

Iyo ugereranyije Gashyantare na Mutarama 2017, ibiciro byazamutseho 1,9%. Iri zamuka ahanini ryatewe n’izamuka ry’ibiciro by’ibiribwa n’ibinyobwa bidasembuye byazamutseho 3,3% n’ibiciro by’amazu, amazi, amashanyarazi, gazi n’ibindi bicanwa byazamutseho 2,4%.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza