Ikibuga cy’indege cya Gisenyi kigiye kubakwa kibe mpuzamahanga

Yanditswe na Mukwaya olivier
Kuya 3 Gashyantare 2018 saa 08:31
Yasuwe :
0 0

Minisiteri y’Ibikorwaremezo yatangaje ko Ikibuga cy’Indege cya Gisenyi kigiye kwagurwa ku buryo mu mwaka wa 2021 kizaba cyatangiye kwakira indege nini z’imbere mu gihugu n’izo mu Karere u Rwanda ruherereyemo.

Umunyamabanga wa Leta ushinzwe gutwara Abantu n’Ibintu muri Minisiteri y’Ibikorwaremezo, Uwihanganye Jean de Dieu, yatangaje ko imirimo yo kwagura iki kibuga izaba yatangiye muri Nyakanga 2018.

Yagize ati “Ubu dufite gahunda ko guhera mu ngengo y’imari y’umwaka utaha guhera mu kwa karindwi tuzatangira imirimo yo kwagura Ikibuga cy’Indege cya Gisenyi. Turashaka kukigira ikibuga cy’indege cy’Akarere gifite ubushobozi bwo kwakira n’izindi ndege nini, yaba za Boeing cyangwa za Airbus … tuzongera pistes aho zizajya zigurukira kikaba ku rwego mpuzamahanga.’’

Yakomeje asobanura ko biteganyijwe ko nibura mu mwaka wa 2021 Ikibuga cy’Indege cya Gisenyi kizaba cyatangiye gukoreshwa, cyakira indege nini zirimo iza boeing ziva mu bindi bihugu byo mu Karere.

Ku birebana n’igikorwa cyo kwishyura ingurane ku miryango yari ituriye imbago z’iki kibuga, mu biganiro Leta yagiranye nayo kuri uyu wa Gatanu bemeranyije ko muri Kanama 2018 bizaba byarangiye.

Umuyobozi w’Akarere ka Rubavu, Habyarimana Gilbert, yagize ati “Abasigaye batarishyurwa ni 97 ariko abandi mu by’ukuri barishyuwe, abo basigaye nabo bahawe umurongo bagiye kuzishyurwamo kuko bijejwe ko mu kwa munani bazishyurwa.’’

Ikibuga cy’Indege cya Gisenyi cyajyaga cyakira mu bihe bishize indege nto za RwandAir gusa.

Umushinga wo kwagura Ikibuga cy’Indege cya Gisenyi urarimbanyije mu gihe n’Iburasirazuba naho hatangiye imirimo yo kubaka Ikibuga cy’Indege Mpuzamahanga cya Bugesera.

Ku kibuga cy'Indege cya Gisenyi
Umunyamabanga wa Leta ushinzwe gutwara Abantu n’Ibintu muri Minisiteri y’Ibikorwaremezo, Uwihanganye Jean de Dieu, yatangaje ko Ikibuga cy'Indege cya Gisenyi kizagurwa ku buryo cyakira indege nini
Abaturiye Ikibuga cy'Indege batarishyurwa bijejwe kwishyurwa vuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza