Umushinga wo kubyaza umusaruro igihingwa cya Stevia weguriwe Stevialife Sweeteners

Yanditswe na Mukaneza M.Ange
Kuya 6 Gashyantare 2018 saa 10:33
Yasuwe :
0 0

Nyuma yo kunanirwa kubahiriza amasezerano Ikigo SteviaLife Ltd cyagiranye na leta y’u Rwanda ku bijyanye no guhinga no gutunganya igihingwa cya Stevia, inshingano zo gushyira mu bikorwa uyu mushinga zeguriwe Stevialife Sweeteners Ltd.

Ni nyuma y’aho SteviaLife igurishije imigabane yayo na Stevialife Sweeteners Ltd ngo kibe ari cyo gikomeza ibikorwa.

Muri Mutarama 2015 nibwo Ikigo SteviaLife Ltd cy’abanya-Canada cyahawe uruhushya rwo guhinga Stevia yifashishwa mu gukora ibinyobwa bidasembuye birimo Coca Cola, kuri hegitari 1000.

Nk’uko byari bikubiye mu masezerano na leta y’u Rwanda, hagati mu 2016 hagombaga kuba harashyizweho uruganda rutunganya Stevia mu buryo bw’ibanze rufite agaciro ka miliyoni eshatu z’amadolari, mu gihe mu 2018 hari kuba harashyizweho urundi rwa miliyoni 10 z’amadolari rutunganya iyoherezwa mu mahanga.

Aganira na The Newtimes, Umuyobozi Mukuru wa Stevialife Sweeteners Ltd, Bruce Irambona, yatangaje ko nubwo hashize imyaka itatu ibi byemejwe, kugeza ubu uruganda rutarashyirwaho ndetse Stevia imaze guhingwa kuri hegitari 200 gusa.

Irambona wanayoboye SteviaLife Ltd yavuze ko ikibazo cyabayeho ari ukunanirwa gukusanya amafaranga yari akenewe ngo umushinga ushyirwe mu bikorwa, biba ngombwa ko wegurirwa ikindi kigo.

Ati “Uruganda rukeneye byibura hegitari 1000. Dufatanyije n’abashoramari turacyagerageza gushaka ubutaka buberanye n’igihingwa cya Stevia. Kugeza ubu tumaze kubona ubutaka bungana na hegitari zigera kuri 350.”

Yakomeje avuga ko mu bishya bazanye harimo no gushyira imbaraga nyinshi mu guha abahinzi ubufasha butuma barushaho gusobanukirwa ibijyanye na Stevia, aho bifashisha abakozi bagera kuri 300 bahoraho.

Ikigo cy’Igihugu gishinzwe kohereza mu mahanga ibikomoka ku buhinzi n’ubworozi mu Rwanda (NAEB), kivuga ko ibibazo by’amafaranga ari byo byatumye gahunda yo kwagura umushinga wa Stevia itinda ari na yo mpamvu bahisemo gushaka umushoramari mushya.

Umuyobozi muri NAEB, Munyaneza Jean Marie Vianney, yavuze ko gushyiraho uruganda rutunganya Stevia bizatuma yongererwa agaciro, hakaboneka inyungu ikubye inshuro 10 ugereranyije n’igihe hoherejwe amababi gusa, ndetse bikazagira n’uruhare mu guhanga imirimo ihoraho isaga 100.

Ikilo cy’amababi ya Stevia yumishijwe kigura hagati y’amafaranga y’u Rwanda 1800 na 2500, mu gihe iyo yatunganyijwe neza kigura hafi ibihumbi 160 by’Amafaranga y’u Rwanda.

NAEB igaragaza ko kugeza ubu Stevia ihinze ku butaka buri mu turere twa Rulindo, Nyanza, Kirehe, Nyaruguru na Bugesera.

Abahinzi basarura igihingwa cya Stevia mu Karere ka Rulindo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza