Inka 110 zimaze kwicwa n’indwara y’ubuganga mu Rwanda

Yanditswe na Hakizimana Jean Paul
Kuya 26 Kamena 2018 saa 01:25
Yasuwe :
0 0

Minisiteri y’Ubuhinzi n’Ubworozi (Minagri) yatangaje ko inka 110 zimaze kwicwa n’indwara y’ubuganga bwo mu Kibaya cya Rift (Rift Valley Fever, RVF) kuva yakwaduka Iburasirazuba mu byumweru bitatu bishize.

Raporo y’amatungo amaze guhitanwa n’iyo ndwara yatangajwe ku wa wa 25 Kamena 2018, mu nama yari iyobowe na Minisitiri w’Ubuhinzi n’Ubworozi, Dr Mukeshimana Gerardine.

Iyi nama yari igamije kurebera hamwe uburyo umwaka wa 2017-2018 wagenze no kurebera hamwe uko guhashya indwara y’ubuganga yibasiye amatungo muri iyi ntara bigeze.

Herekanwe ko inka 784 zimaze kuvurwa indwara y’ubuganga naho izigera ku 110 zirapfa.

Iyi ndwara yagaragaye ku wa 18 Gicurasi 2018 iterwa na virusi ikwirakwizwa n’imibu, igafata amatungo yuza nk’inka, ihene n’intama n’izindi zo mu gasozi ndetse n’abantu.

Nk’uko byagaragajwe muri iyi nama, mu turere dutatu twashyizwe mu kato na Minagri ari two; Ngoma, Kirehe ndetse na Kayonza biragaragara ko imibare y’inka zipfa cyangwa iziramburura ziri kugenda zigabanuka.

Inka 784 zimaze gukira mu byumweru hafi bitatu, Kirehe niyo ifitemo nyinshi zakize (321) naho izapfuye ni 22; Ngoma ifite izakize 255, hapfa 76; Kayonza yapfushije 208 naho izapfuye ni 12. Iyi mibare yagaragajwe ni iyo guhera ku wa 8 Kamena kugeza 25 Kamena 2018.

Minisitiri Mukeshimana yatangarije IGIHE ko habayeho gukumira icyatumye indwara ikwira cyane muri turiya turere.

Yagize ati “Icyatumye iriya ndwara ikwira cyane ni uko batari barakingiye, gusa aho tubimenyeye twashyizemo imbaraga nyinshi cyane kuri ubu ntabwo amatungo ari gupfa cyane nka mbere, biri kugenda bigabanuka kandi turacyakomeza no kwita ku nka zikirwaye ku buryo dufite icyizere ko nazo zizakira.”

Yakomeje avuga ko uturere twashyizwe mu kato nihamara gusuzumwa ko iyi ndwara yashize.

Yagize ati “Turiya turere tuzava mu kato mu gihe byibura hazaba nta nka igipfa ku munsi ndetse nta n’inka iramburura, tuzafata iminsi 15 dusuzume ko nta ndwara igihari hanyuma tudukure mu kato.”

Umwe mu baturage bitabiriye iyi nama waje ahagarariye abahinzi n’aborozi bo mu Karere ka Ngoma, Ndindabahizi Etienne, yabwiye IGIHE ko iyi ndwara ikiza aribwo yabiciye amatungo cyane ariko byagabanutse.

Yagize ati “Iyi ndwara ikiza tutarayimenya, yatwiciye amatungo menshi kuko tutari twasobanukiwe iyariyo, ariko ubu twamaze kuyisobanukirwa umuturage ugize ikibazo, ahamagara umukozi ushinzwe amatungo mu murenge akamugeraho akaramira amatungo ye atarapfa.”

Iyi ndwara y’ubuganga ifata mu kibaya cya Rift Valley Fever irangwa n’ibimenyetso birimo kuramburura mu byiciro byose byo guhaka, kunanirwa kurisha, umuriro mwinshi hejuru ya dogere 40, gucika intege, kuva amaraso mu mazuru, gutukura cyane ku nda y’amaganga , kugabanyuka k’umukamo ndetse n’ibindi byinshi ariko ibi akaba aribyo by’ingenzi.

Minisitiri w'Ubuhinzi n'Ubworozi Dr Mukeshimana Gerardine
Abashinzwe ubuhinzi n’ubworozi mu turere no mu mirenge yose igize Intara y’Iburasirazuba bari mu nama yavuguwemo uko kurwanya indwara y’ubuganga bihagaze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza