Kinyinya: Gahunda ‘Igiceri Program’ igiye kwifashishwa mu kurandura ubukene n’ubushomeri

Yanditswe na Cyprien Niyomwungeri
Kuya 11 Werurwe 2017 saa 01:22
Yasuwe :
0 2

Ikibazo cy’ubukene n’ubushomeri mu Banyarwanda gihangayikishije inzego zitandukanye, ariyo mpamvu gahunda zidasanzwe zikomeje gutekerezwa kugirango kivugutirwe umuti urambye watuma nibura umuturage abasha gukemura ibibazo by’ibanze nko kurya, gutanga ubwisungane mu kwivuza, amashuri y’abana n’ibindi.

Gahunda ‘Igiceri Program’ ni imwe muri zo yatangijwe mu 2014 mu murenge wa Nduba, nyuma iza gushyirwa mu mihigo y’akarere ka Gasabo kose mu 2016, aho abaturage bakangurirwa kwizigamira igiceri cy’amafaranga 100 buri munsi. Ikorwa hifashishijwe udusanduku tuba mu midugudu yose, aho buri mugoroba Umukangurabukungu agera kuri buri rugo rumuha icyo giceri.

Mu mahugurwa Umurenge Sacco Icyerekezo Kinyinya, wari watumiyemo inzego za Sacco, iz’ibanze guhera mu midugudu n’abaturage bashinzwe gukusanya amafaranga y’igiceri program, biyemeje gukoresha iyo gahunda mu kurandura ubukene no guca ubushomeri bwugarije umubare munini w’urubyiruko.

Umucungamutungo wa Sacco Icyerekezo Kinyinya, Niwemugeni Chantal, avuga ko nk’abafatanyabikorwa mu mihigo y’Umurenge bahisemo gutanga amahugurwa kugira ngo basobanure gahunda y’Igiceri Program bityo n’abaturage barusheho kuyisobanukirwa kuko batarayitabira neza.

Yagize ati “Uyu murenge ubushize wabaye uwa kabiri mu karere, ntabwo dushaka gusubira inyuma kandi ibi byose tuzabifashwa n’uko nk’abafatanyabikorwa twumva ko imihigo itureba, tukagaragaza uruhare rwacu mu kuyesa.”

Iyi sacco yesheje umuhigo yari ifite umuhigo wo kwinjiza abanyamuryango bashya 250, gusa bafite undi wo kugabanya inguzanyo zitishyurwa neza zikava ku 8% zikagera kuri 4% no gukora ubukangurambaga abaturage bagatinyuka kwaka inguzanyo bakiteza imbere.

Igiceri Program gihanzwe amaso

Niwemugeni akomeza avuga ko gahunda y’Igiceri Program yanogejwe izafasha abaturage kwikura mu bibazo bafite, ubukene bukagabanuka, igasubiza ibibazo bimwe na bimwe bahuraga na byo mu mibereho ya buri munsi.

Yagize ati “Abaturage babasha kwiyishyurira Mituweli, agahimbazamusyi k’abarimu, bakabasha kwikenura mu buryo butandukanye.”

Umuturage azajya atanga guhera ku giceri cya 100 kugeza ku 5000 ku munsi, uyatanze ahabwa agakarita gashyirwaho ko ayatanze, akandikwa mu gitabo kandi akanasinya. Umuturage uzajya uyakira azajya ayageza kuri Sacco bitarenze icyumweru, nasaruza menshi ageze ku bihumbi 50 ku munsi azajya arara ayabikije kuri konti y’umudugudu.

Gahunda yihariye ku bashomeri

Ubusanzwe Sacco Kinyinya ifite gahunda yo guteza imbere abize imyuga aho basaba inguzanyo y’ibihumbi 500 Frw, bakishyura igice kimwe kingana n’ibihumbi 250 Frw ikindi ikigega BDF kikakibishyurira nk’inkunga. Kugeza ubu imishinga y’abantu 106 irimo kwigwa na BDF ngo ihabwe inkunga.

Umucungamutungo wa Sacco Icyerekezo Kinyinya, Niwemugeni Chantal

Tuyisingize Leonille, visi Perezida w’inama y’ubutegetsi ya Sacco Icyerekezo Kinyinya, avuga ko Igiceri Program izatuma abana b’abanyeshuri bizigama cyangwa n’ababyeyi babo bakabazigamira, kugira ngo nibarangiza kwiga bazabona uko bihangira imirimo.

Yagize ati “Muri iyi gahunda ababyeyi bashobora no kwizigamira abana bakiri mu ishuri cyangwa nabo bakabyikorera, bakazarangiza bafite icyo baheraho bakaka inguzanyo z’urubyiruko bakihangira imirimo.”

Jean Damascene Nambajimana, umwe mu rubyiruko rwa Kinyinya, asanga iyi gahunda ifite umwihariko ku rubyiruko kuko rwagorwaga no kuzigama.

Ati “Nk’urubyiruko usanga nta muco wo kuzigama tugira ariko iyi gahunda izabidufashamo, turayisobanurira abandi natwe tuyigane twiteze imbere, dukore imishinga minini.”

Muri gahunda y’Igiceri Program, umuturage yemerewe kubikuza nyuma y’amezi atatu mu gihe akeneye amafaranga ye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza