Imitangirwe y’inguzanyo mu Umwalimu Sacco igiye kuvugururwa

Yanditswe na Kanamugire Emmanuel
Kuya 22 Ukuboza 2016 saa 11:25
Yasuwe : XX
0

Koperative Umwalimu Sacco yatangaje uburyo bushya bugiye kujya bwifashishwa mu gutanga no kwishyuza inguzanyo burimo igabanywa ry’amafaranga ntarengwa yahabwaga umunyamuryango ku mishinga imwe n’imwe n’igihe cyo kuyishyura.

Ubusanzwe umunyamuryango ufite umushinga ujyanye n’ubwubatsi yashoboraga guhabwa inguzanyo igera kuri miliyoni 70 z’amanyarwanda akazishyura mu myaka 15 ariko ubu yagabanyijwemo kabiri, ni ukuvuga miliyoni 35 zikishyurwa mu myaka 10 gusa.

Ikigamijwe ngo ni ugufasha abanyamuryango guhabwa inguzanyo zitazababera umuzigo mu kuzishyura no gutuma amafaranga yatanzwe agarurwa agahabwa bandi banyamuryango bayakeneye.

Ku yindi mishinga umunyamuryango azakomeza guhabwa inguzanyo yishyurwa mu myaka itarenze itanu ku nyungu ya 11% ku bakora mu bigo bya leta na 14% ku bo mu bigo byigenga.

Koperative Umwalimu Sacco yashinzwe hagamijwe kuzahura ubuzima bw’abarimu kubera umushahara muto bahembwa aho bahabwa inguzanyo zibafasha gushyira mu bikorwa imishinga ibyara inyungu ndetse no kwibonera amacumbi.

Mu nama y’Inteko rusange y’iyi koperative yateranye kuri uyu wa 22 Ukuboza 2016, Umuyobozi Mukuru wayo, Uwambaje Laurence yatangaje ko imaze gutanga inguzanyo zigera kuri miliyari 150 kuva yatangira, izisaga miliyari 45 zikaba ari zo zimaze kwishyurwa.

Izi nguzanyo ngo zitangwa mu nzego zitandukanye zirimo amafaranga ashorwa mu mishinga y’iterambere, ashorwa mu kubaka inzu zo guturamo n’inguzanyo ku mushahara zishyurwa mu myaka itarenze ibiri.

Koperative Umwalimu imaze kugira abanyamuryango(abarimu) basaga ibihumbi 73, muri bo abamaze guhabwa inguzanyo bakaba bagera mu bihumbi 36.

Nk’uko Uwambaje yabitangaje, iyi Koperative iracyafite ikibazo kiyikomereye cy’abarimu bava mu kazi bafite inguzanyo batarishyura cyane abatazwi aho baherereye nubwo umubare w’abafite iki kibazo n’amafaranga atarishyurwa bitatangajwe.

Ati "Iki kibazo kiracyari imbogamizi kuri twe, ariko twafashe n’ingamba ngo tugikumire hari abashobora kugenda tudashobora kumenya aho baherereye, ariko ku bashobora kuba barinjiye mu kandi kazi tutateganya kugira ubufatanye n’inzego z’uturere kuko ni zo zitumenyesha abakiri mu kazi n’abavuyemo ndetse n’Ikigo cy’Igihugu gishinzwe ubwiteganyirize, RSSB kuko biba bigaragara ko bagitanga imisoro, bakaba bamenyekana aho baherere bityo tukabakurikirana.

Umutungo wose w’iyi koperative kugeza mu mpera z’Ugushyingo 2016 wari umaze kuba miliyari 242 z’amanyarwanda.

Mu mwaka utaha iyi koperative irateganya kwinjiza 43 615 946 764 z’amafaranga y’u Rwanda hakazakoreshwa 40 185 635 087.

Inama y’Inteko Rusange ya Koperative Umwalimu Sacco iterana inshuro ebyiri mu mwaka, ikaba ishobora no guterana mu gihe kidasanzwe. Yitabirwa n’Abarimu bahagarariye abandi mu Turere twose tugize igihugu.

Uwambaje Laurence, Umuyobozi Mukuru w'Umwalimu Sacco
Bamwe mu barimu bitabiriye Inama y'Inteko Rusange ya Koperative Umwalimu Sacco

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza