Leta igiye gukoma mu nkokora abahendanaga mu igura n’igurisha ry’ibibanza

Yanditswe na Mukaneza M.Ange
Kuya 3 Gashyantare 2018 saa 11:38
Yasuwe :
0 0

Ikigo gishinzwe Imicungire n’Imikoreshereze y’Ubutaka mu Rwanda (RLMUA) cyatangaje ko ari cyo kigiye kujya gishyiraho agaciro k’ubutaka hirya no hino mu gihugu mu gihe byari bimenyerewe ko nyira bwo ari we byarebaga.

Ubu buryo bushya bwo kugena agaciro k’ubutaka bwatangajwe n’Umuyobozi mukuru wa RLMUA, Mukamana Esperance, mu kiganiro ‘Isesenguramakuru’ cyatambutse kuri Radio Rwanda ku wa 3 Gashyantare 2018.

Yavuze ko hari gutegurwa gahunda ijyanye no kujya hagenwa ibiciro by’ubutaka buri mwaka, bigakorwa na Minisiteri ifite mu nshingano ubutaka n’amashyamba.

Ati “Hagiye kujya hasohorwa ibiciro by’ubutaka mu gihugu hose, bizajya bivugururwa buri mwaka kuko ibiciro by’ubutaka bigenda bihinduka bitewe n’ibikorwaremezo, n’ibintu bikorerwa ku butaka bw’abaturage hirya no hino mu gihugu.”

Yakomeje avuga ko ibi bizajya bitangazwa ku buryo umuntu azajya aba afite ahantu ashobora kurebera akamenya ngo ahantu runaka ikibanza cyangwa ubutaka bwaho bufite agaciro runaka.

Ati ”Kuba bigiye kujya bitangazwa ntabwo bivuze ko bizahenda. Ni ukugira ngo ahubwo byorohereze abaturage n’abashoramari baza gushora imari mu gihugu, n’abaturage bakora ihererekanya ry’ubutaka rishingiye ku bugure n’ibindi, habeho ibiciro bihamye, ntihagire umuntu uza guhenda umuturage cyangwa kumwubikaho urusyo.”

Dr. Bihira Canisius, impuguke mu bijyanye n’iterambere ry’umuturage yavuze ko hari abaturage benshi usanga batazi agaciro k’ubutaka bwabo, bikagira uruhare mu kutamenya n’uburyo abubyaza umusaruro.

Ati “Umuturage yagombye kumenya agaciro k’umutungo we kuko iyo atakazi kandi ugiye kugura we akazi, hari igihe amuhenda ugasanga abimenye yararangije kumwishyura.”

Uretse ibyo Dr Bihira avuga, hari n’abaturage bakabya guhenda ubutaka nko mu igurisha ry’ibibanza.

Ikigo gishinzwe Imicungire n’Imikoreshereze y’Ubutaka mu Rwanda gisobanura ko igenagaciro ry’ubutaka rizajya rikorwa hagendewe ku bintu bitandukanye birimo ibikorwaremezo n’agaciro k’aho buherereye bitewe n’imiterere yaho.

Ikigo gishinzwe Imicungire n’Imikoreshereze y’Ubutaka mu Rwanda (RLMUA) nicyo kigiye kujya gishyiraho agaciro k’ubutaka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza