Kwamamaza

Leta yatuye umutwaro abahoranaga ingingimira ku Ngengo y’imari y’igihugu

Yanditswe kuya 3-11-2016 saa 09:15' na Jean Pierre Tuyisenge


Minisiteri y’Imari n’Igenamigambi mu Rwanda,Minecofin, itangaza ko nyuma yo kubona ko ubufatanye bw’abaturage n’abayobozi mu igenamigambi no mu miyoborere bwateje u Rwanda imbere nyuma ya Jenoside yakorewe Abatutsi, ingengo y’imari nayo igiye kujya igenwa hashingiwe ku bitekerezo by’abaturage.

Ibi bikozwe nyuma y’uko mu minsi ishize humvikanye abaturage bavuga ko batazi uburyo Ingengo y’imari itegurwa ndetse ko batazi ibishingirwaho hagenwa ibikorwa bizibandwaho mu mwaka wayo utaha, bagasaba ko nabo bajya babigiramo uruhare bayitangaho ibitekerezo, aho kuba iby’abayobozi gusa.

Umunyamabanga wa Leta muri Minisiteri y’Imari n’Igenamigambi ushinzwe igenamigambi, Dr Uzziel Ndagijimana, ubwo yaganiraga n’abaturage bo mu Murenge wa Kigarama, Akagari ka Nyarurama, mu Karere ka Kicukiro bamugezaho ibitekerezo bifuza ko byazashyirwa mu Ngengo y’Imari y’umwaka utaha wa 2017/2018, yasobanuye inzira bizacamo kugira ngo yemezwe.

Yagize ati “ Twahuriye hano mu Murenge wa Kigarama ariko byatangijwe mu turere twose tw’igihugu, ubu rero bizajya bihera ku muryango utoranye ibikorwa wifuza ko byazashyirwa mu igenamigambi, babyohereze ku rwego rw’umudugudu, babyohereze ku kagari, naho njyanama izabyemeza ibyohereze ku rwego rw’Umurenge. Njyanama izabyemeza bihurizwe ku karere noneho habe igenamigambi ry’ibyo bikorwa bizoherezwa ku rwego rw’igihugu bikazashyirwa mu ngengo y’imari y’umwaka utaha wa 2017/2018.”

Dr Ndagijimana avuga ko iyi gahunda izafasha Leta cyane kuko bagiye kujya bibanda ku bikenewe n’abaturage bo hasi, cyane ko ngo ari bo baba babitanzemo ibitekerezo bakurikije ibyo bakeneye.

Umuyobozi w’Akarere ka Kicukiro, Dr. Jeanne Nyirahabimana, yashimiye abaturage bo mu Murenge wa Kigarama ku bitekerezo batanze, abizeza ko bizagezwa ku bo bireba maze bishyirwe mu bikorwa.

Yagize ati "Nashimye ko mwatanze ibitekerezo ndetse n’uruhare mushaka kugira mu ngengo y’Imari. Ibitekerezo mwatanze byose twabyanditse kandi bizitabwaho.”

Bamwe mu baturage baganiriye na IGIHE, batangaje ko bashimishijwe no kubona noneho ingengo y’Imari bagiye kurushaho kuyigiramo uruhare.

Ntigurirwa Vincent utuye muri uwo murenge yagize ati “ Kuba baje kumva ibitekerezo by’abaturage bahereye ku nzego z’ibanze, mpamya ko bazabiha agaciro bizatume bashingira kuri ibyo.”

Abaturage bagarutse ku bibazo byinshi bibugarije bifuza ko byazahabwa agaciro mu ngengo y’imari y’umwaka utaha, birimo ibirebana n’ubukungu, uburezi, n’imibereho myiza y’abaturage.

Umunyamabanga wa Leta muri Minisiteri y’Imari n’Igenamigambi ( Minecofin), ushinzwe igenamigambi, Dr.Uzziel Ndagijimana
Umuyobozi w'Akarere ka Kicukiro, Dr. Jeanne Nyirahabimana yashimiye abaturage bo mu Murenge wa Kigarama ku bitekerezo batanze, abizeza ko bizagezwa ku bo bireba
Abayobozi bakuru bitabiriye umuhango wo gutangiza iki gikorwa
Abaturage bagaragarije ubuyobozi ibyo bifuza ko bizaza mu ngengo y'imari y'umwaka utaha

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved