Loni yashimye uruhare rw’abagore mu gukemura ibibazo byugarije Isi

Yanditswe na Mukaneza M.Ange
Kuya 9 Gicurasi 2017 saa 09:44
Yasuwe :
0 0

Mu gihe u Rwanda ruza ku isonga mu kugira umubare munini w’abagore bari mu Nteko Ishinga Amategeko, Umuyobozi Mukuru w’Ishami ry’Umuryango w’Abibumbye rishinzwe guteza imbere abagore(UN Women), Phumzile Mlamba-Ngcuka, asanga ari ibyo kwishimirwa kuba n’abo mu cyaro bagira uruhare mu gutanga ibisubizo ku bibazo byugarije Isi.

Mlamba-Ngcuka uri mu Rwanda, yabivuze kuri uyu wa 9 Gicurasi 2017, ubwo yasuraga koperative y’abahinzi b’ibishyimbo n’ibigori (COOPCUMA), iherereye mu karere ka Gatsibo, aherekejwe na Minisitiri w’Uburinganire n’iterambere ry’Umuryango, Nyirasafari Espérance.

Uru ruzinduko rwari rugamije kureba imikorere y’umushinga ‘Buy From Women’, ugamije gufasha abanyamuryango ba COOPCUMA kugurisha umusaruro wabo bakoresheje ikoranabuhanga, watangiye mu 2016 ku bufatanye bwa UN Women na PAM.

Umuyobozi wa COOPCUMA, Uwamariya Dancilla yavuze ko batangiye gukora mu 2008 ari ishyirahamwe, ariko mu 2014 akaba ari bwo batangiye gutera imbere mu buryo bugaragara kubera ko bari bamaze guhindura ubuyobozi.

Ati” Koperative yacu yanejejwe no kubona abafatanyabikorwa badufashije guhinga kijyambere, gufata neza umusaruro no kuduhuza n’amasoko. Twakubye kabiri umusaruro twiyemeje kugemura, umwaka ushize twagemuye toni 155, twari twahize toni 80.”

Mlamba-Ngcuka yavuze ko bishimije kuba abagize iyi koperative barangajwe imbere n’umugore, bakomeje gutanga umusanzu mu guhangana n’ikibazo cy’ibura ry’ibiribwa cyugarije isi muri iki gihe.

Ati “Dukomeza gutangazwa n’urwego u Rwanda rugezeho, aho abagore mu Rwanda batagaragara mu nzego zo hejuru mu buyobozi gusa, ahubwo bakaba bari no mu bikorwa bigamije gushaka ibisubizo by’ibibazo bikomeje guhangayikisha benshi ku isi. Ikibazo cy’ibiribwa kirakomeye mu bice byinshi by’isi.”

Yakomeje avuga ko kuba iyi koperative iyobowe n’umugore, byuzuzanya n’ibigaragara mu Nteko Ishinga Amategeko, kandi ko biri no mu bikomeje gutuma iterambere yihuta kuko abagore ibyo bashinzwe babikora batizigamye.

Mlamba-Ngcuka kandi yanagarutse ku bijyanye n’iri koranabuhanga, rikomeje gufasha abanyamuryango kumenya ingano y’ubutaka bwabo n’umusaruro ushobora kuvamo, avuga ko n’ibindi bihugu bizaza kubigiraho.

Minisitiri w’Uburinganire n’Iterambere ry’Umuryango, Nyirasafari Espérance, yatangaje ko ibyagezweho n’iyi koperative ari ikimenyetso cy’icyo uburinganire n’ubwuzuzanye bimaze.

Yakomeje avuga ko abagore bakwiye kumenya ko bafite uruhare mu bukungu bw’igihugu, bityo bagahaguruka bagakora ntibumve ko bakwiye gutega amaboko, kuko bafite ubushobozi kandi imirimo yose bemerewe kuyikora.

Bamwe mu banyamuryango ba COOPCUMA barimo Mujawamariya Modesta na Karigabo Laurent, bahamije ko kuba muri koperative bimaze kubageza kuri byinshi birimo kugura inka no kugeza umuriro w’amashanyarazi mu ngo zabo, kandi babigezeho kuva batangiye kuyoborwa na Uwamariya wabafashije gusobanukirwa n’inyungu iri mu kwihuriza hamwe.

Iyi koperative yatangiranye abanyamuryango 105, kuri ubu ifite 352, barimo abagore 238 n’abagabo 114, bahinga ku buso bungana na hegitari 69.

Abahinzi bagaragaje itandukaniro ry'ibigoro byabo igihe bahingaga uko babonye na nyuma yo gutangira guhinga kijyambere
Baganiriye na bamwe mu babyeyi
Bamwe mu banyamuryango ba koperative Coopcuma
Basuye ndetse baganiriza abana bo mu irerero rya Nyagatovu mu Karere ka Kayonza
Iyi koperative ibarizwamo abakuze n'abakiri bato
Minisitiri w'Uburinganire n'Iterambere ry'Umuryango, Nyirasafari Esperance
Mujawamariya Modesta wabashije kwigurira inka ndetse ubu iwe hari amashanyarazi
Phumzile Mlamba Ngcuka yashimishijwe n'uko abagore batari mu nzego z'ubuyobozi bwo hejuru gusa
Abanyamuryango ba koperative Coopcuma bafashe umwanya wo gucinya akadiho
Bafatiye amafoto y'urwibutso hafi y'umurima uhingwamo n'abanyamuryango

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza