Kwamamaza

Miliyoni 3.9$ zigiye gukoreshwa mu kunoza serivisi zihabwa abagana ibigo by’imari

Yanditswe kuya 25-10-2016 saa 08:05' na Mukaneza M.Ange


Ishyirahamwe ry’ibigo by’imari iciriritse mu Rwanda (AMIR) ku bufatanye n’Umuryango Seep Network, batangije umushinga ugamije kurushaho kunoza serivisi zihabwa abakiliya no kubasobanurira uburenganzira n’inshingano zabo.

Uyu mushinga uzwi nka RFL3 (Responsible Finance through Local Leadership and Learning program), watangijwe kuri uyu wa 24 Ukwakira 2016 uzamara imyaka ine, ukazashorwamo agera kuri miliyoni 3.9 z’amadorali ya Amerika, asaga miliyati eshatu mu mafaranga y’u Rwanda.

Ubwo RFL3 yatangizwaga ku mugaragaro, Umuyobozi wa AMIR, Peter Rwema, yavuze ko muri uyu mushinga ibigo by’imari iciriritse n’iby’itumanaho bizicara bikarebera hamwe uko serivisi zihabwa umukiliya zarushaho kunozwa kandi zikaza zikemura ibibazo bafite.

Ati “ Uyu mushinga uzafasha AMIR mu gihe cy’imyaka ine kugira ngo ibigo by’imari iciriritse byose bishobore gutega amatwi umukiliya, bishobore kumuha serivisi ikemura ibibazo, atari ugutekereza nicaye aha ngo kanaka akeneye iki ng’iki. Dukwiye gukorana nabo tukameya icyo bakeneye akaba ari byo tubaha.”

Yakomeje avuga ko iki ari icyiciro cya kabiri cy’uyu mushinga, ukazubakira ku byakozwe mu gihe cy’imyaka ine ishize.

Umuyobozi w’Umuryango Seep Network, Sharon D’Onofrio, yavuze ko muri uyu mushinga bazongerera ubushobozi ibigo by’imari iciriritse kugira ngo birusheho kwizerwa, gukorera mu mucyo no guha umwanya abaturage bakagaragaza icyo batishimiye.

Yakomeje avuga ko icyo biteze ku musozo wawo ari uko nibura abantu miliyoni ebyiri bazaba babasha guhabwa n’ibigo by’imari iciriritse serivisi zibanyuze.

Seep Network ifite icyicaro muri Leta Zunze Ubumwe za Amerika, isanzwe ifasha ibigo by’imari hirya no hino ku isi kurushaho kunoza serivisi zigenewe abakiriya, aho ifite abanyamuryango 129 na AMIR irimo.

Ubushakashatsi bwakozwe na Seep Network ku bufatanye na Mastercard, bwagaragaje ko nubwo icyiciro cy’ibigo by’imari iciriritse kigenda gitera imbere hakigaragaramo ibibazo birimo kuba 16% byabyo ari byo bifite inzira abakiliya banyuzamo ibitabanyuze.

Imibare ya Banki Nkuru y’u Rwanda, igaragaza ko mu Rwanda habarizwaga ibigo by’imari iciriritse 489 bikora mu buryo bwemewe n’amategeko.

Abakora mu bigo by'imari iciriritse bagiye kujya begera ababagana kugira ngo bamenye icyo bakeneye
Peter Rwema (uwa kabiri iburyo) yavuze ko uyu mushinga ugamije kureba uko serivisi zihabwa ababagana zanozwa
Sharon D’Onofrio uyobora Seep Network avuga ko bagamije gufasha ibigo by'imari iciriritse kurushaho kwizerwa n'abakiliya babyo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved