MTN Rwanda yujuje abakiliya miliyoni imwe bakoresha Mobile Money

Yanditswe na Philbert Girinema
Kuya 2 Ukuboza 2016 saa 10:59
Yasuwe : XX
0

Isosiyete y’itumanaho, MTN Rwanda, muri iki cyumweru yujuje abakiliya miliyoni imwe bakoresha umurongo wayo mu kubitsa, kubikuza, kohereza amafaranga no kugura serivisi zitandukanye bizwi nka Mobile Money.

MTN itangaza ko iyi ntambwe yo kugeza abakiliya miliyoni bakoresha Mobile Money iyikesha cyane cyane udushya igenda izanirira abakoresha serivisi za Mobile Money tugahindura ubuzima bwabo, nka MTN Tap&Pay baherutse gutangiza, gushyiraho ukwezi kwahariwe Mobile Money no kwiyongera kw’abakoresha telefoni ngendanwa mu gihugu.

Umuyobozi wa MTN Rwanda, Bart Hofker, yavuze ko iyi ntambwe bateye ari uko uguhererekanya amafaranga muri Mobile Money bimaze kwamamara bitewe n’uko bihendutse, byoroshye kandi bitagira ingorane ugereranyije n’ubundi buryo bwo guhererekanya amafaranga.

Yagize ati “Mobile Money igaragara ko ari uburyo bwo kwishyurana bworoshye gukoresha, butekanye kandi buhendutse. Twishimiye intambwe nziza MTN Mobile Money igezeho ariko tuzakomeza gukora kugira ngo tugere ku byiza n’iterambere birenze.”

MTN Rwanda yanatangaje ko Mobile Money ifite uruhare rwa 10% rw’ibyo yinjiza byose kandi ikaba ari umwe mu miyoboro yo guhererekanya amafaranga mu gihugu. Mu bakiriya bagera kuri miliyoni bayikoresha, bahererekanya amafaranga inshuro zirenga miliyoni zirindwi ku kwezi nibura amafaranga agera kuri miliyari 70.

Hofker akomeza avuga ko umunsi ku munsi bazakomeza kwigira ku ntera bagezeho n’ubunararibonye bakazana ibindi bisubizo bifasha abakiriya kubaho ubuzima bworoshye.

Ati “Tuzakomeza guhanga udushya tunafatanye n’inzego za leta n’iz’abikorera kugira ngo tuzageze MTN Mobile Money ku rundi rwego rushimishije.”

MTN Mobile Money ni uburyo bufasha ababukoresha yaba abo mu gihugu no hanze kohererezanya amafaranga, kwishyura izindi serivisi, kugura amafaranga yo guhamagara n’ibindi.

Raporo ya Banki y’Isi iherutse gutangaza ko serivisi za Mobile Money ari kimwe mu byatumye umubare w’abatunze konti muri Afurika yo munsi y’ubutayu bwa Sahara wiyongera, bituma abagera kuri serivisi z’imari na bo biyongera.

Kugeza muri Nzeli umwaka ushize, abantu bagera kuri miliyoni esheshatu bari bafite konti babitsaho bakanabikuzaho amafaranga kuri telefoni zabo bijyanye n’ibigo by’itumanaho bikorera mu Rwanda. Zari inshuro eshatu z’abafite konti muri banki, kuko Banki Nkuru y’u Rwanda (BNR) ivuga ko kugeza muri Kamena 2015 Abanyarwanda bafite izo konti bari 2 278 867.

BNR kandi ivuga ko kuva muri Mutarama umwaka ushize kugeza muri Kamena 2015, habikijwe amafaranga angana na miliyari 211 na miliyoni 790, mu gihe ayabikujwe agera kuri miliyari 185 na miliyoni 994.

MTN Rwanda yujuje abakiliya miliyoni imwe bakoresha Mobile Money

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza