Kwamamaza

Mu 2020 ubukene bukabije mu Rwanda buzaba ari zeru ku ijana- Minisitiri Gatete

Yanditswe kuya 3-11-2016 saa 16:27' na Rabbi Malo Umucunguzi


Guverinoma y’u Rwanda na Banki y’Isi, bashyize umukono ku masezerano y’inguzanyo y’igihe kirekire ya miliyoni $95, azakoreshwa muri gahunda zigamije guteza imbere abaturage, by’umwihariko mu gukurikirana uko bagenda bivana mu bukene.

Ni inguzanyo izishyurwa mu myaka 40 ku nyungu ya 0.75%, ariko hakabaho imyaka 10 u Rwanda ruzamara rutaratangira kwishyura.

Minisitiri w’Imari n’Igenamigambi Amb. Gatete Claver, yavuze ko u Rwanda rufite gahunda zitanduka zifasha abakene nka Girinka, aho ubwo zatangiraga mu 2006, mu myaka itanu Abanyarwanda barenga miliyoni bivanye mu bukene, mu yindi itatu yakurikiye 650 000 babwivanamo, bigaragaza ko u Rwanda ruzi uko ubukene bukabije bugabanuka, ariko hakenewe kumenya byinshi kuri izo mpinduka n’ahashobora kongerwa imbaraga.

Iyi nguzanyo ya Banki y’Isi izakoreshwa muri izo gahunda zivana abaturage mu bukene harimo kunoza ibijyanye n’Ubudehe no kubaka uburyo bufasha gukurikirana uko abaturage bava mu bukene hashingiwe ku makuru afatika (Management Information System, MIS).

Umuyobozi wa Banki y’Isi mu Rwanda, Yasser El Gammal, yavuze ko bafata u Rwanda nk’igihugu cya mbere ku Isi mu gushyiraho gahunda ziteza imbere abaturage zitaye cyane ku bakene, zikabafasha kwiyubakamo umushobozi, mu myaka ishize ikaba yarahaye u Rwanda miliyoni $260.

Minisitiri Gatete yavuze ko aya mafaranga agenda afasha haba mu bakene bari muri gahunda ya VUP bahabwa imirimo bishyurirwa, abahuzwa na za Sacco bagahabwa inguzanyo ngo bihangire imirimo, hagamijwe gufasha Abanyarwanda benshi bashoboka.

Ati “Ni ukugira ngo turebe ko twafasha ibyiciro bitandukanye by’Abanyarwanda kugira ngo byivane mu bukene. Kubera ko ari ingamba z’igihugu cyacu kugira ngo mu 2020 tuzabe tudafite abantu bari mu bukene bukabije, ubu baramanutse mu myaka itanu ishize bava kuri 24.5% ariko mu mwaka ushize tukaba twari kuri 16.3%.’’

Minisitiri w’Imari n’Igenamigambi, Amb. Gatete Claver

Hakozwe impinduka mu kwita ku bakennye cyane

Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza no kurengera abaturage, Dr Mukabaramba Alvera, yavuze ko abari bakennye cyane mu myaka itanu ishize bageraga muri miliyoni ebyiri, ubu babarirwa muri miliyoni 1.3.

Gusa ngo urebye abavuye mu bukene bukabije n’ubu hari ibyo bakibura, hakaba n’ubwo bigorana kubakurikirana ngo hamenyekane niba badasubira muri bwa bukene, ibintu bigiye kujya bipimwa mu buryo bushya.

Ati “Bizadufasha ku buryo tuzajya tubakurikirana tukamenya n’umuntu wavuye mu cyiciro runaka yagiye muri iki, ibintu twamuhaye n’andi makuru yose, ari nayo tuzajya dushingiraho tuvuga ngo umuntu yari afite ikintu runaka none yiyunguye iki,’’

Dr Mukabaramba yavuze ko basangaga amafaranga yifashishwa mu kuzamura abakene yaba ay’inkunga y’ingoboka cyangwa imirimo abantu bakora bagahembwa, ari bito cyane ku buryo utavuga ngo umuntu biramukura aha bimujyanye aha.

Ati “Wabonaga ari ibimutunga bikarangirira aho. Hari gahunda rero, iminsi umuntu yakoraga muri iyo mirimo, iziyongera ive kuri 47 yari ihari mu mwaka igere kuri 70. Ikindi ni uko hagiyeho uburyo bwo gufasha umuntu kuva mu bukene, bwo gufata wa muntu ukora agahembwa, tukamwongereraho n’ibindi bintu bizatuma agira icyo ageraho. Akora agahembwa, tukamushyiriraho n’amatungo magufi ndetse yaba ashoboye no gukora umushinga akawukora.

Iyi gahunda iri mu igerageza mu murenge umwe muri buri karere, abagenerwabikora bakazagira n’ababakurikirana umunsi ku wundi kugira ngo harebwe uko batera imbere.

Ati “Uyu mushinga w’igerageza nurangira tuzakwira mu Rwanda hose cyane ko tubonye amafaranga yandi yiyongeraho, noneho tubare ngo ugomba kuva mu cyiciro ukajya muri iki, ariko hakaba n’abantu bamukurikirana.’’

Minisitiri Gatete yavuze ko ubu buryo buzafasha kugaragaza imibare nyayo y’Abanyarwanda bavuye mu bukene mu buryo bufatika, kuko ubusanzwe “kuguha amafaranga gusa ukayarya agashira, ntabwo bihagije nubwo waba wayakoreye. Hagomba kubaho uburyo bw’ubwunganizi,’’

Yavuze ko Banki y’Isi ifasha u Rwanda muri gahunda zirimo imicungire y’imari, ingufu imiyoborere n’izindi, ku buryo u Rwanda mu myaka itatu ishize rwari rwemerewe miliyoni $730 ndetse hari icyizere ko azongerwa mu gihe kiri imbere kuko ayo rwahawe yakoreshejwe neza.

Umuyobozi wa Banki y’Isi mu Rwanda, Yasser El Gammal na Minisitiri Gatete nyuma yo gusinya amasezerano
Umuyobozi wa Banki y’Isi mu Rwanda, Yasser El Gammal (wa mbere ibumoso)
Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza no kurengera abaturage, Dr Mukabaramba Alvera

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved