Kwamamaza

‘Mu myaka 10 tuzaba tumaze kuringaniza ubucuruzi bw’u Rwanda n’ubwa Uganda’

Yanditswe kuya 15-11-2016 saa 05:44' na Ntakirutimana Deus


Minisitiri w’Ubucuruzi, Inganda n’Umuryango wa Afurika y’i Burasirazuba (Mineacom), François Kanimba, yatangaje ko ahereye ku muvuduko w’ibicuruzwa u Rwanda rwohereza muri Uganda, asanga mu myaka 10 iri imbere ubucuruzi hagati y’ibihugu byombi buzaba buringaniye.

Yabivuze kuri uyu wa tariki ya 14 Ugushyingo ubwo hatangiraga icyumweru cyahariwe gukangurira abaturage ibijyanye n’ibikorwa bya EAC muri gahunda ngarukamwaka yemejwe n’inzego zo hejuru z’uyu muryango, ko mu Ugushyingo hazajya haba muri buri gihugu ibikorwa byo gukangurira abaturage iyi gahunda. Kizasorwa ku ya 19 Ugushyingo 2016

Mu kiganiro n’abanyamakuru, Kanimba yavuze ko ibicuruzwa u Rwanda rwohereza mu karere bifite agaciro ka miliyoni 25 z’amadolari ya Amerika mu mwaka, ariko ko bigenda byiyongera, akaba ariho abihera avuga ko muri icyo gihe hazabaho kuringanira.

Ati “Iyo urebye ibyo twohereza muri Uganda ntabwo byari byaba byinshi, ubu birarenga miliyoni 25 z’amadolari, kandi bitangiye vuba iyo urebye uko bimeze, ariko ubona buri mwaka bizamuka cyane ku muvuduko urenga 10%.”

Yongeyeho ati “Icyiza kandi kigaragara ni uko ibyinshi bishingiye ku musaruro uturuka mu nganda, ari naho njyewe nshingira mvuga ko ku byerekeye mu myaka iri mbere mbona bizakomeza kugenda bizamuka kuko hari inganda nshya ziri kugenda zishyirwa hano mu Rwanda.”

Izo nganda ngo zifite ubushobozi bwo kuzacuruza ibyo zikora mu bihugu bikikije u Rwanda, dore ko ngo n’ipiganwa zizagenda zihura naryo rizaba rito kuko muri ibyo bihugu usanga nta nganda zisa zihari.

Ahereye kuri uko kuzamuka kw’ibyoherezwa muri Uganda, Kanimba yihaye igihe abona ibicuruzwa ku mpande zombi byazaba byaringaniye.

Minisitiri w’Ubucuruzi, Inganda n’Umuryango wa Afurika y’i Burasirazuba (Mineacom), François Kanimba

Ati ”N’ubwo tugitumiza byinshi cyane muri Uganda kurusha ibyo twoherezayo, iyo urebye mu muvuduko usanga iby’u Rwanda rwoherezayo biri kuzamuka vuba kurusha ibyo dukurayo, ku buryo umuntu ashobora kwizera ko mu myaka 10. Njye ndiha imyaka 10 kugira ngo tube tumaze kuringaniza ubucuruzi bw’u Rwanda na Uganda mu murongo wa EAC kuko turacyari kure cyane buriya.”

U Rwanda ngo ni igihugu gihahirana na Uganda ku bicuruzwa bitandukanye kurusha ibindi bihugu bihuriye mu muryango w’Afurika y’Iburasirazuba (EAC).

Muri gahunda zo kumenyekanisha ibikorwa bya EAC, u Rwanda ruzakora ibikorwa bitandukanye birimo kuganira n’urubyiruko inyungu z’uyu muryango, n’uko ruwubona, hari kandi gahunda yo kuganira n’abayobozi n’abaturage na Uganda ku bijyanye no kunoza ubucuruzi bwambukiranya imipaka cyane ku baturiye imipaka y’ibihugu byombi.

U Rwanda ruvuga ko rwungukiye muri uwo muryango kugira isoko ryagutse rituma abashoramari badatinya kurukoreramo.

Umuryango wa Afurika y’Iburasirazuba ugizwe n’abaturage basaga miliyoni 145.5 baturuka mu bihugu bya Uganda, u Rwanda ,u Burundi, Tanzania na Kenya, mu gihe uyu mwaka wungutse Sudani y’Epfo ifite basaga miliyoni 11.3.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved