Ni iki u Rwanda rwasanze mu bubiko bw’u Bubiligi ku mabuye y’agaciro yarwo?

Yanditswe na Rabbi Malo Umucunguzi
Kuya 1 Nzeri 2018 saa 11:39
Yasuwe :
0 0

Muri Kamena uyu mwaka, u Rwanda rwohereje itsinda mu Bubiligi ngo rijye gukurikirana amakuru arebana n’amabuye y’agaciro yarwo icyo gihugu kibitse imyaka myinshi.

U Bubiligi nk’igihugu cyakolonije u Rwanda, hari ibigo bigikomokamo byakoze ubucukuzi muri iki gihugu ku buryo nk’icya mbere cyabukoze mu 1932. Bagiye bakora n’ubushakashatsi kuri ayo mabuye y’agaciro, ariko bumwe ntibwagiye ahabona.

Ibyo bagiye bakusanya byose babibikaga muri Royal Museum for Central Africa iherereye muri komini Tervuren, ibindi bikabikwa mu bindi bice.

Mu gushaka kumenya amakuru menshi u Bubiligi bubitse kuri ayo mabuye n’ubushakashatsi bwakoze, ibihugu byombi byemeranyijwe ko u Rwanda rwoherezayo itsinda rikagaragarizwa amakuru yose ahari, areba u Rwanda rukayahabwa.

Umuyobozi Mukuru w’Ikigo cy’Igihugu gishinzwe Mine, Peteroli na Gaz, Gatare Francis, yabwiye IGIHE ko nyuma y’ibikorwa by’iri tsinda bari gusuzuma no kubika neza izi nyandiko, gusa ngo nta banga basanzeyo n’ubwo amakuru yabonetse ari ingirakamaro.

Yagize ati “Ntacyo umuntu yavuga ko yabonye wenda cyari nk’ibanga rihanitse kugeza uyu munsi, cyane ko ari ibintu byinshi. Ni inyandiko zigera hafi ku bihumbi 40, tumwe dutoya, ibindi binini. Kugira ngo byose rero umuntu abinyuremo, ibikubiyemo umuntu abimenye, bizatwara igihe. ”

Gusa mu bimaze kugaragara, Gatare yavuze ko harimo inyandiko, amakarita menshi na raporo ibigo by’Ababiligi byagiye bikorera mu Rwanda, babona n’ibitekerezo byagiye bibitangaho.

Yakomeje agira ati “Icyiza twabonyemo cyane ni uko hari umushinga leta y’u Rwanda yari yarakoze, UNDP ikorana n’Ababiligi bagenda bafata ibipimo mu gihugu hose, bapima ubutaka hirya no hino mu gihugu ngo barebe imiterere yabwo, bityo ubishingiyeho ukaba wabona amabuye ashobora kuhaboneka.”

“Iyo karita irahari ndetse n’ibipimo byari byafashwe ni uko ari ibya kera bigera aho bikanahinduka, ariko nabyo birahari. ”

“Hari raporo umuntu yabonaga zishobora kugira akamaro n’ibitabo byo muri icyo gihe, bimwe bishobora kugira akamaro cyane cyane mu bantu bagiye mu bushakashatsi nko muri kaminuza n’abandi bashobora kwigiraho.”

Yavuze ko akamaro k’aya makuru ahanini katazaba ku bakora ubucukuzi bw’amabuye y’agaciro gusa, ahubwo no mu bumenyi kuko nka Kaminuza y’u Rwanda yatangije Ishami ry’ubucukuzi bw’amabuye y’agaciro.

Aya makuru kandi aziyongera ku gikorwa Guverinoma y’u Rwanda iri gukora cy’ubushakashatsi ku mabuye y’agaciro ashobora kuboneka mu gihugu n’aho aherereye.

Mu mwaka ushize ubucukuzi bw’amabuye y’agaciro bwinjirije u Rwanda miliyoni $373, uyu mwaka intego ikaba ari miliyoni $600.

Ikigo cy’Igihugu gishinzwe Mine, Peteroli na Gaz giteganya ko mu mwaka wa 2020 amabuye y’agaciro azaba yinjiza miliyoni 800$, na miliyari $1.5 mu 2024.

Itsinda ry'u Rwanda ryari mu Bubiligi rishakisha amakuru bubitse, muri Kamena 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza