Nyamasheke: Abahinzi b’icyayi bemeza ko ntaho bahuriye na Mwarimu na Muganga

Yanditswe na Sitio Ndoli
Kuya 6 Mutarama 2017 saa 10:38
Yasuwe :
0 0

Bamwe mu bahinzi b’icyayi bo mu Karere ka Nyamasheke, bavuga ko ubu buhinzi bumaze kubateza imbere ku buryo amafaranga bakura mu musaruro w’iki gihingwa ntaho ahuriye n’aya bamwe mu bakozi ba leta barimo Abarimu n’Abaganga.

Ibi babitangaje ubwo hizihizwaga umunsi w’umuhinzi w’icyayi utegurwa n’uruganda rwa Gisakura, ugamije gushimira abahinzi baba barahize abandi mu kongera umusaruro binyuze mu kwita ku cyayi cyabo.

Muri iki gikorwa, abahinzi batanu mu bahize abandi mu gufata neza icyayi bahembwe inka, abandi bahabwa matola, telefone n’ibindi, byose bifite agaciro ka miliyoni 12 z’amanyarwanda.

Bamwe muri abo bahinzi bemeza ko amafaranga bahabwa ari menshi kuko yabateje imbere mu buzima bwabo bwa buri munsi, aho bamwe bubatse inzu,bishyurira abana babo amafaranga y’ishuri n’ibindi, bakemeza ko hari abakozi ba leta barusha amafaranga.

Uwamurengeye Constance umwe mu bahawe inka yagize ati “Umuhinzi uwari we wese uhinga icyayi ntabwo yakena, buri kwezi neza icyayi nkabona ibihumbi magana abiri, nk’umuhinzi utari umukozi wa leta mba numva binteye ishema. Nta mahuriro yanjye na Mwarimu, habe n’umuganga ntiyanyigerezaho.”

Minani Innocent, umwe muri aba bahinzi wabitangiye kuva mu 1970, agira ati “Icyayi cyanyubakiye inzu ihagaze muri miyoni ebyiri, inka ebyiri, cyanandereye n’umuryango w’abana icumi. Nkoresheje amaboko yanjye mwarimu murusha umushahara.”

Kuri ubu aba bahinzi bibumbiye muri koperative ebyiri zihinga icyayi muri aka karere, bahabwa 25% y’umusaruro bohereza mu ruganda rw’icyayi rwa Gisakura, bagashimira Perezida Kagame washyizeho iyi gahunda mu mwaka wa 2013.

Umuyobozi wungirije w’uruganda rwa Gisakura, Kanyensigye Emmanuel, avuga ko imwe muri ayo makoperative igenerwa 10% naho indi igahabwa 15% by’inyungu iva ku ruganda.

Ati “Koperative z’abahinzi b’icyayi ebyiri nizo zihabwa 25% ku nyungu yabonetse mu ruganda, barasarura bakagurisha mu ruganda, umwaka washira tukabaha niyo nyungu. Urabona umusaruro uri kugenda wiyongera ugereranyije no mu myaka yashize.”

Umuyobozi w’akarere ka Nyamasheke wungirije ushinzwe iterambere ry’ubukungu, Ntaganira Josue, avuga ko hari abahinzi bari batangiye kurandura icyayi ndetse bakanahingamo inturusi, ariko ngo babakanguriye kumenya agaciro kacyo, ku buryo ubu bamaze guhindura imyumvire byatumye biteza imbere.

Bamwe mu bahinga icyayi bahamya ko kimaze kubateza imbere bigaragara
Abahinzi bitaye ku cyayi cyabo bikongera umusaruro, bahembwe inka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244