Nyamasheke: Begerejwe uruganda rw’icyayi ruzarokora icyahiraga mu nzira kijyanywe i Karongi

Yanditswe na Sitio Ndoli
Kuya 3 Mutarama 2018 saa 04:16
Yasuwe :
0 0

Abahinzi b’icyayi bo mu Mirenge ya Karambi, Kanjongo na Macuba mu Karere ka Nyamasheke baravuga ko icyayi cyabo cyapfiraga mu nzira kijya ku ruganda rwa Gisovu mu Karere ka Karongi kubera urugendo rurerure bigatuma bahomba ariko kuba uruganda bemerewe hafi yabo rwatangiye gukora bagiye kugaruza ibyo bahombye.

Mu mpera z’umwaka wa 2016 ni bwo uruganda rw’icyayi rwatangiye kubakwa mu Murenge wa Karambi aho rwagomba kuzura mu kwezi kwa gatanu 2017 kugira ngo ruge rutunganya icyayi cy’abahinzi bo muri iyo mirenge itatu aho kugira ngo icyayi kijyanwe ku ruganda rwa Gisovu mu bilometero 68.

Uru ruganda rw’icyayi rwatangiye gutunganya umusaruro w’aba bahinzi mu mpera z’umwaka ushize.

Mu kiganiro na IGIHE aba bahinzi bishimiye ko igihombo bahuraga na cyo kigiye kuba amateka ahubwo ko bagiye kongera umusaruro.

Nzaramba Pascal ati “Twagiraga ikibazo cy’iyangirika ry’icyayi kijya mu Gisovo kubera urugendo cyabaga cyakoze bigatuma duhomba, ubwo uruganda rwatangiye igihombo twahuraga na cyo ntikizongera kubaho kugera ku ruganda ni iminota mike ubwo bizatuma tuwongera umusaruro.

Nyirampakaniye Jacqueline na we ati “Mu Gisovu ni kure cyane byibuze cyageragayo nyuma y’amasaha atanu rimwe na rimwe kigahira mu nzira, cyikamenwa waba wasoromye ibiro nka 200 bakaguha 60 ngo ikindi cyamenwe ariko aho uruganda rwacu rugiriwe twishimye kuko tuzunguka kutavunika ndetse nticyongere gushya.”

Umuyobozi wa Koperative y’abahinzi b’icyayi COTHEGA, bo muri iyi mirenge, Ukurikiyimfura Elier, avuga ko bahombye amafaranga arenga gato miliyono 80 kuva batangira guhinga icyayi kugeza mu kwezi kwa cumi na kumwe uyu mwaka.

Ati “Twatangiye guhinga icyayi muri 2010, twahuraga n’ingorane nyinshi cyane zirimo kugeza umusaruro n’uruganda dukorana na rwo byadutwaraga ibirometero 68 harimo gukoresha imihanda mibi no guhendwa no kugitwara. Kuva twatangira guhinga icyayi kugeza mu Ugushyingo 2017 twahomye hafi toni 280 mu mafaranga y’u Rwanda arenga gato miliyoni 80. Uyu munsi dufite amahirwe atangaje kuko uruganda rusa n’urwubatse hagati mu mirima y’icyayi, icyo guhombo kigiye ku ruhande.”

Umuyobozi w’Akarere ka Nyamasheke wungirije ushinzwe ubukungu, Ntaganira Josué Michael, avuga ko nyuma yuko uruganda rwuzuye bagiye gutangira gukora imihanda ijya mu mirima y’icyayi kugira ngo babone uko bageza umusaruro neza ku ruganda.

Ati “Ni ibyishimo kandi ni izindi mbaraga ku bahinzi b’icyayi kugira ngo gitange umusaruro mwinshi kandi mwiza, ubu tugiye gutangira gukora imihanda ifasha mu kugeza umusaruro ku ruganda.”

Uru ruganda rwuzuye rutwaye miliyoni 12.3 z’amadolari ya Amerika, rwubatswe na Rwanda Mountain Tea Company. Mu kwezi gushize rutangiye gukora rumaze gutunganya toni zirenga ijana.

Uruganda rw'icyayi rwa Gatare
Uruganda rw'icyayi rwa Gatare rwatagiye gutunganya umusaruro wabaturage
Abahinzi b'iNyamasheke bafite intego yo kongera ubuso buhingwaho icyayi
Abahinzi b'icyayi bo mu Murenge Cyato,Karambi na Kanjongo bishimiye ko babonye urugandan ruzabaruhura imvune bahuraga na zo bajyana umusaruro i Karongi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza