Kwamamaza

Nyarugenge: Abakuru b’imidugudu bagiye kwifashishwa mu kuzamura imisoro

Yanditswe kuya 16-11-2016 saa 17:51' na Thamimu Hakizimana


Ubuyobozi bw’Akarere ka Nyarugenge n’abakozi b’Ikigo cy’igihugu gishinzwe Imisoro n’Amahoro (RRA), bwifashishije abakuru b’imidugudu yo muri aka karere mu gikorwa cy’ubukangurambaga bugamije kwigisha abacuruzi iby’imisoro mu rwego rwo kuzamura imisoro itangwa muri aka karere.

Iki gikorwa cyatangiye ku wa Mbere tariki ya 14 Ugushyingo 2016, ubuyobozi bw’aka Karere ka Nyarugenge n’amatsinda y’abakozi ba RRA, gitangirizwa mu Murenge wa Kimisagara.

Muri ubu bukangurambaga, abacuruzi bari kwigishwa ibijyanye n’imisoro, birimo kubahiriza igihe ntarengwa cyo gusora, kubakangurira ko buri muturage yandikisha ibyo akora no kubashishikariza kwishyura ibirarane by’imisoro bafite.

Ubuyobozi bw’Akarere ka Nyarugenge buvuga ko bwitabaje abakuru b’imidugudu kugira ngo bajye babaha amakuru ajyanye n’ubukode bw’inzu zicururizwamo mu midugudu bayobora cyane ko aribo baba bazi buri mucuruzi ukorera mu gace kabo.

Umunyamabanga Nshingwabikorwa w’agateganyo w’Akarere ka Nyarugenge, Musafiri Léonidas, yagize ati “ Ngira ngo n’ubusanzwe abakuru b’imidugudu bagiye badufasha muri byinshi, rero baba bazi abacuruzi bakorera mu gace bayobora, amafaranga bishyura, kurusha ubuyobozi bw’akarere na RRA. Urugero nabaha nko ku bukode bw’inzu nibo baba bayazi neza kuko baba bazi n’abacuruzi bayakoreramo kurusha ubuyobozi bwose.”

Yongeyeho ko bahisemo gufata uyu mwanzuro wo gukorana n’abakuru b’imidugugu nyuma y’uko basanze mu bubiko bw’amakuru y’umwaka wa 2015 hari abaturage batatanze imisoro kandi bari ku rutonde rw’abagomba kwishyura.

Yakomeje avuga ko Ubuyobozi bw’Akarere ka Nyarugenge bwihaye intego yo gufata imisoro itatu irimo iy’ubukode bw’inzu, amahoro y’isuku n’amahoro ku bukode bw’ibibanza kuko 70% by’imisoro yinjira mu Karere ka Nyarugenge aturuka muri iyo misoro.

Uyu muyobozi yanagaragaje ko biteze ko gukorana n’abakuru b’imidugudu bizatuma mu ngengo y’imari y’umwaka wa 2017, Akarere ka Nyarugenge kazinjiza imisoro irenga miliyari umunani z’amafaranga y’u Rwanda.

Umukuru w’umudugudu wa Gakaraza wo mu Murenge wa Kimisagara, Mukabihogo yavuze ko bishimiye iki gikorwa kuko bizatuma na bo ubwabo bagira umwete wo kumenya abacuruzi bakorera mu midugudu bayobora.

Yagize ati “ Bizadufasha rwose kuko hari n’igihe wabonaga umucuruzi mu mudugudu uyoboye ntumwiteho ukumva ko bitakureba; ariko ubu bigiye kujya bituma tumenya amafaranga basorera inzu bakoreramo n’amazina yabo no kumenya niba barasoze cyangwa batarabikoze kuko imisoro ari yo ituma igihugu cyacu gitera imbere.”

Biteganyijwe ko iki gikorwa cy’ubukangurambaga ku myinjirize y’imisoro n’amahoro ku nzego z’ibanze kizakomereza mu yindi mirenge yose 10 igize Akarere ka Nyarugenge.

Abakuru b'imidugudu bitezweho kuzamura urwego rw'imisoro muri aka karere
Bitabajwe bitewe n'uko ari bo baba bazi amakuru yose y'abacururiza mu midugudu yabo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved