Kwamamaza

Inama ya ECCAS yitabiriwe na Perezida Kagame yakomoje ku bibazo by’u Burundi n’iterabwoba

Yanditswe kuya 1-12-2016 saa 11:35' na IGIHE


Perezida Kagame kimwe n’abandi bayobozi bakuru b’ibihugu na za guverinoma bitabiriye inama ya munani idasanzwe y’Umuryango w’Ubukungu w’ibihugu byo muri Afurika yo hagati (ECCAS) yabereye muri Gabon.

Muri iyi nama y’umunsi umwe yateranye kuri uyu wa Gatatu, tariki ya 30 Ugushyingo, yayobowe na Ali Bongo uyobora uyu muryango ndetse akaba na Perezida wa Gabon.

Uretse Perezida Kagame, abandi bakuru b’ibihugu bitabiriye iyi nama barimo Idriss Deby Itno wa Chad, Faustin-Archange Touadera uyobora Repubulika ya Centrafrique, ibindi bihugu byari bihagarariwe n’abandi bayobozi mu nzego zabyo zinyuranye.

Muri iyi nama, haganiriwe ku bibazo by’ingutu byugarije aka karere, harimo ibikorwa by’iterabwoba bikaza umurego uko bwije n’uko bukeye, imitwe y’inyeshyamba muri Repubulika Iharanira Demukarasi ya Congo, Repubulika ya Centrafrique n’u Burundi; igamije guhungabanya umutekano n’amahoro muri aka karere.

Perezida Bongo yahamagariye ibihugu bigize uyu muryango gukomeza kwimika umuco w’ubuvandimwe n’ubufatanye mu guhangana n’ibibazo byugarije akarere ka Afurika yo hagati.

Abitabiriye iyi nama kandi barebeye hamwe amatora yabaye muri uyu mwaka ndetse n’ibibazo byayagaragayemo. Banaganiriye no ku bucuruzi hagati y’uyu mugabane n’ubwambukiranya imipaka n’iterambere ry’ubwikorezi bwo mu mazi no mu kirere muri aka karere.

ECCAS iri mu mugambi wo gukora ubucuruzi bwisanzuye (free trade) mu rwego rwo guteza imbere ubucuruzi mu bihugu binyamuryango byayo. Ni muri urwo rwego bimwe mu bihugu byatangiye gusaba ko byatanga urutonde rw’ibicuruzwa byazajya byohereza mu bihugu bigenzi byabyo mu rwego rwo gutangiza ubwo bucuruzi.

Mu rwego rwo gushyira mu bikorwa uwo mushinga w’ubwo bucuruzi, Abaminisitiri b’Ubucuruzi n’Imari muri aka karere, bemeranyijwe ku biciro bishobora gushyirwaho ku bicuruzwa byinjizwa mu bihugu by’uyu muryango ariko byarakorewe hanze y’aka karere.

Amafaranga y’imisoro azajya avamo azaba ari nk’inkunga izabasha gufasha kuziba icyuho kizaba cyagaragaye mu misoro. Biteganyijwe ko 50% by’azinjira azafasha mu kuziba icyuho cyizagaragara mu misoro bitewe no koroshya ibiciro by’ubucuruzi mu bihugu bigize uyu muryango wa ECCAS.

Uyu muryango kandi wemeje ko ibicuruzwa bizajya byinjizwa muri uyu muryango biturutse hanze yawo, bizajya bishyuzwa umusoro ungana na 0.4%.

U Rwanda ni kimwe mu bihugu by’Umuryango wa Afurika y’u Burasirazuba byemeye ko ibicuruzwa byinjira mu gihugu byajya bisora 1.4% mu rwego rwo guteza imbere imishinga y’ibikorwaremezo by’akarere. U Rwanda kandi rushyigikiye undi mushinga uhuriweho n’Umuryango wa Afurika yunze Ubumwe, w’uko ruzajya rutanga miliyari 1.2 y’amadorali buri mwaka ahwanye na 0.2% y’imisoro y’ibicuruzwa byinjira mu gihugu yo gufasha ibikorwa by’uyu muryango.

ECASS yashinzwe mu 1983 ifite inshingano zo kunoza ubufatanye no kwishyira hamwe kwa Afurika yo hagati, ariko bigeze mu 2007 u Rwanda rufata umwanzuro wo kwivanamo ahubwo rushyira imbaraga mu miryango ya COMESA n’Umuryago wa Afurika y’u Burasirazuba, EAC.

Mu 2015, nibwo u Rwanda rwongeye gusubira muri uyu muryango, bihabwa umugisha muri Kanama 2016, ndetse iyi nama ikaba yari iya mbere rwari rwitabiriye kuva rwongeye kuba umunyamuryango.

Kugeza ubu uyu muryango ugizwe n’ibihugu 11 birimo, u Rwanda, Angola, u Burundi, Cameroon, Repubulika ya Centrafrique, Congo Brazzaville, Repubulika Iharanira Demukarasi ya Congo, Gabon, Equatorial Guinea, Tchad na Sao Tome & Principe.

Amafoto ya Perezida Kagame muri Gabon

Perezida Kagame yahawe ikaze na mugenzi we Ali Bongo
Perezida Bongo yasabye ibihugu byo muri ECCAS kugira ubufatanye mu guhangana n'ibibazo biyugarije
Abayobozi batandukanye bari bitabiriye iyi nama idasanzwe ya ECCAS
U Rwanda ni ubwa mbere rwari rwitabiriye iyi nama nyuma yo gusubira muri uyu muryango umwaka ushize

Amafoto: Village Urugwiro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved