REG yagaragaje uko izageza amashanyarazi kuri bose bitarenze 2024

Yanditswe na Mugabo Jean d’Amour
Kuya 4 Mutarama 2018 saa 07:25
Yasuwe :
1 0

Ikigo cy’Igihugu gishinzwe Ingufu (REG) cyamaze kuvugurura intego zo kongera no gukwirakwiza amashanyarazi hagamijwe kuyageza ku Banyarwanda bose bitarenze umwaka wa 2024.

Guverinoma yari yarihaye intego ko umwaka wa 2018 uzarangira u Rwanda rutunganya amashanyarazi angana na megawati 563 naho abaturage 70% bakaba bafite umuriro ariko ubu REG yaciye undi muvuno uzatuma Abanyarwanda bose (100%) bazaba bafite umuriro bitarenze imyaka irindwi iri mbere.

Umuyobozi Mukuru wa REG, Eng. Ron Weiss, yavuze ko izi mpinduka ziri mu ntego za Guverinoma zo gutunganya no gukwirakwiza umuriro uhagije kandi wizewe mu gihugu hose.

Mu kiganiro na IGIHE, Eng. Weiss yagarutse ku ruhare rw’inganda mu gutuma urwego rw’ingufu rutera imbere kuko iyo inganda ziteye imbere zikenera umuriro mwinshi. Uyu muyobozi yavuze ko nta gushidikanya bazagera ku ntego bihaye bityo bigateza imbere urwego rw’ingufu n’igihugu muri rusange.

Kurikira ikiganiro kirambuye IGIHE yagiranye na Eng. Weiss:

Umuyobozi Mukuru wa REG, Eng. Ron Weiss

Ni iki mumaze kubona mu rwego rw’ingufu kugeza ubu?

Numva nejejwe no kuba ndi mu Rwanda, nkorana n’abantu b’abanyamurava mu rwego rw’ingufu. Natangajwe cyane n’ukuntu Guverinoma n’abafatanyabikorwa badufasha, kuri njye, binyereka ko intego twihaye tuzazigeraho.

Mwagereranya mute urwego rw’ingufu rw’u Rwanda n’urwa Israel?

Israel n’u Rwanda bifite byinshi bihuriyeho… u Rwanda rufite ubushobozi bwo gutunganya umuriro urengaho megawati 200 naho Israel ikagira izirenga 14,000. Nyamara, ni ingenzi kuzirikana ko Israel yitaye cyane ku guteza imbere inganda kuva kera bityo gutunganya amashanyarazi bigendera ku buryo wari ukenewe. U Rwanda rurimo kwita cyane ku kongera amashanyarazi … nyamara hakenewe guteza imbere urwego rw’inganda bityo na rwo rukagira uruhare mu iterambere ry’urwego rw’ingufu.

Mwatubwira birambuye ku ntego zivuguruye n’uburyo muteganya kugeza umuriro kuri bose mu 2024?

Dufite igenamigambi riteguwe neza ku buryo tubasha gukora igikenewe cyose. Ni yo mpamvu twavuguruye intego zari ziriho mbere zo gutanga umuriro ungana na megawati 563 no kuwugeza ku baturage 70% bitarenze 2018 tukazisimbuza gahunda nshya y’imyaka irindwi tunubahiriza intego Guverinema y’u Rwanda yiyemeje mu rwego rw’ingufu.

Muri rusange, ubu turiteguye haba mu kongera no gukwirakwiza ingufu. Igisigaye ni uko Guverinoma n’abikorera bashyira imbaraga mu kongera ibikorwa bikeneye umuriro. Ibi bivuze ko dufite ubushobozi bwo gutanga umuriro ukenewe kandi ibi ni ingenzi ku rwego rw’ingufu kuko rushobora kubona inyungu iyo rutanga umuriro ukenewe.

Ntabwo dukeneye kugira imishinga myinshi y’amashanyarazi nyamara ari nta soko ryawo. Ikindi kandi, ubu dufite umuriro uhagije, bityo nta mpungenge dukwiye kugira. Ariko tuzakomeza kongera umuriro bijyana n’isoko rigenda ryaguka, ni yo mpamvu ubu tutayoborwa cyane na za ntego ahubwo twitaye cyane ku isoko ry’umuriro.

Ubu Abanyarwanda bafite amashanyarazi barangana iki?

Kugeza ubu, 42% ni bo bafite umuriro ariko intego ni ukugera ku 100% mu myaka irindwi iri imbere. Tuzifashisha cyane umuriro udafatiye ku muyoboro mugari (off-grid) kugira ngo tugere kuri iyi ntego. Uyu muriro ni ingenzi cyane bitewe n’imiterere y’igihugu n’imiturire ndetse n’ingo nyinshi zikaba zikoresha umuriro mukeya cyane.

Ikindi ni uko ikiguzi cyo gutanga umuriro ufatiye ku muyoboro mugari kiri hejuru cyane kuko kigera ku madolari 700 (akabakaba 600,000Frw) ku rugo rumwe mu gihe gutanga umuriro ufatiye ku miyoboro migufi bitarenza amadolari 65 (56,000Frw). Uyu muriro kandi urizewe ndetse no kuwutanga bikoroha cyane. Ni muri urwo rwego turimo gukora urutonde rw’uduce twose tw’igihugu ku buryo ruzadufasha gushyira mu bikorwa iyi gahunda rukatuyobora ku hakwiye guhabwa umuriro ufatiye ku muyoboro mugari n’ahashyirwa ufatiye ku miyoboro migufi. Ibi bizatuma twihutisha imibare y’abagerwaho n’amashanyarazi.

Ubu ingo 11% zikoresha umuriro ufatiye ku miyoboro migufi (off-grid) naho 31% zigakoresha ufatiye ku muyoboro mugari (on-grid). Turashaka kongera umubare w’abakoresha imiyoboro migufi kugira ngo tuzashobore kugera ku 100% mu buryo bworoshye. Turimo kugerageza kwagura isoko ry’umuriro kugira ngo biduhe impamvu yo gushyira mu bikorwa imishinga yose dufite.

Abafite inganda baracyataka ko umuriro uhenze kandi utizewe; ni iki murimo gukora kuri iki kibazo?

Guverinoma n’abikorera bakwiye kwibanda ku guteza imbere inganda kuko REG yiteguye gutanga umuriro ukenewe wose uko isoko rigenda ryaguka. Ni ingenzi ko ukwiyongera kw’ingufu z’amashanyarazi kujyana n’iterambere ry’inganda. Bitabaye ibyo byaba ari ikosa gutunganya umuriro tudakeneye.

Ku birebana no gutanga umuriro uhendutse kandi wizewe, turagenda dutera intambwe nziza binyuze mu mishinga igamije kudufasha kugera kuri izi ntego. Iyo mishinga harimo uw’urugomero rwa Rusumo, uwa Nyiramugengeri ya Hakan n’urugomero rwa Rusizi ya 3 aho tugeze ku ntambwe yo gusinya amasezerano yo kuzagura uwo muriro. Twiteguye no gutangira icyiciro cya kabiri cy’umushinga wa Nyabarongo.

Ubu u Rwanda rufite umuriro urengaho gato megawati 200 ariko ntuhoraho kuko ingano yawo ihora ihindagurika kuko igice kinini cyawo gikomoka ku ngomero z’amashanyarazi zikunda kugerwaho n’ingaruka z’ihindagurika ry’ibihe zituma umuriro ugabanyuka mu gihe cy’izuba. Turashaka gukomeza kureba uko ikenerwa ry’umuriro rigenda ryaguka maze tukagenda twongera umuriro bitewe n’ukenewe.

Muvuze ko ubu hari umuriro uhagije nyamara turacyabona ibura ry’umuriro; biterwa n’iki? Ni iki se REG ikora mu gukemura iki kibazo?

Itangwa ry’umuriro ubu rihagaze neza kandi tuzakomeza guharanira ko abantu bose bagira umuriro uhagije kandi utabura bya hato na hato. Twamaze gushyira ku murongo imishinga yose harimo n’inganda z’umuriro zifitwe n’abikorera kugira ngo umuriro ube wizewe. Twamaze kuvugurura ibikorwa remezo byacu, dutunganya uburyo bwo gusana ibyangirika kugira ngo dukemure ibibazo by’ibura ry’umuriro rya hato na hato.

Ni koko ibura ry’umuriro ryaragabanyutse cyane kandi bizakomeza no kurushaho gukemuka. Imiyoboro mishya y’amashanyarazi yarubatswe n’ ibyuma biringaniza umuriro (transformateurs) bisimbuzwa ibindi bifite ubushobozi bwisumbuyeho. Urugero twasimbuje transformateur ya Mukungwa vuba aha, turimo no gusimbuza iya Mont Kigali. Dukomeje no kunoza imiyoboro (network) y’amashanyarazi kugira ngo turusheho gutanga umuriro wizewe.

Ibiciro by’umuriro biracyahanitse ugereranyije n’ibihugu byo muri aka karere; biterwa n’iki?

Ibiciro by’umuriro byaragabanyijwe umwaka ushize kandi turakora ibishoboka ngo bizongere bigabanyuke mu gihe kiri imbere. Turimo kubaka urwego rw’ingufu rukomeye binyuze mu kugabanya ikiguzi cyo gutunganya umuriro kikava ku by’ijana 11 by’idolari (hafi 95Frw) bikagera munsi y’iby’ijana 10 kuri kilowati. Ibi bizagabanya ibiciro by’amashanyarazi. Urugero turimo kugerageza gushyira ikiguzi cyo gutunganya kilowati imwe ku by’ijana 8 by’idolari (68Frw) no munsi mu mushinga wa Rusizi ya 3. Ni yo mpanvu twizeye ko imishinga turimo gushyira mu bikorwa ubu, izadufasha kugabanya ibiciro mu minsi iri imbere.

Haba hari imbogamizi mufite kugeza ubu?

Imbogamizi ikomeye ubu ihari ni ingengo y’imari. Nk’uko mubizi tubona inkunga nini ya Guverinoma n’imiryango nterankunga ariko niba dushaka gukora ibirenze ibyo dukora ubu, dukeneye ubushobozi bundi naho izindi mbogamizi zo tuzazikemurira nka REG.

Ubutumwa bwanyu muri uyu mwaka wa 2018

Twishimiye iterambere rigenda rigerwaho mu nzego zose z’igihugu. Natwe twiyemeje kurushaho guha Abanyarwanda umuriro wizewe kandi dukeneye uruhare rwa buri wese harimo n’inzego za Leta mu kudushyigikira.

Turiteguye kandi twiyemeje kugera ku ntego no gutanga umusanzu wacu mu iterambere ry’ubukungu igihugu kirangamiye.

Hari imishinga myinshi yo kongera umuriro no kuwukwirakwiza hirya no hino mu gihugu
Umushinga wa Gigawatt Global utanga umuriro ukomoka ku mirasire y'izuba mu Karere ka Rwamagana
Umushinga wa KivuWatt ni umwe mu imaze guteza imbere urwego rw'ingufu mu Rwanda
Umuyobozi Mukuru wa REG, Eng. Ron Weiss

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza