‘RIHA Mobile Wallet’, uburyo bushya buzakoresha telefone mu guhanahana amafaranga

Yanditswe na Mukaneza M.Ange
Kuya 17 Nyakanga 2017 saa 10:01
Yasuwe :
0 0

Mu gihe abantu benshi bari bamaze kumenyera kwishyura no kohererezanya amafaranga bifashishije Mobile Money hakoreshejwe telefone igendanwa, Ikigo Aurasoft cyatangiye umushinga wo kuzana uburyo bushya bwitwa ‘RIHA Mobile Wallet’ buzajya bukoreshwa mu gutanga izi serivisi.

‘RIHA Mobile Wallet’, ni porogaramu ya telefone igendanwa ifasha umuntu kwishyura ibicuruzwa, koherereza mugenzi we amafaranga, gukura no gushyira amafaranga kuri konti ze za banki zitandukanye.

Mu kiganiro na IGIHE, Umuyobozi w’Ikigo Aurasoft, Alain Ndayishimiye, yavuze ko aho RIHA Mobile Wallet itandukaniye n’ubundi buryo busanzwe bwifashishwa ari uko ihuriza hamwe ahantu hose waba ufite amafaranga.

Yagize ati “Ni uburyo bushya bwo kwishyura buhuriza hamwe ahantu hose waba ufite amafaranga, haba muri banki zitandukanye no kuri mobile money. Ikindi ni uko ikoranabuhanga ryacu rituma uko ukoresha RIHA nayo igenda ikumenya, bituma igufasha gucunga amafaranga yawe neza no kumenya aho wabariza izindi serivisi ushobora gukenera.”

RIHA Mobile Wallet ishobora gufasha umuntu kwishyura igicuruzwa mbere, ku buryo ugerayo ntabanze gutegereza ahubwo ahita agihabwa. Atanga urugero nk’umuntu ushaka kujya muri restaurant agasanga ifunguro rye ryamaze gutegurwa.

Nk’uko Ndayishimiye abisobanura RIHA Mobile Wallet yanatekereje ku bacuruzi, aho ibafasha gukusanya amakuru yerekeranye n’abakiliya babagana, bityo n’ibicuruzwa na serivisi zabo zigashyirwaho bigendanye n’ibyo bifuza.

Gukoresha RIHA Mobile Wallet kandi nta kiguzi bisaba umuguzi, keretse igihe akeneye koherereza mugenzi we amafaranga kuri konti iri muri banki itandukanye niyo we asanzwe abitsamo.

Ndayishimiye kandi yavuze ko babanje gutekereza ku bantu bakoresha smartphone, nyuma yo kubona uko RIHA Mobile Wallet abantu bayitabiriye, bazatangira kwiga ku buryo n’abakoresha telefone zisanzwe byabageraho.

Yagize ati “Impamvu twahisemo kuzana ubu buryo bwo kwishyura nuko Leta yacu yashyize imbaraga mu guteza imbere ubukungu butarangwamo ihererekanywa ry’amafaranga mu ntoki. Bizaturinda gutwara amafaranga menshi mu mufuka, binongere umutekano wayo.”

Mu kwishyura no kohererezanya amafaranga, RIHA Mobile Wallet, ikoresha ikoranabuhanga ritandukanye ririmo Bluetooth, Tap&Pay, NFC (Near Field Communication) ikora binyuze mu kwegerezanya ibikoresho by’ikoranabuhanga nka telefone ndetse n’utumashini tuzwi nka POS (Point of sale).

Biteganyijwe ko iyi porogaramu yatangiye gukorwa muri Mutarama 2017, izakoreshwa bwa mbere mu mpera za Kanama 2017.

Imibare ya Banki Nkuru y’Igihugu (BNR) igaragaza ko kugera mu Ukuboza 2016, abagera kuri 3,333, 349 aribo bari bafite konti zo kohererezanya no kwakira amafaranga hakoreshejwe uburyo bwo guhererekanya amafaranga hifashishijwe telefone igendanwa bushamikiye kuri sosiyete eshatu z’itumanaho zirimo MTN, Tigo na Airtel.

Mu 2016, abantu bahererekanyije miliyari 1040 z’amafaranga y’u Rwanda, akaba yaragabanutse ugereranyije na miliyari 1093 Frw zari zahererekanyijwe mu 2015

Ndayishimiye Alain asobanurira bamwe mu bafatanyabikorwa n'abandi bitezweho gukoresha RIHA Mobile Wallet, uburyo ikora n'akamaro kayo
Depite Edouard Bamporiki ni umwe mu bitabiriye umuhango wasobanuriwemo imikorere ya RIHA Mobile Wallet

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza