Rwangombwa asanga ibiciro by’ibiribwa bitazazamuka bikabije mu ntangiriro za 2018

Yanditswe na Evariste Nsengimana
Kuya 2 Mutarama 2018 saa 01:50
Yasuwe :
0 0

Guverineri wa Banki Nkuru y’u Rwanda, John Rwangombwa, yavuze ko nta kigaragaza ko ibiciro by’ibiribwa bizazamuka bidasanzwe mu gihembwe cya mbere cy’umwaka wa 2018, ahubwo bizaguma ku kigero byariho mu mpera z’umwaka ushize.

Ikigo cy’Igihugu cy’Ibarurishamibare, cyatangaje ko ibiciro mu mijyi byiyongereyeho 2,2% mu Ugushyingo 2017 ugereranyije n’igihe nk’icyo mu 2016. Ugereranyije Ugushyingo 2017 na Ukwakira 2017, ibiciro byagabanutseho 1,2%. Mu cyaro ho ibiciro byiyongereyeho 1,0% ugereranyije na Ugushyingo 2016.

Guverineri Rwangombwa yavuze ko impamvu ibiciro byari hejuru mu mpera z’umwaka ushize, byatewe n’umusaruro muke wabonetse nk’uko RBA yabitangaje.

Yagize ati “Twagize umusaruro w’ubuhinzi utari mwiza mu mwaka ushize, bituma mu mpera z’umwaka ibiciro biba biri hejuru cyane.”

Yongeye ati “Uko umwaka wagiye ugenda, ibiribwa byarabonetse ku masoko, ibiciro bijya hasi. Icyo rero wakumva nk’umuturage ni uko mu bintu byose ukeneye kugura, iyo ubiteranirije hamwe, kuzamuka kw’ibiciro, ntabwo bizarenga 3%, ugereranyije n’aho byari biri mu Ukuboza umwaka ushize.”

Minisiteri y’Ubucuruzi n’Inganda, ivuga ko hashyizweho igiciro cy’ibirayi kizakurikizwa mu gihembwe cyose cy’ihinga mu gihugu hose, aho bigomba kuranguzwa amafaranga atari munsi 135Frw ku muhinzi, bikagurishwa ku isoko atarenze 22oFrw bitewe n’ubwoko bwabyo.

Minisitiri w’Ubucuruzi n’Inganda, Vincent Munyeshyaka, avuga ko ibyo bigamije guca akajagari mu bucuruzi bw’ibirayi kandi ko bizagabanya ihindagurika ry’ibiciro rya hato na hato.

Yagize ati “Ibi biciro twemeje, bizakoreshwa mu gihembwe cy’ihinga cyose, iki turimo kurangiza, kuko bigomba kuzajya bishyirwaho buri gihembwe cy’ihinga kandi bigakoreshwa mu gihugu hose.”

Guverineri wa Banki Nkuru y’u Rwanda, John Rwangombwa, yavuze ko nta kigaragaza ko ibiciro by’ibiribwa bizazamuka bidasanzwe mu gihembwe cya mbere cy’umwaka wa 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza