U Buhinde bwakirije yombi ingendo za RwandAir zijya i Mumbai

Yanditswe na Mathias Hitimana
Kuya 11 Mutarama 2017 saa 10:11
Yasuwe : XX
0

Ubuhahirane bw’u Rwanda n’u Buhinde bugiye koroha, hagiye gutangizwa ingendo z’indege ihuza ibihugu byombi. Mu ruzinduko rw’akazi Perezida Kagame yagiriye mu Buhinde, kuva tariki ya 9 kugeza 11 Mutarama 2017, hanavuyemo gutangaza ko hazafungurwa urugendo rw’indege ya RwandAir izajya iva i Kigali yerekeza Mumbai.

Mu itangazo rihuriweho ry’ibihugu byombi, riragaragaza ko n’u Buhinde bwakiranye ibyishimo iyi nkuru. Riragira riti “ U Buhinde bwakiriye gahunda y’urugendo rudahagarara rw’indege ya Rwandair iva i Kigali yerekeza Mumbai.”

Uretse ibyo, riranavuga ko impande zombi, u Rwanda n’u Buhinde, zizakomeza kugirana ibiganiro ku ikurwaho rya Visa ku Badipolomate n’abayobozi babyo.

Mu itangira ry’inama ya munani yiga ku ishoramari izwi nka "Vibrant Gujarat Summit", kuwa 10 Mutarama 2017, Perezida Kagame mu ijambo rye yanahamagariye abashoramari b’Abahinde kuza gukorera mu Rwanda, ababwira ko u Rwanda rwiteguye kubakira.

Yagize ati “Dushingiye ku muvuduko wihuta w’Isi ya none, dufite amahirwe yo kongera ingano y’ibyo Afurika yohereza mu Buhinde, bikava kuri peteroli n’amabuye y’agaciro gusa. Twiteguye kugirana ibiganiro ku ishoramari. Turateganya kongera ibikorwa hagati yacu n’u Buhinde harimo no gutangiza mu mezi make ari imbere ingendo z’indege za Rwandair zizerekeza mu mujyi wa Mumbai. Umuco w’u Buhinde w’ishoramari rihamye uhuye n’intego zacu ndetse n’amahirwe y’ishoramari ari mu gihugu cyacu. Dufite impamvu yo kugera ku ntego zacu kandi turi hano kugira ngo bigerweho.”

RwandAir iherutse kugura indege nini, ziyiha gukora ingendo ndende idahagaze. Ibi byanabaye inkuru ikomeye mu mwaka dusoje wa 2016.

Ibyo kwerekeza Mumbai mu Buhinde, Umuyobozi wa RwandAir, John Mirenge, yabitangaje acyakira indege ya Airbus 330-300, yiswe “Umurage “. Yashimangiraga ko iyi ndege yaguzwe akayabo ka miliyoni 280 z’amadolari, izifashishwa mu kwerekeza mu bice bitandukanye by’isi.

Yagize ati “Mu 2017 turashaka kujya muri Amerika, New York, i Londres mu Bwongereza, Mumbai mu Buhinde, ariko muri Afurika ubwaho tuzajya Harare muri Zimbabwe, Lilongwe muri Malawi, Conakry, Bamako muri Afurika y’Uburengerazuba, tuzajya nk’ahantu hatandatu cyangwa harindwi muri Afurika.”

Ifungurwa ry’ingendo za RwandAir mu Buhinde, zanaganiriweho na Minisitiri ushinzwe indege za Gisivili mu Buhinde na Ambasaderi w’u Rwanda mu Buhinde, Ernest Rwamucyo.

Umugenzi werekezaga i Mumbai byamutwara igihe aturutse i Kigali, kuko yabanzaga guhagarara ku kibuga cy’indege cya Entebbe muri Uganda, i Nairobi muri Kenya n’i Addis Ababa muri Ethiopia mbere yo kugera ku mugabane wa Aziya.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza