U Bwongereza bwahaye u Rwanda inkunga ya miliyari 136Frw izafasha mu bikorwa by’iterambere

Yanditswe na Jean Pierre Tuyisenge
Kuya 9 Nyakanga 2017 saa 08:53
Yasuwe :
0 0

Leta y’u Rwanda n’iy’u Bwongereza bubinyujije mu kigega cy’ishami ry’iterambere mpuzamahanga, DFID byasinyanye amasezerano ya miliyari 136 z’amafaranga y’u Rwanda, azafasha mu bikorwa by’iterambere bitandukanye mu myaka ibiri y’ingengo y’imari.

Ni amasezerano y’ubufatanye mu iterambere arimo ibice bibiri, birimo aya mbere ya miliyoni 64 z’ama pound angana na miliyari 69Frw azashyirwa ku mwaka w’ingengo y’imari 2017/2018 n’zindi miliyoni 62 £ angana na miliyari 67Frw azakoreshwa mu mwaka w’ingengo y’imari 2018/2019 mu bikorwa bitandukanye by’iterambere.

Minisitiri w’Imari n’Igenanimigambi, Amb.Claver Gatete, yavuze ko bihaye u Rwanda kumenya rudashidikanya umubare w’amafaranga ruzaba rufite mu myaka ibiri aturutse mu Bwongereza kandi azanafasha mu bikorwa by’iterambere bitandukanye.

Yagize ati “ Aya masezerano ni ashimangira ubufatanye n’umubano mwiza dufitanye n’u Bwongereza kandi wahereye igihe kirekire cyane, twakoranye kera kuko ni bo batanga amafaranga menshi ugereranyije n’ibindi bihugu akaba ari yo mpamvu nk’ubu twagiranye amasezerano adufasha kugira ngo mu myaka ibiri iri imbere kugeza muri Werurwe 2019, nibura tugaragaze umubano wacu uko uzaba umeze n’ubufatanye n’ubutwererane uko buzaba buhagaze.”

Yongeyeho ati “ Kuri ibi rero bemeye kugira ngo bafashe u Rwanda inkunga ya miliyoni 64 z’ama- pound zingana hafi na miliyari 69Frw bigaragaza neza nibura amafaranga tuzabona avuye mu Bwongereza ajya mu bikorwa bitandukanye mu myaka ibiri iri imbere.”

Umuyobozi wa DFID mu Rwanda, Sally Waples, yavuze ko u Bwongereza bwiteguye gukomeza gukora na Guverinoma y’u Rwanda mu mishinga itandukanye y’iterambere.

Yagize ati“Mu izina rya guverinoma y’u Bwongereza nishimiye gusinyana aya masezerano na Giverinoma y’u Rwanda; nk’uko minisitiri yabivuze u Rwanda n’u Bwongereza bigirana umubano. U Rwanda ni igihugu cyashyize imbere kugabanya ubukene no gukomeza urugamba rw’iterambere, u Bwongereza bwiyemeje kubigiramo uruhare kandi tuzakomeza gukora kugira ngo ubwo bufatanye bukomeze gushyinga imizi.”

Leta y’u Bwongereza ibinyujije muri DFID isanzwe itera inkunga u Rwanda mu nzego nyinshi zitandukanye, zirimo uburezi, ubuhinzi no gufasha abatishoboye ariko bakaba bafite n’ubundi buryo bafasha mu kubaka ubushobozi bwo gucunga amafaranga n’ibindi.

Minisitiri w'Imari n'Igenamigambi, Amb. Claver Gatete n'Uhagarariye ikigega DFID mu Rwanda, Sally Waples bashyira umukono ku masezerano
Minisitiri w’Imari n’Igenamigambi, Amb. Claver Gatete n’Uhagarariye ikigega DFID mu Rwanda, Sally Waples bahererekanya amasezerano
Minisitiri w'Imari n'Igenamigambi, Amb. Claver Gatete
Umuyobozi wa DFID mu Rwanda Sally Waples
Ambasaderi w'u Bwongereza mu Rwanda, William Gelling

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza