U Rwanda rugiye gushyiraho Ikigo Mpuzamahanga gishinzwe ibikorwa by’ubucuruzi n’imari

Yanditswe na Mukaneza M.Ange
Kuya 9 Ukuboza 2017 saa 06:22
Yasuwe :
0 0

Leta y’u Rwanda igiye gushyiraho Ikigo mpuzamahanga kizajya gifasha ibigo bitanga serivisi z’imari ku rwego mpuzamahanga n’akarere kugenzura ibikorwa byabyo.

Ishyirwaho ry’Ikigo Mpuzamahanga cy’i Kigali gishinzwe Ibikorwa by’Ubucuruzi n’Imari, KIFC (Kigali International Financial Center), ryemejwe mu nama y’Abaminisitiri yateranye ku itariki ya 5 Ukuboza 2017 iyobowe na Pereza Paul Kagame.

Iki kigo kizaba ari igicumbi cy’ibigo birimo amabanki, amasoko y’imari n’imigabane, ibigo bitanga ingwate n’inguzanyi, kizatuma u Rwanda rujya ku rwego rwo gucunga imari y’abandi.

Mu kiganiro n’Ikinyamakuru PanorActu, Umuyobozi Mukuru w’Ikigo cy’Isoko ry’Imari n’Imigabane, RSE, Célestin Rwabukumba yavuze ko u Rwanda rukomeje gukora ibishoboka byose ngo rwinjire mu ruhando mpuzamahanga, ikigo KIFC kikazashimangira ibimaze kugerwaho mu koroshya ubucuruzi, ishoramari no kongera ibikorwa ku isoko ry’imari.

Ati” Ibi biragaragaza ko u Rwanda ruzaba ruteye indi ntambwe mu kwinjira mu bihugu bikomeye mu bijyanye n’imari. Dufite ibikenewe byose ngo tubashe gucunga amafaranga y’abandi. Dufite umutekano ndetse abantu badufitiye icyizere.”

Uretse kuba kandi iki kigo kizagira uruhare mu kuzamura umusaruro mbumbe w’igihugu, GDP, kizatuma u Rwanda rubasha gucunga konti za banki ziri mu bindi bihugu, bityo abashoramari bitabire kuza kubitsa amafaranga yabo mu Rwanda, kabone nubwo ibikorwa byabo byaba biri ahandi.

Ibi bisobanuye ko u Rwanda ruzajya rugira inyungu runaka ruca uwo ari wese uzajya aba yazanye amafaranga, ikazajya ishyirwa ku ijanisha riri ku kigero cyumvikanyweho hagati y’impande zombi. Ubusanzwe inyungu ikunze kuba iri hagati ya 1-2%.

Rwabukumba ati “ Iryo janisha ry’amafaranga yashyizwe muri banki riguma mu gihugu, ibi kandi bizagira uruhare mu kongera akazi ku batanga serivisi z’imari dore ko buri mwaka abatari bake barangiza kaminuza.”

Umuco wo gushyiraho ibigo bishinzwe gucunga imari z’abandi watangiye mu kinyejana cya 11, mu bifite amateka akomeye harimo icya Amsterdam, Londres, Paris, New York na Tokyo.

Umuyobozi Mukuru w’Ikigo cy’Isoko ry'Imari n’Imigabane, Célestin Rwabukumba

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza