Kwamamaza

U Rwanda rwahawe impano ya miliyari 17 zizafasha gukurikirana neza umutungo w’igihugu

Yanditswe kuya 18-11-2016 saa 11:47' na Jean Louis Uwishyaka


U Rwanda n’Umuryango w’Ibihugu by’Ubumwe bw’u Burayi (EU) bashyize umukono ku masezerano y’impano ya miliyoni 20 z’amayero angana na miliyari 17.4 z’amanyarwanda, azafasha inzego zitandukanye zirebwa cyane n’ubukungu bw’igihugu mu gukora akazi kazo neza cyane mu gukurikirana ikoreshwa ry’umutungo wa leta.

Aya masezerano yashyizweho umukono kuri uyu wa Gatanu tariki 18 Ugushyingo 2016, hagati ya Minisitiri w’Imari n’Igenamigambi, Ambasaderi Claver Gatete na Michael Ryan, Ambasaderi w’uyu muryango mu Rwanda.

Iyi nkunga ikubiye mu yindi ingana na miliyoni 460 z’amayero uyu muryango wahaye u Rwanda bigashyirwaho umukono muri Nzeri 2014, igamije gufasha inzego za leta zitandukanye.

Ambasaderi Claver Gatete yavuze ko nk’u Rwanda bishimiye inkunga uyu muryango wabahaye, iza yiyongera ku bindi bikorwa usanzwe uteramo inkunga igihugu.

Ashimangira ko iyi nkunga uyu muryango uhaye u Rwanda izakoreshwa mu gukurikirana uko amafaranga ya leta akoreshwa hirya no hino mu nzego zinyuranye aba yashyizwemo.

Ati “Uyu munsi twasinyanye amasezerano y’amafaranga miliyoni 20 z’amayero azafasha akazi kajyanye n’uko dukurikirana uburyo amafaranga ya leta akoreshwa mu nzego zose. Ayo mafaranga yakoreshwa na Minisiteri y’Imari n’Igenamigambi kugira ngo dukurikirane, dufashe inzego zose za leta. Ni amafaranga ajya gufasha Umugenzuzi mukuru w’imari ya leta (Auditor General officer) mu kazi ke ko kugenzura uko amafaranga agenda akoreshwa[…] binafasha n’ikigo cy’Imisoro n’amahoro mu kazi kacyo gasanzwe ko kugira ngo bakusanye imisoro.”

Ambasaderi Gatete avuga ko aya mafaranga y’impano azafasha izo nzego gutuma akazi zikora kihuta kurushaho ari nako kanozwa neza.

Ambasaderi w’Umuryango w’Ibihugu by’Ubumwe bw’u Burayi mu Rwanda, Michael Ryan, avuga ko impamvu bahaye iyi nkunga u Rwanda ari uko rufite inzego zikora neza kandi rukaba runakoresha neza inkunga uyu muryango urugenera.

Ati “Twizera ko iyo umutungo w’igihugu ukoreshejwe neza biteza imbere abaturage, umutungo w’igihugu ni amafaranga y’abaturage kandi agomba gukoreshwa neza. Nka EU dufasha inzego zitandukanye nk’Ikigo cy’Igihugu cy’Imisoro n’Amahoro, Ikigo cy’Ibarurishamibare n’Ubugenzuzi Bukuru bw’Imari ya leta kuko tubafata nk’inkingi ya mwamba mu ikoreshwa neza ry’umutungo w’iki gihugu.”

Yakomeje agira ati “U Rwanda rufite gahunda nziza zitandukanye kandi nk’uko nabivuze, u Rwanda ni cyo gihugu cya mbere mu byo dutera inkunga muri Afurika duha inkunga nini mu ngengo y’imari bitewe n’uko inzego zo muri iki gihugu zikora neza cyane. Turi hano kubera ko inzego zitandukanye zikora neza kandi tuzakomeza kubikora.”

Abayobozi batandukanye b’ibigo bya Leta bizagerwaho n’iyi nkunga bavuze ko bayishimiye bitewe n’uko izabafasha gukora akazi kabo neza.

Umuryango w’Ibihugu by’Ubumwe bw’u Burayi usanzwe ufasha u Rwanda mu nzego zinyuranye zirimo iz’ingufu, ubuhinzi n’izindi.

Aya mafaranga ngo azakoreshwa mu bikorwa byo gukurikirana ikoreshwa ry'umutungo wa leta

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved