“Ku isi ubukungu bwihariwe n’abakire gusa bishobora gutuma abakene baba abarakare”

Yanditswe na Kanamugire Emmanuel
Kuya 14 Ugushyingo 2016 saa 12:04
Yasuwe : XX
0

Impuguke mu bukungu, Teddy Kaberuka, avuga ko ikinyuranyo gikabije cy’ubukungu hagati y’abakire n’abakene, gishobora gutuma abakene baba abarakare bikaba byagira ingaruka ku bukungu n’umutekano w’igihugu.

Mu kiganiro IGIHE yagiranye na Teddy Kaberuka , yavuze ko mu bihugu bikiri mu nzira y’amajyambere hari ubwo ubukungu buba bwihariwe n’abantu bamwe, aho usanga hari abakire cyane, abakene benshi, abo mu cyiciro cyo hagati (classe moyenne) bakaba bake.

Yatanze urugero ku mitwe y’iterabwoba n’abakora imyigaragambyo bagaragaza ko bigumuye ku butegetsi mu bihugu bimwe na bimwe bya Afurika ko abenshi babiterwa n’ubukene no kutagira ikindi bakora.

Yagize ati “Iyo igihugu gifite abakene benshi aba ari umutwaro kubera ko badateza imbere igihugu, ahubwo ni cyo kiba gifite inshingano zo kubateza imbere. Usanga Leta ifite inshingano zo kubatunga kandi ubundi abaturage ni bo batunga Leta."

“Kugira abakene cyane igihe kirekire ni ikibazo gikomeye ku gihugu, haba ku mutekano ndetse no kuri bariya bafite ubukungu bwinshi, kubera ko abantu badafite icyo bakora ngo babone ibibatunga bashobora kuba abarakare, abanyarugomo, abajura, bakigaragambya ndetse bashobora no kujya mu mitwe y’iterabwoba.”

Ubwo yitabiraga inama ya ‘World Economic Forum in Africa’ yabereye i Kigali, Umuyobozi Nshingwabikorwa wa Oxfam, Winnie Byanyima, yatanze ikiganiro ku busumbane mu bushobozi, bukomeje gutera icyuho gikomeye hagati y’abakire n’abakene muri Afurika.

Yagize ati “Aka karere ni ko gafite ubusumbane bukomeye hagati y’abakire n’abakene, hamwe na Amerika y’Epfo kandi ubu busumbane bukomeje kuzamuka.Afurika ifite ibihugu bitandatu mu 10 bifite ubusumbane bukabije ku Isi. Igihugu gifite ubusumbane bukabije ku Isi kiri muri Afurika! Ni Afurika y’Epfo, kandi ubwo busumbane buriyongera.”

Icyo gihe Byanyima yasobanuye ko za guverinoma n’abikorera basabwa kurwanya ubukene n’akarengane kuko bituma ab’ubushobozi buke baguma mu bukene, ntibinatange amahirwe yo kubuvanamo abandi.

Kuri Afurika, ngo hari ikibazo gikomeye cy’ibigo bikomeye bikoresha uburyo bwo kujyana amafaranga mu mahanga ntasoreshwe , ku buryo usanga ibigo byunguka ariko abaturage b’ibihugu bakaguma mu bukene bw’akarande.

Raporo yasohowe n’Ikigega Mpuzamahanga cy’Imari (IMF) igaragaza ko ubukungu bw’ibihugu byo munsi y’ubutayu bwa Sahara bwazamutse. Gusa IMF ivuga ko kuba ku kibazo cy’ubusumbane hagati y’abakire n’abakene nta cyahindutse mu myaka 15 ishize ngo bikiri imbogamizi ku izamuka ry’ubukungu bw’ibi bihugu.

Teddy Kaberuka, impuguke mu bukungu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE