Uko Abashinwa batangiye kwigarurira ibikorwa bikomeye mu Rwanda kuva 1972

Yanditswe na Cyprien Niyomwungeri
Kuya 7 Werurwe 2017 saa 03:50
Yasuwe :
0 0

Mu myaka 46 ishize u Rwanda n’u Bushinwa byatangiye umubano udasanzwe wibarutse imishinga y’ubucuruzi, ubuzima, uburezi, ubwubatsi bw’imihanda n’inyubako zigezweho mu rwa Gasabo, ndetse kubera icyizere utanga Abanyarwanda bawitezemo n’ibindi birangajwe imbere n’umuhanda wa gari ya moshi uzaruhuza n’abaturanyi.

Kuwa 12 Ugushyingo 1971 wari umunsi w’ibirori, ubwo Abanyarwanda batangiraga umubano w’ubufatanye n’Abashinwa, himikwa ubuhahirane no guteza imbere ishoramari n’iki gihugu kimaze imyaka amagana kiri mu bya mbere ku Isi.

Kuva icyo gihe u Bushinwa bwatangiye gufasha u Rwanda mu mishinga y’iterambere yiganjemo ubuhinzi n’ubwubatsi bw’ibikorwa remezo, aho ku nshuro ya mbere ibishanga byo mu rw’imisozi igihumbi byatangiye guhingwamo umuceri n’imihanda ya kaburimbo irubakwa.

Inyandiko igaragaza ibikorwa by’u Bushinwa muri Afurika yo munsi y’ubutayu bwa Sahara, yashyizwe ahagaragara n’ibiro bishinzwe iperereza bya Leta Zunze Ubumwe za Amerika, yerekana ko mu 1972 iki gihugu gituwe cyane ku Isi cyatanze miliyoni 175 z’amadolari y’imfashanyo mu bihugu bitandatu birimo n’u Rwanda, aho akenshi zakoreshwaga mu bwubatsi n’ubuhinzi.

Amasezerano u Rwanda rwasinyanye n’u Bushinwa icyo gihe muri Gicurasi, agaragaza ko rwahawe miliyoni 22 z’amadolari ya Amerika yakoreshejwe mu kubaka imihanda ya kaburimbo n’uruganda rwa sima rwa Bugarama muri Rusizi (CIMERWA).

Kuva mu 2000 kugeza 2011 hari imishinga 56 u Bushinwa bwateyemo inkunga u Rwanda. Iyo mishinga yose yari ifite agaciro ka miliyoni 160 z’amadolari ya Amerika. Ubwo hizihizwaga imyaka 40 y’umubano w’ibihugu byombi, u Bushinwa bwari bumaze guha u Rwanda miliyoni 170 z’amadolari.

Mu rwego rw’ubuzima, u Bushinwa bwubatse ibitaro bibiri byo ku rwego rw’akarere, ibya Masaka na Kibungo. Mu burezi, uretse gutanga buruse ku banyeshuri b’Abanyarwanda, Abashinwa bubatse amashuri abiri, rimwe riri mu karere ka Gatsibo irindi mu ka Rulindo ryigwamo n’abakobwa gusa.

Bigaruriye ubwubatsi bw’inyubako zigezweho

Ibigo by’ubwubatsi by’Abashinwa nka RXB, CCECC, BCEG, Top International Engineering Corporation n’ibindi, bimaze kubaka izina mu Rwanda kuko akenshi imiturirwa myinshi ipfupfunuka muri Kigali nibo bayubaka.

Imishinga nka Kigali Marriot Hotel iherereye mu karere ka Nyarugenge yubatswe n’ikompanyi y’ishoramari y’Abashinwa iba muri Hong Kong ifatanyije n’Abanyarwanda.

Mu 2009, ikigo cy’ubwubatsi cy’Abashinwa Beijing Construction Engineering Group (BCEG) cyatsindiye isoko ryo kubaka Kigali Convention Centre, nubwo kitayirangije, inyubako ikoreramo Minisiteri y’Ububanyi n’Amahanga, imihanda irimo uwerekeza i Burasirazuba na byo ni bo babyubatse.

Urugendo rurakomeje

Uruhare rw’u Bushinwa mu iterambere ry’ibikorwaremezo mu Rwanda ruracyakomeje, kuko binyuze mu nkunga ya miliyari 60 z’amadolari bwemereye Afurika, hatangiye kwagurwa imihanda ihuza Umujyi wa Kigali ingana na km 54. Iyi mirimo irimo gukorwa na Sosiyete y’Abashinwa ikora imihanda n’ibiraro (China Road Bridge Corporation, CRBC).

Minisiterial Complex, inyubako yatangiye kubakwa ku Kimihurura, izakoreramo Ibiro bya Minisitiri w'Intebe n'izindi minisiteri

Uyu wiyongera kandi ku mushinga rurangiranwa, Kigali Innovation City, uzasiga u Rwanda ari igicumbi cy’intiti yaba mu ikoranabuhanga no mu bumenyi, cyane cyane hagendewe ku bikenewe ku isoko muri iki gihe.

Hari umushinga wo kwagura ibitaro bya Masaka n’ibiro bigezweho bya guverinoma bizakoreramo Minisitiri w’Intebe n’izindi Minisiteri enye. Uyu mushinga uzatwara akayabo ka miliyoni 37 z’amadolari y’Amerika ni ukuvuga asaga miliyari 29 z’amanyarwanda, waratangiye.

Abanyarwanda n’abaturanyi babo bo mu Muryango wa Afurika y’Iburasirazuba, EAC, bahanze amaso umushinga wa gari ya moshi. Muri Gicurasi 2014, abakuru b’ibihugu bya EAC bemeranyijwe na Minisitiri w’Intebe w’u Bushinwa, Li Keqiang, mu nama yabereye i Nairobi, ko igihugu cye kizatera inkunga ingana na miliyari $3.8 intangiriro z’uwo mushinga.

Muri Nyakanga umwaka ushize Guverinoma ya Tanzania, yahawe inguzanyo ya miliyari $7.6 na Exim Bank, igenewe kubaka uyu muhanda uzayihuza n’abaturanyi barimo u Rwanda na Repubulika Iharanira Demokarasi ya Congo.

U Bushinwa muri Afurika

Umubano w’u Bushinwa na Afurika watangiye bigaragara mu ntangiriro z’ikinyejana cya 20 ubwo bwavaga mu ntambara maze bukayoborwa na Mao Zedong. Ibikorwa by’u Bushinwa muri Afurika byari bike cyane kugeza mu mpera z’icyo kinyejana.

Guhera mu myaka ya 1990, ubucuruzi hagati y’u Bushinwa na Afurika bwikubye inshuro zirindwi bituma kuri ubu iki gihugu ari cyo kiyoboye ubucuruzi bukorerwa hagati yacyo na Afurika.

Abanyafurika barenga ibihumbi 200 baba mu Bushinwa n’Abashinwa barenga miliyoni bakaba batuye muri Afurika.

Mu 2015 u Bushinwa bwemereye Afurika inguzanyo ya miliyari 60 z’amadolari mu gihe cy’imyaka itatu, igice kingana na miliyari eshanu kikaba kizishyurwa nta nyungu.

Hagati ya 2000 na 2011, u Bushinwa bwemeye gushyigikira imishinga isaga 1700 y’ubwubatsi butandukanye mu bihugu 50 byo muri Afurika, yose ifite agaciro kagera kuri miliyari $75.

Abahanga bavuga ko kuba u Bushinwa bukomeje kwigarurira imishinga y’ubwubatsi muri Afurika, ari uko bubona amahirwe akomeye y’ishoramari mu mihanda ya gari ya moshi, ndetse bikabaha isoko rikomeye ry’ibyuma bakora mu nganda zabo.

Ibikorwa byo kubaka iyi nzu biri mu mishinga u Bushinwa bwateyemo u Rwanda inkunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza