Uko ikijumba cyahinduye ubuzima bwa Dusabe Noeline akaba rwiyemezamirimo w’icyitegererezo

Yanditswe na Hakizimana Jean Paul
Kuya 2 Gicurasi 2019 saa 11:28
Yasuwe :
0 0

Ntibisanzwe kubona umwana w’umukobwa w’imyaka 25, ufite uruganda rwamuteje imbere ndetse akaba afite n’abandi yahaye akazi batunze imiryango, byose akabigeraho ahereye ku busa bw’amafaranga ariko bugaragiwe n’ibitekerezo bityaye.

Ibi ariko si umugani cyangwa ibitekerezo nka bimwe bya Ruganzu cyangwa Ngunda, kuko Dusabe Noeline, wo mu Murenge wa Kiramuruzi, Akarere ka Gatsibo yabigezeho, ubu akaba abarirwa muri ba rwiyemezamirimo b’icyitegererezo.

Dusabe ni rwiyemezamirimo ukomeye ufite uruganda rukora ibisuguti mu bijumba, akaba yaratanze akazi ku bakozi 10.

Mu buhamya yatanze kuri uyu wa Kane mu Karere ka Nyagatare ubwo hizihizwaga umunsi mpuzamahanga w’umurimo, Dusabe yavuze ko ‘buri kazi kose wagahaye agaciro ukakitaho kagutunga ndetse kakakugeza ku rwego wifuza’.

Akirangiza kwiga amashuri yisumbuye, Dusabe yashakishije akazi arakabura yiyemeza kubyaza umusaruro ibijumba kuko ari byo iwabo bakundaga guhinga.

Ati “Ubwo narangizaga kwiga nashakishije akazi ahantu henshi ndakabura, nsubije amaso inyuma nsanga mu rugo ni abahinzi ariko nareba uburyo bahingamo nkasanga ntabwo bwatuma umuntu atera imbere, niko gushakisha uburyo ibyo bahinga nabibyazamo umusaruro.”

“Nahise nshaka inzu ku muhanda mfata ibijumba bahingaga ntangira kujya mbitekamo ifiriti nkabicuruzanya n’icyayi. Ikilo cy’ibijumba nakiguraga amafaranga 100 buri kijumba nkagisaturamo ibisate bibiri kimwe nkakigurisha 100 Frw”.

Dusabe avuga ko abakiriya bamugannye ari benshi bakabikunda cyane bikamuha inyungu y’ibihumbi 100 Frw, ari byo yahereyeho atangira gushakisha ubundi buryo yabibyazamo umusaruro wisumbuyeho.

Iki gitekerezo cyatumye ashaka uburyo yabonamo amahugurwa ajyanye no gukora ibisuguti mu bijumba, aza kugira n’amahirwe abona aho abyihugurira atangira kuzikora nubwo igishoro yarafite cyari gike.

Igishoro nticyamubereye imbogamizi ikomeye kuko yagannye Urwego Opportunity Bank, bakamuha inguzanyo yongera amafaranga yari afite agatangira gukora ibisuguti.

Ikigega BDF cyatumye akabya inzozi

Dusabe avuga ko ubwo yatangiraga gukora ibisuguti bitamworoheye bitewe nuko yarafite igishoro gike. Aha niho yaje kumva amakuru ko ikigega BDF gifasha abagore n’urubyiruko kubona ingwate ku nguzanyo, arakigana yerekana umushinga we.

Ati “Narababajije nti ko mufasha urubyiruko n’abagore nanjye nkaba ndiwe ntacyo mwamfasha?. Hahise haza gahunda yo gufasha abantu bakora ibintu bikomoka ku buhinzi biciye muri BDF, baza kunsura nubwo nakoreraga ahantu hagayitse.”

“Nababwiye uko natangiye n’icyerekezo mfite baragenda hashize iminsi mike barampamagara bampa miliyoni 10 Frw, kugira ngo nagure ibikorwa byanjye. Numvise ngiye kugera ku ntego zanjye”.

Muri aya mafaranga, Dusabe yavuguruyemo inzu yakoreragamo agura n’ibindi bikoresho byinshi yagura imikorere.

Ati “Ubu uruganda rwanjye rumeze neza nabashije guha akazi abandi bantu 10 ndetse tunagura imikorere yacu.”

Umwaka ushize Minisiteri y’abakozi ba leta n’umurimo yamuhaye igihembo cy’ibihumbi 800 Frw nk’umwe muri ba rwiyemezamirimo bato bari kuzamuka. Aya mafaranga yayaguze imashini ikamura umutobe w’ibisheke, itanga akazi ku bandi bakozi batatu.

Dusabe afite intego zo kubaka uruganda rukomeye cyane rukora ibisuguti mu bijumba ndetse akagurira ibikorwa bye mu Karere ka Nyagatera, nubwo hari imbogamizi agihura nazo zirimo kubona ibijumba byiza kuko agorwa no kujya kubikura mu turere twakure nka Gicumbi n’ahandi.

Dusabe afite intego zo kubaka uruganda rukomeye cyane rukora ibisuguti mu bijumba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza