Umurenge Sacco Kinyinya uri kwigobotora ibibazo birimo kurindishwa ibibando

Yanditswe na
Kuya 26 Ukuboza 2016 saa 09:28
Yasuwe : XX
0

Mu 2009 leta y’u Rwanda yatangije Koperative yo kuzigama no kugurizanya ‘Umurenge Sacco’ muri gahunda yayo yo kwegereza abaturage ibigo by’imari biciriritse, aho kugeza ubu mu mirenge 416 yose hari iki kigo cy’imari.

Ni gahunda ikomeje gufasha Abanyarwanda kwizigamira no kubona inguzanyo mu buryo bworoshye bakiteza imbere. Ku rundi ruhande ariko, ibi bigo byagiye byibasirwa n’uruhuri rw’ibibazo bitandukanye nk’ubujura, imicungire mibi y’umutungo, ubumenyi buke bw’abakozi, kudakoresha ikoranabuhanga n’umutekano muke w’amafaranga.

Umunyamakuru wa IGIHE yasuye Umurenge Sacco Icyerekezo Kinyinya, wo mu karere ka Gasabo, uherutse kwibwa miliyoni zirenga ebyiri muri Gicurasi uyu mwaka, yerekwa aho ugeze ukemura bimwe mu bibazo byatumye uhura n’iryo sanganya.

Iyo koperative ifite abanyamuryango bagera ku 5545, ikorera mu nzu y’igorofa rimwe yubatswe n’abanyamuryango. Ifite imari shingiro ya miliyoni 75 n’ububiko [depot] bwa miliyoni hafi 500 z’amafaranga y’u Rwanda.

Umucungamutungo wayo Niwemugeni Chantal, yabwiye IGIHE ko nyuma yo kwibwa bafashe ingamba zitandukanye zirimo kugena ingengo y’imari yo kurindisha abarinzi bafite imbunda.

Ati “Mu ngengo y’imari twateganyije ko kuva muri Mutarama 2017 tuzakoresha abarinzi batatu bafite imbunda, uwo ku cyicaro gikuru n’abarinda aho ku bikiriza no kubikuriza himukanwa dufite habiri.”

Umurenge Sacco Icyerekezo Kinyinya, yibwe miliyoni 2 382 000 Frw, abagera ku munani barimo abayirindaga batatu n’abandi bahageze muri iryo joro barimo gukurikiranwa n’ubutabera.

Koperative Umurenge Sacco zakunze kunengwa kudashingana amafaranga zibitse. Niwemugeni avuga ko bibwe bafite ubwishingizi bityo bakaba bafite amahirwe yo kwishyurwa.

Ati “Amafaranga yacu ari mu bwishingizi, byose ni uburyo bwo kunoza umutekano w’amafaranga nicyo gituma abantu batwizera. Impanuka n’ibyago ntibyabura ariko ubu buryo bwo gukumira bwanejeje abanyamuryango.”

Batindiwe n’ikoranabuhanga

Imirenge SACCO myinshi nta koranabuhanga ikoresha bityo bikorohereza abakozi bayo kunyereza amafaranga y’abaturage, kuko ahenshi bagikoresha amafishi mu kwandika amafaranga yasohotse n’ayinjiye.

Niwemugeni asobanura ko kuba badakoresha ikoranabuhanga nta ngaruka birabagiraho, gusa ngo bategereje ko Banki Nkuru y’u Rwanda (BNR) n’ikigo cy’igihugu cy’amakoperative (RCA), byubakira ubushobozi amakoperative yose yo mu gihugu agakoresha ikoranabuhanga.

Ati “Dufite icyizere ko mu ntangiriro z’umwaka utaha Imirenge Sacco yose ishobora kuba ikoresha ikoranabuhanga.”

Iyi Koperative yanashimiwe na Minisiteri y’abakozi ba leta n’umurimo ku ruhare yagize mu guteza imbere umurimo itanga inguzanyo kuri ba rwiyemezamirimo na serivisi inoze. Kugeza ubu abanyamuryango 198 bahawe inguzanyo, abandi 812 bahabwa inyigisho ku mari.

Umwe mu banyamuryango, Munyankuyo Jean Chrisostome wo mu mudugudu wa Kami, Akagari ka Gasharu, Umurenge wa Kinyinya, yagarutse ku buryo Umurenge Sacco Icyerekezo wamufashije kubaka inzu no kugura inka agahindura ubuzima.

Yagize ati “Mfashe inguzanyo inshuro enye nishyura neza, nubatsemo inzu ngura inka, ubu ndanywa amata inzu ndazikodesha, mbese meze neza.”

Umurenge Sacco Icyerekezo ufite inzozi zo kuba banki ikomeye. Niwemugeni avuga ko hari icyizere kuko batangiranye umukozi umwe ubu bakaba bafite 15 kandi barimo umugenzuzi w’imbere mu kigo, izi mbaraga ngo zizatuma bishoboka.

Yongeraho ko uyu mwaka batangiye gahunda yo kwinenga no kureba ibitagenda kugirango babikosore.

Ibi biganiro byabaye kuwa 26 Ukuboza 2016, byagarutse ku ruhare rw’umukozi mu iterambere ry’ikigo, uburyo bwo kunoza imitangire ya serivisi, uburyo bwo kunoza inshingano no gukorera ku ntego, imikorere n’imikoranire n’ibindi.

Inyubako ikoreramo Sacco Icyerekezo Kininya
Abakozi ba Sacco Icyerekezo mu biganiro byo kugena ahazaza ha Koperative
Niwemugeni (ibumoso) avuga ko bifuza kuba banki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza