USA yaburiye bimwe mu bihugu by’Afurika ku mavugurura ya AU aganisha ku kwigira

Yanditswe na Rabbi Malo Umucunguzi
Kuya 8 Gicurasi 2017 saa 11:24
Yasuwe :
0 0

Dr Donald Kaberuka uri mu itsinda rifasha Perezida Kagame gushyira mu bikorwa amavugurura mu Muryango wa Afurika yunze Ubumwe (AU), yavuze ko amahanga yatangiye kugaragaza icyo atekereza ku musoro wa 0.2% ku bitumizwa mu mahanga, ugiye kujya utangwa nk’umusanzu w’ibihugu mu gutera inkunga ibikorwa bya AU.

Kuri iki Cyumweru nibwo habaye inama ku mpinduka muri AU, yayobowe na Perezida Paul Kagame muri Kigali Convention Centre, yitabirwa n’Abaminisitiri b’Ububanyi n’Amahanga na ba Ambasaderi b’ibihugu bya Afurika muri AU.

Dr Kaberuka yavuze ko Leta Zunze Ubumwe za Amerika (USA) zaburiye ibihugu bimwe ku mahame abiri y’Umuryango Mpuzamahanga w’Ubucuruzi (WTO) harimo irizwi nka MFN (Most-favored nation), rigena ko ibihugu bisangiye ubucuruzi biba bigomba guhabwa amahirwe angana.

Yavuze ko mu miryango isanzwe ikoresha ubu buryo bwo gutera inkunga hifashishijwe imisoro, iba igizwe n’ibihugu byafunguriranye amarembo bikorana ubucuruzi (free trade zone), ibintu bitameze gutyo kuri Afurika.

Yagize ati “Afurika yose hamwe ntabwo yafunguriranye amarembo mu bucuruzi, ari byo bifatwa nko kudafata kimwe ibihugu hashingiwe ku bisobanuro bya WTO. Icyo nicyo kibazo nyamukuru.”

Gusa yanagaragaje ko nk’Umuryango w’Ubumwe bw’u Burayi (EU) ushyigikiye cyane uyu mugambi w’ukwigira kwa Afurika, ndetse ‘wemeye gufasha Komisiyo ya AU mu kureba uko byashyirwa mu bikorwa’, cyane ko wo wakoresheje uburyo nk’ubwo imyaka myinshi.

Umuyobozi wa Komisiyo ya AU, Moussa Faki Mahamat, yabwiye itangazamakuru ko Afurika iri mu rugendo rugana ku gufungurirana amarembo mu bucuruzi, nyuma y’uko mu 2013 hemejwe icyerekezo 2063 kireba imyaka 50 iri imbere.

Yagize ati “Intego yacu ni ukugira Afurika ifunguriranye imipaka, iteye imbere, ifite amahoro, harimo n’ibirebana n’ubukungu. Umusoro wa 0.2% ni umwanzuro wafashwe n’inama y’abakuru b’ibihugu hano i Kigali mu mezi icumi ashize, hagamijwe gutera inkunga, bitari ibikorwa gusa ahubwo n’imishinga na porogaramu ya Afurika Yunze Ubumwe.”

Yavuze ko hagiyeho itsinda ry’impuguke riyobowe na Perezida Paul Kagame wahawe gukurikirana izo mpinduka, ndetse AU ishyiraho itsinda rya ba Minisitiri 10 b’imari bakurikirana umunsi ku munsi ibirebana n’ishyirwa mu bikorwa ry’aya masezerenano.

Yagize ati “Ni byo koko ibihugu bimwe byakiriye ubutumwa bwaba ubw’Umuryango Mpuzamahanga w’Ubucuruzi, yaba Leta Zunze Ubumwe za Amerika, ariko ntekereza ko ibi bitagomba kudukoma mu nkokora nk’umugabane kugira ngo tubashe kugera ku kwishyira hamwe, tugire ubwisanzure mu bucuruzi hagati y’ibihugu bya Afurika n’ibindi bice by’Isi, ni ibintu bizadufasha kugera kuri iyo ntego.”

Yavuze ko iyi nama yari igamije guhuza ibitekerezo byatuma intego zose zishoboka, ndetse itsinda riyobowe na Perezida Kagame hamwe n’izindi nzego zihagarariye umuryango, ziteguye kuganira n’abafatanyabikorwa baba Umuryango Mpuzamahanga w’Ubucuruzi cyangwa Leta Zunze Ubumwe za Amerika “mu kubumvisha ishingiro ry’ibikowa byacu.”

Minisitiri w’Ububanyi n’amahanga w’u Rwanda, Louise Mushikiwabo, yavuze ko urugendo Afurika yatangiye rudasubira inyuma, kuko amavugurura ari kuganirwaho yatanzweho umurongo n’abakuru b’ibihugu bigize AU.

Yavuze ko hakiri ikibazo cy’ubucuruzi hagati y’ibihugu bya Afurika, ariko usanga ibibazo bigaragara muri uyu mugabane ntaho utabisanga, byaba ibirebana n’ubukungu, umutekano n’amakimbirane.

Gusa ngo igikomeye kurusha ibindi ni uko Abakuru b’ibihugu bemeje ko uyu mugabane ugiye kwihutisha impinduka nziza binyuze mu gufata ibyemezo bikomeye cyane.

Yagize ati “Nta mpinduka burya ijya yoroha, guhindura ikintu abantu bamenyereye, gukora mu bundi buryo budasanzwe ntabwo ari ibintu byoroshye ariko ibyo twese turabizi.”

“Ibi ni ibihe bigaragaza ko ibyo twakoraga kera twifuza ko bihinduka, kuko ibihe nabyo birahinduka, Isi irahinduka. Ndumva rero ahaba hari amakimbirane cyangwa ukutumvikana, bidashobora kubuza ubwo bucuruzi. Ubucuruzi bw’umugabane wa Afurika aho ducuruza nk’igihugu kimwe byo sinavuga ko tubikozaho imitwe y’intoki kuko haracyari akazi ko gukora, ariko biri hafi.”

Minisitiri Mushikiwabo yavuze ko ibihugu biri kuvuga ijwi rimwe ku mavugurura akenewe muri AU, bigahuriza no kubutumwa bumwe bwo kugaragaza ko impinduka ari ngombwa kandi ikenewe n’ibihugu byose, kugira ngo abaturage ba Afurika barusheho gutera imbere.

Amafaranga y’imisanzu aturuka ku musoro wa 0.2% ku bitumizwa mu mahanga azatangira gushyikirizwa AU muri 2018, uyu muryango utera intambwe yo kudahora ihanze amaso inkunga z’amahanga.

Umuyobozi wa Komisiyo ya AU, Moussa Faki Mahamat (Hagati) ari kumwe Minisitiri w’Ububanyi n’Amahanga w’u Rwanda, Louise Mushikiwabo mu kiganiro n'itangazamakuru
Dr Donald Kaberuka wagize uruhare mu itegurwa ry'amavugurura muri AU

Amafoto: Rwanda Government


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza