Zigama CSS yemeje kwishyurira umwenda uwitabye Imana,kugeza kuri miliyoni 25

Yanditswe na Cyprien Niyomwungeri
Kuya 20 Ukuboza 2016 saa 02:37
Yasuwe : XX
0

Koperative y’abasirikare, abapolisi, abacungagereza n’izindi nzego z’umutekano, Zigama CSS (Zigama Credit and Savings Society), yafashe icyemezo cy’uko umunyamuryango wayo uzajya yitaba Imana izajya imwishyurira umwenda yari afite kugeza kuri miliyoni 25 z’amafaranga y’u Rwanda.

Mu nama y’Inteko Rusange yayobowe na Minisitiri w’Ingabo, Gen. James Kabarebe, Umuyobozi w’Inama y’ubutegetsi, Dr James Ndahiro n’abandi bayobozi bakuru, kuri uyu wa kabiri tariki 20 Ukuboza 2016, hagaragajwe ko mu 2016, Zigama CSS yungutse miliyari zirenga eshanu.

Muri iyi nama abanyamuryango abanyamuryango bamurikiwe ibyagezweho mu mwaka wa 2016, ibiteganywa gukorwa mu mwaka utaha baranabyemeza.

Umuyobozi w’Inama y’Ubutegetsi ya Zigama CSS, Dr.James Ndahiro, yabwiye itangazamakuru ko iyi nama yafashe icyemezo cyo kwishyurira umunyamuryango witabye Imana umwenda yari afite kugera kuri miliyoni 25.

Yagize ati “Twarebye izindi ngorane tugenda duhura na zo dusanga hari abanyamuryango bacu baba barafashe imyenda bakagira ibyago bakitaba Imana ugasanga iyo myenda iremerereye umuryango basize, kandi batari bafite ukuntu biteganyirije birengeje. Niyo mpamvu inama yafashe icyemezo cy’uko umunyamuryango wacu uzajya witaba Imana banki izajya imwishyurira umwenda kugeza kuri miliyoni 25 z’amafaranga y’u Rwanda.”

Yakomeje asobanura ko umunyamuryango uzaba ufite umwenda wa miliyoni 30 akitaba Imana, umuryango we uzajya usabwa gusa kwishyura miliyoni eshanu izindi 25 banki ikazishyura. Bivuze ko ufite ufite izitarengeje 25 azajya yishyurirwa uwo mwenda wose.

Dr. Ndahiro yavuze ko iki ari icyemezo cyo gukomeza gushaka uburyo bwafasha abanyamuryango ba Zigama CSS.

Umuvugizi w’ingabo z’u Rwanda, Lt Col René Ngendahimana, yavuze ko ari icyemezo cyiza cyane kuko kiri mu murongo mugari wa Zigama CSS wo gufasha abanyamuryango mu mibereho myiza yabo, no gutura umutwaro w’umwenda umuryango w’uwitabye Imana uba utangiye kurwana n’ubundi buzima.

Yagize ati “Niba umunyamuryango agize ibyago akitaba Imana yari afite umwenda, aho kugirango umuryango usigaye;umugore, abana baremererwe cyane n’uwo mwenda, iki kigega cy’ubufatanye kizafasha kumugabanyiriza.”

Iki cyemezo kije gikurikira icyo Zigama CSS iherutse gufata cyo kugabanya inyungu ku nguzanyo ikava kuri 15% ikagera kuri 13%. Ni icyemezo cyakiriwe neza ndetse ngo cyanafashije abanyamuryango benshi nubwo hari abagisaba ko inyungu yakomeza kugabanywa ikagera kuri 12%.

Dr.Ndahiro yavuze ko nta gitekerezo cyo kongera kuyigabanya cyangwa kuyizamura gihari , kuko inyigo zitandukanye zakozwe zasanze ko bitashoboka ko muri iki gihe byajya munsi.

Imibare y’agateganyo yerekana ko Zigama CSS izunguka miliyari eshanu na miliyoni zirenga 453 muri uyu mwaka, naho mu utaha ikazunguka esheshatu na miliyoni 354 zirenga z’amafaranga y’u Rwanda.

Mu 2017 Zigama CSS irateganya kuzakoresha ingengo y’imari ya miliyari zirenga 26 zivuye kuri 21 yakoresheje muri uyu mwaka urimo kurangira.

Uhereye ibumoso, Minisitiri w'Ingabo, Gen James Kabarebe, Umuyobozi w’Inama y’Ubutegetsi ya Zigama CSS, Dr James Ndahiro na Minisitiri w'Ubutabera, Johnston Busingye
Abitabiriye Inama y'Inteko rusange ya Zigama CSS
Dr James Ndahiro, Umuyobozi w’Inama y’Ubutegetsi ya Zigama CSS aganira n'itangazamakuru
Umuvugizi w’ingabo z’u Rwanda, Lt Col René Ngendahimana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza