Dar es Salam : Benengango bibasiye Abanyarwanda bacuruza amabuye y’agaciro

Dar es Salam : Benengango bibasiye Abanyarwanda bacuruza amabuye y’agaciro


Yanditswe kuya 2-04-2013 - Saa 11:56' na Emmanuel Kanamugire

Ku cyambu cya Dar es Salam muri Tanzania haravugwa ubujura bwa kontineri z’amabuye y’agaciro zibwe, ibi bikaba byarakururiye Abanyarwanda bohereza amabuye y’agaciro mu bindi bihugu igihombo cya miliyari zikabakaba 13 z’amafaranga y’u Rwanda.

Kubera iyo mpamvu hashyizweho itsinda rishinzwe gukora iperereza kuri ubu bujura muri Gashyantare uyu mwaka, ryasanze uhereye muri Nzeri 2012, haribwe kontineri 11 z’amabuye y’agaciro yiganjemo azwi ku izina rya “Coltan” byakuruye igihombo cya miliyari 12,7.

Nk’uko tubikesha Rwanda Today, Umunyamabanga wa Leta ushinzwe ubucukuzi bw’amabuye y’agaciro, Evode Imena na we yemeje ko izi kontineri 11 zibwe kandi ko kugeza ubu zitarabonerwa irengero.

Iki kibazo cyagaragaye ubwo ibintu bifite agaciro ka miliyoni 10 z’amadolari bya Sosiyeti yitwa Rodinik byibwaga ku cyambu, bigatuma abayobozi b’inzego zishinzwe iperereza n’aba Gasutamo muri Tanzania batabwa muri yombi.

Abacuruzi b’amabuye y’agaciro mu nama yabo ngarukamwaka yo mu cyumweru gishize, batangaje ko ubujura bw’amakontineri buza ku isonga mu bituma koherereza ibicuruzwa hanze bizamo igitotsi bikanadindiza umusaruro.

Bamwe bavuga ko bahisemo gukoresha inzira y’icyambu cya Mombasa bahamya ari yo ifite umutekano nubwo ari ndende.

Kubera iki kibazo byatumye hagati ya Mutarama na Gashyantare uyu mwaka amabuye y’agaciro yoherezwaga hanze agabanuka ku gipimo cya 11.4% n’amafaranga yinjiraga ava kuri miliyoni 22,5 z’amadolari ya Amerika umwaka ushize akagera kuri 19,9.

Hagati aho Guverinoma y’u Rwanda yizeza abashora imari mu bucuruzi bw’amabuye ko igiye kuvugurura uru rwego, kuko na yo ishaka ko nibura mu mwaka wa 2017 agaciro k’ayoherezwa hanze kazaba kageze kuri miliyari 400 z’amadolari ya Amerika.

Ubucukuzi bw’amabuye ni urwego rwa kabiri mu byinjiriza igihugu akayabo k’amadovize nyuma y’ubukerarugendo. Imibare y’IKigo cy’Igihugu Gishinzwe Umutungo Kamere igaragaza ko umwaka ushize uru rwego rwinjije miliyari 98,6 z’amafaranga y’u Rwanda, ariko uyu mwaka azagabanukaho Miliyari 36,2.

N’ubwo bimeze bityo Guverinoma irizeza abashoramari ko hafashwe ingamba ku buryo biteganijwe ko urwego rw’amabuye y’agaciro ruzinjiza Miliyoni 400 z’amadolari ya Amerika mu 2017.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO