MTN yashyizwe mu masosiyete ijana akomeye ku isi

MTN yashyizwe mu masosiyete ijana akomeye ku isi


Yanditswe kuya 23-05-2012 - Saa 14:09' na Fiacre Igihozo

MTN ku munsi w’ejo tariki ya 22 Gicurasi 2012 yashyizwe ku mwanya wa 88 mu masosiyete ijana akomeye kandi akora neza ku isi, aho ibimburiye andi masosiyete nyafurika gushyirwa kuri urwo rutonde.

Milward Brown, ibiro mpuzamahanga bikora ubushakashatsi, bikaba binazobereye mu iyamamazabikorwa riboneye, byatangaje ko MTN ariyo sosiyete ya mbere y’inyafurika ije ku rutonde rwitwa “BrandZ Top 100 Global Brand”, aho iri ku mwanya wa 88 mu ijana.

MTN ikaba yaragiye ihembwa nk’isosiyete ikora neza kenshi mu bihe byatambutse ari na ryo shema rya mbere n’umuhigo ibashije kwesa kuko ari ubwa mbere mu mateka isosiyete y’inyafurika ishyizwe ku rutonde rwa BrandZ.

Urutonde rwa BrandZ ni urutonde ruba ruri mu biroto bya buri sosiyete yose yo ku isi aho rukurikiranirwa hafi nayo kugirango amenye uko ahagaze.

Mu kwezi kwa Werurwe uyu mwaka MTN yari yashyizwe ku mwanya w’188 muri 500 ku rutonde rwa ‘Brand Finance Global 500’, ikaba nabwo yari yo sosiyete ya mbere y’inyafurika irushyizweho kugeza na n’uyu munsi.

Uku kuzamuka mu myanya kwa MTN nk’isosiyete ikora neza, biruzuzanya no kuba ibikorwa byayo bikomeza kwaguka no gukura, aho kugeza ubu ifite abafatabuguzi bagera kuri miliyoni 164,6 mu bihugu 22 ikoreramo muri Afurika ndetse n’ibihugu byo mu burasirazuba bwo hagati.

Mu Rwanda, MTN niyo iyoboye andi makompanyi y’itumanaho kuko kugeza ubu ifite abafatabuguzi bagera hafi kuri miliyoni eshatu.

MTN Group ni ihuriro ry’ubushoramari ryo mu gihugu cya Afurika y’epfo, rikorera ibikorwa byaryo byo gucuruza itumanaho rya telefoni ngendanwa na internet mu isosiyete yitwa MTN.

Kugeza tariki ya 31 Werurwe 2012, MTN yari imaze kugira abafatabuguzi bakabakaba muri miliyoni 170,5 aho ikorera hose harimo Afghanistan, Benin, Botswana, Cameroon, Cote d’Ivoire, Cyprus, Ghana, Guinea Bissau, Repuburika ya Guinea, Iran, Liberia, Nigeria, Republic of Congo (Congo Brazzaville), Rwanda, South Africa, Sudan, Swaziland, Syria, Uganda, Yemen na Zambia.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO