Rwandacash yagabanyije igiciro cyo kohereza no kohererezwa amafaranga mu Rwanda

Rwandacash yagabanyije igiciro cyo kohereza no kohererezwa amafaranga mu Rwanda


Yanditswe kuya 26-12-2012 - Saa 22:45' na Karirima A. Ngarambe

Umuyobozi wa Sosiyete Nyarwanda Rwanda Cash Nsengiyumva Ramadhan aratangaza ko kuri ubu iyi Sosiyeti ari yo ifite igiciro gito ku bohereza amafaranga mu Rwanda no kubayoherezaga mu mahanga bari mu Rwanda.

Ibi Nsengiyumva Ramadhan w’imyaka 34 y’amavuko umaze imyaka 16 mu Bubiligi yabitangaje ubwo yagiranaga ikiganiro n’umunyamakauru wa IGIHE ishami ryo mu Bubiligi.

Yagize ati “Nagize amahirwe igitekerezo cyanjye cyo gushinga iyi Sosiyeti nkigeza kuri Perezida Paul Kagame igihe yasuraga Abanyarwanda batuye mu Bubiligi mu mwaka wa 2010 mu ijambo nahawe imbere y’imbaga yari yaje kumwakira. Nyuma nashimishijwe n’uburyo mu Rwanda bakiriye icyo gitekerezo ku buryo mu kwezi kwa gicurasi 2011 bampaye umwanya kuri televiziyo ndetse na Radio Rwanda, menyekanisha uwo mushinga abantu barawishimira kandi ubu ugeze heza”.

Nsengiyumva asobamura ko Sosiyeti ye hari itandukaniro mu buryo bubiri n’andi masosiyeti yohereza amafaranga mu Rwanda aho yagize ati “Iyo witegereje ugasobanukirwa uzasanga sosiyete zohereza amafaranga, ndavuga izi zifite ibyicaro mu Burayi zikora kimwe, usanga hari amasosiyete manini (master companies), ari yo yemerewe gukora ako kazi mu Burayi, noneho agashaka abo bafatanya mu Rwanda mbese bakorana.”

Akomeza agira ati “Iyo mikorere (structure) yo ubwayo irahenze, kuko bisaba ko kuri buri mafaranga yoherejwe (transaction) bose bunguka yaba ayo masosiyete yaba n’uwo bakorana mu Rwanda.

Icyari gikenewe rero byari ugushaka uburyo twebwe Abanyarwanda twakora ku buryo duca mu nzira zitaduhenze zisimbura izo tumenyereye, ibyo rero Rwandacash yarabishoboye kandi byaduteye n’ishema. Kuko Rwandacash ni Sosiyete Nyarwanda 100%”.

Ikindi Nsengiyumva avuga giteye imbaraga ni uko bagiranye amasezerano ba banki ikomeye yitwa “ING BANK sa/nv” (www.ing.be), kugira ngo amafaranga ajye aba ari ho azajya acishwa, ari na ho ashishikariza Abanyarwanda batuye mu Burayi kuba bafungura amakonti muri iyi banki kugira ngo kogeza amafaranga mu Rwanda biborohere kurushaho.

Irindi tandukaniro rya Rwandacash n’andi masosiyete ni ku mafaranga acibwa uwohereje cyangwa uwakira.

Urugero iyo wohereje mu yandi masosiyete nka Amayero 1.000 baguca amayero 30, na ho Rwandacash inyungu ziva hagati y’amabanki ntibireba umukiliya.

Muri uku kwezi k’Ukuboza, Rwandacash yatanze ubunani kuko kohereza ari ubuntu k’uwohereza atarenze amayero 500 kandi uwo woherereje akayabona mu mayero.

Nsengiyumva ati "Muri Rwanda cash ushaka kohereza Amayero 1.000 mu Rwanda tuguca amayero 45 ariko mu Rwanda tukaguha amayero 1.000 ukivunjishiriza kuri za forex bureau ugakuramo nk’uyu munsi 840.000RWF kuko 1 euro ari 840 RWF.

Na ho mu yandi masosiyete ntibaguha ya ma Euro 1.000 yawe ahubwo barakuvunjira. Barakuvunjira bakaguhera kuri rate yabo interne nk’uyu munsi rate yabo ni 1 euro = 772 RWF ubwo baguha 772.000 RWF kandi bakagombye kuguha 840.000RWF ni ukuvuga ko bagutwaye 68.000 ari yo 840.000RWF -772.000RWF.

Birumvikana ko ayo masosiyete asaba amafaranga inshuro 2, ubwa mbere bakwishyuje 30 Euros (ahwanye na 30€X840= 25.200RWF) mu Bubiligi na ho ubwa kabiri bagukuyeho mu kuvunja 68.000RWF mu Rwanda kuri transfert imwe. Byose hamwe baba bakwishyuje 68.000RWF+25.200= 93.200RWF

Na ho Rwandacash ikwishyuza inshuro imwe gusa 37.800RWF (ahwanye na 45€X840).

Bivuze ko iyo unyuze muri Rwandacash uba wungutse 93.200RWF - 37.800RWF = 55.400RWF. Ni yo mpamvu ababyumvise bose baducaho."

Ramadhan yakomeje akangurira Abanyarwanda kudakomeza guhendwa bakagana Rwandacash.

Mu bihe biri imbere kandi hari gahunda yo gufungura “investment fund” mu Rwanda ni ukuvuga ngo Umunyarwanda cyangwa inshuti y’u Rwanda aho yaba atuye hose ku Isi azashobora kubitsa (épargne) mu Rwanda kandi bakungukirwa .

Kuri ubu iyi Sosiyeti ifite amashami muri Kigali aho kandi hari n’umurongo mugari w’itumanaho ushobora kubona ibindi bisobanuro birambuye ari rwo www.rwandacash.com

Nsengiyumva Ramadhan uyobora “Rwandacash” yohereza ikanakira amafaranga mu Rwanda, umukozi wa kompanyi ikomeye mu Bubiligi yitwa “Delhaize Group”, aho akora mu bijyanye n’icungamari ry’icyo kigo, akaba no mu bagize kandi ishyirahamwe ryo mu Bubiligi ryitwa ATEB (Association des Trésoriers Belges), afite impamyabushobozi ihanitse (Master’s en Finance) yakuye muri ICHEC (Institut Catholique des Hautes Etudes Commerciales, Belgium) kandi akaba afite n’indi yo mu cyiciro cya kabiri cya Kaminuza mu icungamari.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO