2017: Intego yo kuzinjiza miliyoni 400 $ US ziturutse ku mabuye y’agaciro

2017: Intego yo kuzinjiza miliyoni 400 $ US ziturutse ku mabuye y’agaciro


Yanditswe kuya 25-12-2012 - Saa 13:31' na Denys Basile Uwingabiye /Nyamasheke

Ihuriro ry’ubucukuzi bw’amabuye y’agaciro rifite intego yo kongera umusaruro w’amabuye acukurwa kuko ubucukuzi bukurikira ubukerarugendo mu kwinjiriza u Rwanda amadovize menshi.

Mu nama yabereye mu Karere ka Nyamasheke igamije gushyiraho ingamba zo kunoza umurimo wo gucukura amabuye y’agaciro no kongera umusaruro, Umuyobozi w’Ihuriro ry’abacukuzi b’amabuye y’agaciro mu Ntara y’Iburengerazuba, Faida JMV, yavuze ko ubucukuzi buri guhabwa imbaraga kuko bwijiza amadovize menshi mu gihugu. Mu 2011 bwinjije miliyoni 158 z’amadorali ya Amerika, ariko bagashaka ko agera kuri miliyoni 400 mu 2017.

Umuyobozi w’Ihuriro ry’abacukuzi b’amabuye y’agaciro mu Ntara y’Iburengerazuba, Faida JMV

Yakomeje asobanura ko kugira ngo ibyo bizagerweho, hashyizweho Ihuriro ry’abacukuzi b’amabuye y’agaciro, ryatangiye muri Gicurasi 2012 rikagira komite ku nzego zose. No muri urwo rwego hashyizweho iyo komite nk’iyo ku rwego rw’Akarere, hatorwa Musabyimana André.

Izi nzego zishinzwe gushyiraho umurongo wo guhurizamo ibitekerezo hagamijwe kongera umusaruro no kugaragaza umwimerere w’inkomoko y’amabuye y’agaciro. Izi nzego kandi ngo zizafasha no mu kwita ku mibereho y’abakora ubucukuzi, n’imikoranire n’abaturage baturiye aho bukorerwa.

Abahagarariye amasosiyete acukura amabuye y'agaciro muri Nyamasheke

Fayida yavuze kandi ko abacukura bagiye kureka gukoresha amasuka bagakoresha imashini mu kongera umusaruro, no kurengera ibidukikije. Ibyo bikazagerwaho ku bufatanye bw’abakora uyu murimo, inzego za Leta n’abaturage.

Uvuye kuri izo ntego zo kongera umusaruro w’amabuye y’agaciro, hasabwa no kwita ku bidukikije.

Umuyobozi w’Akarere wungirije ushinzwe ubukungu n’iterambere muri Nyamasheke, Bahizi Charles yavuze ko umurimo wo gucukura ushobora kwangiza ibidukikije bityo ukaba ugomba gukorwa neza ukurikije itegeko.

Nk’uko babitangarijwe n’umukozi ushinzwe ibidukikije n’umutungo kamere muri Nyamasheke Iyakaremye Evelyne, ngo ubucukuzi bw’amabuye y’agaciro bugira ingaruka nyinshi ku bidukikije, bityo ikaba ari yo mpamvu hashyirwaho amabwiriza menshi harimo gucukura ari uko ufite inyigo y’isuzumangaruka.

Iyakaremye kandi yabasobanuriye ko bitemewe gucukura mu mashyamba no mu bishanga. Mu rwego rwo kubungabunga umutekano w’abakozi bo mu birombe, hasabwa kubashyira mu bwishingizi.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO