Abashoramari b’i Burasirazuba batuye RDB ibibazo bibakoma mu nkokora mu mishinga yabo

Yanditswe na Jean Pierre Tuyisenge
Kuya 24 Ugushyingo 2017 saa 12:23
Yasuwe :
0 0

Abacuruzi n’abashoramari bo mu Ntara y’Iburasirazuba beretse Ikigo cy’Igihugu gishinzwe iterambere (RDB), zimwe mu mbogamizi bahura nazo zigatuma badakora neza.

RDB yagiranye inama n’abashoramari ku wa 23 Ugushyingo 2017 mu Karere ka Gatsibo, igamije kubereka amahirwe yabashyiriyeho kugira ngo babashe gushora imari yabo no kureba imbogamizi bahura nazo.

Ibibazo bagaragaje byiganjemo kubura amazi n’amashanyarazi bihagije; gusiragira mu gushaka ibyangombwa by’ubutaka cyane cyane ahagewe kubakwa inganda mu turere; kubura inguzanyo z’igihe kirekire mu mabanki.

Nka Uwamwezi Mericiane ufite uruganda rutunganya umutobe wo mu nanasi mu Murenge wa Musheri, Akarere ka Nyagatare,yagize ati “Imbogamizi ni uko nta muriro dufite wakoresha imashini twifashisha, ubundi twajyaga dukoresha izikoresha imirasire y’izuba … iyo nta zuba ibirimo birapfa, kugeza ubu dupfusha ibintu byinshi, ubu iyo tubona nta zuba rihari no gukora ntitwirirwa dukora turabyihorera.”

Umuyobozi Mukuru Wungirije ushinzwe ibikorwa muri RDB, Emmanuel Hategeka, yavuze ko ibibazo bagaragaza byumvikana, bakazakomeza kuganira n’abo bireba bikabonerwa umuti mu buryo burambye.

Yagize ati “Ni byo, ubundi muri ibi biganiro ni nacyo tuba dushaka, iyo tuganira kuri serivisi RDB itanga tuba tugira ngo twumve n’ibibazo biri mu ishoramari no mu mishinga itandukanye kugira ngo dufatanye kubikemura; ni nayo mpamvu ibibazo byose byagaragaye twagerageje kuganira n’inzego bireba bikabonerwa igisubizo vuba, kandi turakomeza kubikurikirana.”

Umuyobozi wungirije w’Urugaga rw’Abikorera mu Ntara y’Iburasirazuba Gasana Charles, yashimye ko RDB imanuka ikaza kureba ibibazo bizitira abashoramari, avuga ko n’ibikirimo bizakemuka.

Yagize ati “Igikorwa RDB yakoze ni cyiza bitewe no kuba bafashe umwanya bakatwereka amahirwe ahari mu Burasirazuba, ibibazo bijyanye n’imihanda, amashanyarazi, ibyangombwa by’ubutaka, n’ibindi twabiganiriyeho kandi turizera ko inzego bireba zose zabyumvise, tuzakomeza gukora ubuvugizi kugira ngo ibyo byose bikemuke.”

RDB ibarura ibigo bigera ku 2143 byanditswe bivuye mu Ntara y’Iburasirazuba mu gihe cy’imyaka itatu (2015-2017); kuva mu 2011-2017 hamaze kubarurwa miliyoni 585.4 z’amadolari yavuye mu mishinga yo muri iyo ntara, yanahanze imirimo isaga 6,507.

Irryo shoramari ryiganje ahanini mu nganda, mu buhinzi, mu bucukuzi no mu gutunganya umusaruro ariko RDB ivuga ko hari n’ahandi abo bashoramari bakwiye kureba nko mu nyubako z’amahoteli, mu burobyi, mu gutunganya umusaruro w’ibitoki n’ibindi.

Abashoramari b’i Burasirazuba mu biganiro na RDB
Umuyobozi Mukuru Wungirije ushinzwe ibikorwa muri RDB, Emmanuel Hategeka
Umuyobozi wungirije w’Urugaga rw’Abikorera mu Ntara y’Iburasirazuba Gasana Charles

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza