Kwamamaza

Abikorera bagiye koroherezwa uburyo bwo kubona inguzanyo

Yanditswe kuya 25-06-2016 saa 14:09' na Mukaneza M.Ange


Ikigega Nyafurika cy’ubufatanye( Africa Solidarity Fund, ASF) cyatangiye gukorana n’amabanki mu rwego rwo gukemura ikibazo abikorera bahura nacyo mu kubona inguzanyo ndetse n’abazihawe ugasanga hari ubwo bananiwe kuzishyura bitewe n’igihe gito bahabwa.

Iyi mikoranire yashyizweho umukono mu nama ya rusange y’iki kigega iri kubera i Kigali, izorohereza abikorera bafite uruhare runini mu kuzamura ubukungu bw’igihugu, kubona inguzanyo mu buryo bworoshye ndetse no kuzishyura neza.

Minisitiri w’imari n’igenamigambi, Amb. Claver Gatete yashimye umusanzu wa ASF mu gufasha abikorera kongererwa igihe cyo kwishyura inguzanyo kuko cyari kikiri ikibazo gikomeye.

Yavuze ko iki kigega u Rwanda rubereye umunyamuryango gifasha abikorera kubona inguzanyo mu buryo bworoshye binyuze mu kubafasha kubona ingwate ndetse kikanagerageza gutanga amafaranga kugira ngo inyungu ku ngwate igabanuke.

Ati " Nkuko inguzanyo hano ziba ari iz’igihe gito, usanga kenshi kuzishyura bigenda bigorana. Aha ngaha rero icyo ikigega gifasha ni ukugira ngo aho kugira ngo igihe kibe gito kiba kirekire. Iki nicyo cyari kibuze mu bijyanye n’inguzanyo, akenshi urayibona ukayibona iguhenze, ukayibona ari igihe gito no kuyishyura bikagorana cyangwa ubundi ukayibura kubera ko wabuze inguzanyo.”

Gatete avuga ko ibi bifasha cyane abikorera bo ku rwego rwo hejuru batari bafite aho bavana ingwate kuko ikindi kigega cyari gihari ari BDF kandi ikaba ifasha abikorera bato n’abaciriritse.

Umuyobozi mukuru wa ASF, Ahmadou Abdoulaye Diallo, yavuze ko impamvu bashyira imbaraga mu gutanga umusanzu mu kongera igihe cyo kwishyura inguzanyo ari uko amabanki menshi aba adafite ubushobozi kandi imishinga myinshi nk’inganda n’ubuhinzi iba ikeneye igihe kirekire.

Abdoulaye Diallo kandi yavuze ko mu Rwanda bamaze gufasha imishinga y’abikorera itandukanye irimo uburezi, ubuhinzi, amahoteli, ingufu n’ibindi.

Ikigega ASF cyasinyanye amasezerano na Banki Nyarwanda Itsura Amajyambere, BRD na Banki ya Kigali aho kizatanga miliyari eshatu z’amanyarwanda y’ingwate n’izindi ebyiri zo kongera igihe cyo kwishyura inguzanyo ku mishinga itandatu.

Ikigega Nyafurika cy’ubufatanye (ASF) cyatangiye mu 1976, gihuriwemo n’ibihugu 14 bivuga ururimi rw’Igifaransa.

Minisitiri w'Imari n'Igenamigambi, Amb. Claver Gatete(ibumoso) mu nama mpuzamahanga ya 7 ya ASF yateraniye i Kigali
Minisitiri w'Imari n'Igenamigambi, Claver Gatete
Umuyobozi w’Ikigega Nyafurika cy’Ubufatanye(ASF) Ahmadou Abdoulaye Diallo
Abahagarariye ibihugu bitandukanye bitabiriye inama ya ASF

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 28 Ugushyingo 2016
Copyright © 2009 -2014 - IGIHE Ltd - All Rights Reserved