AIF yaje ku isonga mu nganda zose, yagaragaje ingamba za 2018

Yanditswe na Mugabo Jean d’Amour
Kuya 30 Mutarama 2018 saa 09:44
Yasuwe :
1 0

Africa Improved Foods (AIF), uruganda ruherutse kwegukana igihembo cy’indashyikirwa mu gukora ishoramari ryagize akamaro mu 2017, yasobanuye ibikorwa byatumye ihiga inganda zirenga 100 zari zapiganiye ibihembo.

Ubwo ibi bihembo ngarukamwaka byatangwaga ku nshuro ya gatanu ku wa 19 Mutarama 2018, Ikigo cy’Igihugu cy’Iterambere (RDB) cyahembye ibigo 10 maze AIF yegukana igihembo nyamukuru nk’umushoramari w’umwaka.

Uru ruganda ruherereye mu cyanya cyahariwe inganda mu Mujyi wa Kigali (Kigali Special Economic Zone) rwahawe n’igihembo cy’umusoreshwa mwiza w’umwaka wa 2017.

Mu kiganiro na IGIHE, Umuyobozi ushinzwe Ubucuruzi muri Africa Improved Foods, Darshana Joshi yasobanuye ibyatumye uruganda ruba indashyikirwa, imbaraga batewe n’igihembo n’ingamba zizatuma rurushaho gukora neza mu 2018.

Africa Improved Foods yabaye umushoramari w’umwaka wa 2017. Ni irihe banga ryatumye muba indashyikirwa?

Uretse akayabo k’imari yashowe ingana na miliyoni 60 z’amadolari (hafi miliyari 51Frw), twari dufite intego zisobanutse mu 2017 kandi twazigezeho. Byatwaye imyaka itatu mu gutegura no kubaka uru ruganda rwatangiye gukora mu Ugushyingo 2016.

Intego yacu yari ukuzamura ibyo urugnda rukora tugasohora ifu ibasha kurwanya imirire mibi muri Afurika y’Iburasirazuba, tukunganira abahinzi kandi tugatanga ifu ikungahaye ku ntungamubiri ku giciro gito. Kubera ko izo ntego twazigezeho, twarapiganwe maze twegukana igihembo cy’umushoramari w’umwaka.

RDB yarebaga ku kamaro k’ishoramari kugira ngo itange ibihembo. Ni akahe kamaro ishoramari ryanyu ryagize?

AIF ni uruganda rurangajwe imbere no kugira impinduka mu mibereho y’abantu. Ibyo dukora si ibigamije inyungu gusa; tugomba guhindura imibereho mu buryo butatu.

Uburyo bwa mbere ni uguteza imbere isoko ryo mu gihugu aho dukeneye toni zirenga 35,000 z’ibigori na soya ku mwaka. Twabonye toni 5,000 mu Rwanda mu 2017. Umwaka ushize wose twahuguraga abahinzi mu rwego rwo kubongerera ubushobozi kugira bongere ubwinshi n’ubwiza bw’umusaruro. Ibi bizatuma tubona umusaruro wikubye kabiri uzava mu Rwanda mu 2018. Intego yacu ni uko tuzaba tubona mu Rwanda 50% y’umusaruro w’ubuhinzi dukeneye mu myaka itanu iri imbere.

Uburwo bwa kabiri ni ugutanga akazi. AIF ifite abakozi 300 harimo 200 bahoraho. Aba biyongera ku bo twahaye akazi ko kutugemurira umusaruro, abacuruza ifu yacu n’abahinzi dukorana.

Uburyo bwa gatatu ni ukurwanya imirire mibi. Imwe mu ntego z’ibanze dufite ni ukugabanya ikigero cy’imirire mibi muri Afurika y’Iburasirazuba by’umwihariko mu Rwanda. Mu myaka itanu, u Rwanda rugamije kugabanyaho kimwe cya kabiri cy’imirire mibi kandi turi ku isonga mu bagomba kubigiramo uruhare binyuze muri Porogaramu ya Guverinoma yo guteza imbere imirire myiza hatangwa inyunganiramirire ku buntu ku bagore batwite, abonsa n’abana bafite amezi atandatu kugeza ku myaka ibiri babarizwa mu miryango ikennye iri mu cyiciro cya mbere cy’ubudehe.

Ikindi ni uko ifu twohereza mu kigo cyita ku mirire ku isi (World Food Programme/ WFP) ifatwa nk’ibicuruzwa byoherezwa mu mahanga bivuye mu Rwanda. Twohereza hafi toni 25,000 z’ifu buri mwaka mu nkambi z’impunzi muri Sudani y’Epfo, Burundi, Uganda na Kenya. Iyo fu iva mu Rwanda igaburira abantu hafi miliyoni n’ibihumbi 500 kandi ibi byagize akamaro ku bukungu bw’u Rwanda.

Iki gihembo mwahawe kivuze iki kuri AIF?

Birashimishije kuba muri iki kigo kigira uruhare mu bukungu bw’u Rwanda busanzwe burimo gutera imbere cyane. Igihembo cyose ni cyiza ariko iki cyo ni ishema rikomeye ku bakozi bose. Kimwe n’abandi bashoramari, natwe tugira ibiturushya ariko iyo tubonye igihembo nk’iki bitwereka ko ibyo dukora bihabwa agaciro, bitari nk’akazi gusa, ahubwo ko bizana impinduka mu mibereho y’abantu. Ikindi ni uko iki gihembo kidutera imbaraga zo kurushaho gukora ; turashaka ibihembo mu bindi byiciro umwaka utaha.

Umuyobozi wa PSF Benjamin Gasamagera (hagati) ashyikiriza igihembo Umuyobozi Mukuru wa AIF, Prosper Ndayiragije (ibumoso) n'Umuyobozi ushinzwe Ubucuruzi, Darshana

Ibi bihembo bigamije guteza imbere ipiganwa mu bashoramari. Ni iyihe migambi mufite izatuma mukora neza kurushaho mu 2018 no mu gihe kizaza ?

Uyu mwaka turashaka gukuba kabiri ibyo dukoresha bituruka mu gihugu. Ubu dukorana n’abahinzi 9,000 mu Rwanda; turashaka gukuba kabiri uyu mubare. Ubu twazanye ‘Nootri Family’ nk’igicuruzwa gishyashya; turashaka kuzashyira ku isoko n’ibindi bicuruzwa bibiri cyangwa bitatu muri uyu mwaka. Turubaka ubushobozi bw’abatugezaho umusaruro w’ubuhinzi ari na ko dutanga amahugurwa ku bakozi b’uruganda.

Turihariye mu byo dukora; ntidukorera kurushanwa, turashaka kongera impinduka tuzana. Nagira ngo nshimire buri wese wahawe igihembo na RDB. Bose bakoze neza mu byiciro byabo kandi niteguye kurushanwa na bo umwaka utaha kuko bituma duterana umwete wo gukora neza kurushaho natwe tugatera imbere.

U Rwanda ni igihugu cyoroshye guturamo, gifite isuku, kinatekanye ku buryo bitworohera kuhakorera nubwo tutagomba kugarukira hano, turacyakomeza kwagurira ibikorwa mu karere, tukaba twitegura gufungura uruganda muri Etiyopiya muri uyu mwaka.

AIF yibanda kuki mu byo ikora?

AIF ikorera WFP ibiribwa bifasha abari mu kaga; ni ifu y’igikoma yitwa “super cereal” yoherezwa mu nkambi z’impunzi muri Sudani, Burundi, Uganda na Kenya. Dukora n’ifu yitwa “Shisha Kibondo” muri Porogaramu ya Goverinoma yo kurwanya imirire mibi. Iyi fu ihabwa abagore batwite, abonsa n’abana bari hagati y’amezi atandatu n’imyaka ibiri bari mu cyiciro cya mbere cy’Ubudehe mu rwego rwo kurwanya imirire mibi mu minsi ya mbere 1,000 y’ubuzima bw’umwana.

Dukora n’ifu icuruzwa harimo Nootri Mama igenewe abagore batwite n’abonsa na Nootri Toto igenewe abana guhera ku mezi atandatu. Ifu yacu yunganira ibere, ntirisimbura. Igicuruzwa gishya twashyize ku isoko ni ifu twise ‘Nootri Family’ igenewe umuryango wose muri rusange harimo n’abagabo.

Ni izihe mbogamizi AIF ihura na zo? Ese ni gute muhangana na zo?

Ibyo dukoresha byinshi bikomoka ku buhinzi, nyamara nk’ahandi hose ku isi, imihindagurikire y’ibihe igenda iteza ibibazo ku buryo bigoye kumenya uko umusaruro w’ubuhinzi uzamera mu bihembwe biri imbere. Ni ikibazo gikomeye tutabasha gukumira.

Twita ku buziranenge ku rwego rwo hejuru ku buryo bifata igihe kugira ngo izindi nganda dukorana zigere kuri ubwo buziranenge. Mu 2017, twakoranye bya hafi n’abatugezaho ibyo dukoresha kugira ngo babashe kuduha ibyujuje ubuziranenge. Binyuze mu mahugurwa no kubateza imbere, ubu tumaze kubageza hafi y’urwego rw’ubuziranenge dukeneye ku buryo bizatworohera mu myaka izaza.

Uruganda AIF rwashinzwe ku bufatanye bwa Leta y’u Rwanda n’Urugaga Mpuzamahanga rw’ibigo by’imari birimo Ikigo cy’Abaholandi cyita ku Buzima (Royal DSM), Banki y’Iterambere y’Abaholandi (FMO), Ikigega Nterankunga cy’Abongereza (DFID) n’ishami rya Banki y’Isi ryita ku ishoramari, IFC.

Africa Improved Foods (AIF) iherutse kwegukana igihembo cy’indashyikirwa mu gukora ishoramari ryagize akamaro mu 2017
AIF ikora ifu icuruzwa harimo Nootri Mama igenewe abagore batwite n’abonsa na Nootri Toto igenewe abana guhera ku mezi atandatu
AIF ifite ingamba zizayifasha guhaza abakiliya bayo mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza