Banki ya Kigali igiye gushora miliyari 48 mu guteza imbere ishoramari

Yanditswe na Kanamugire Emmanuel
Kuya 25 Nyakanga 2016 saa 01:46
Yasuwe :
0 0

Banki y’ishoramari y’u Burayi (EIB) yemeye gutera inkunga gahunda nshya ya Banki ya Kigali yo gutanga inguzanyo zo gushyigikira ishoramari ry’abikorera mu Rwanda.

Muri iyi gahunda, EIB izatanga miliyoni 28 z’Amayero ni ukuvuga hafi miliyari 24 z’amafaranga y’u Rwanda, ziyongera ku zindi miliyari 24 z’amafaranga y’u Rwanda zizashorwa na Banki ya Kigali ubwayo.

Banki y’ishoramari y’u Burayi ni ikigo gitanga inguzanyo z’igihe kirekire gihuriweho n’ibihugu 28 bigize Umuryango w’Ubumwe bw’u Burayi kuva mu mwaka wa 1958. Mu myaka 10 ishize, iyi banki imaze gushora miliyari 21 ku mugabane wa Afurika.

Ubusanzwe itera inkunga imishinga y’iterambere mu karere ka Afurika yo hagati n’iy’Iburasirazuba, binyuze mu kongera inguzanyo zihabwa amabanki y’ubucuruzi kugirango nayo ashobore kuguriza abakiliya bayo. Kuri iyi nshuro izatanga miliyoni 230 z’amayero azafasha abikorera bo mu Rwanda, Burundi na RDC.

Umuyobozi mukuru wa Banki ya Kigali, Dr. Diane Karusisi, yavuze ko iyi nguzanyo izafasha u Rwanda muri gahunda rwihaye yo kubakira ubukungu kuri ba rwiyemezamirimo nk’uko inkuru ya The New Tmes ibivuga.

Yagize ati “Intego y’u Rwanda y’igihe giciriritse, ni ukubaka ubukungu burangajwe imbere n’abikorera, gushyigikira abahanga imirimo, byose biganisha ku guhindura imibereho y’abaturage. Ibi kuri twebwe ni ingirakamaro kuko bizashyigikira Banki ya Kigali mu kugeza imari ishoboka ku bashoramari bikorera.”

Umuyobozi wungirije wa EIB ushinzwe u Rwanda, Pim van Ballekom, avuga ko basanzwe bafasha ishoramari ry’abikorera muri Afurika kandi bishimiye gukorana na Banki ya Kigali kuko bizakomeza guteza imbere ubukungu bw’u Rwanda.

Yagize ati “Twishimiye gukomereza ku ntambwe tumaze gutera muri Afurika y’Iburasirazuba, binyuze muri iyi gahunda nshya izatanga amahirwe mu bukungu kandi igahanga imirimo mu Rwanda. Uruhare rwa Banki ya Kigali mu guhanga udushya no guharanira kugeza serivisi z’imari kuri bose, ubu bufatanye bushya, ni icyifuzo duhuriyeho cyo gutera inkunga urwego rw’abikorera rwo nkingi y’iterambere ry’ubukungu mu Rwanda.”

Ambasaderi w’Umuryango w’Ubumwe bw’u Burayi mu Rwanda, Michael Ryan, yavuze ko Umuryango ahagarariye ushishikajwe no gukorana n’u Rwanda muri gahunda zarwo z’iterambere, kandi ubufatanye hagati ya EIB na BK buzateza imbere ubukungu n’imibereho myiza by’abaturage.

Yagize ati “Mfite icyizere ko ubu bufatanye bushya hagati y’iyi banki y’Umuryango w’Ubumwe bw’u Burayi na Banki ya Kigali, buzabyara izindi nyungu mu bukungu n’imibereho myiza, nk’uko abikorera bo mu Rwanda na Afurika y’Iburasirazuba bakomeje kuzigeraho bahabwa inguzanyo.”

Muri iyi gahunda nshya, ba rwiyemezamirimo bikorera n’ibigo bazashobora guhabwa inguzanyo mu mafaranga y’u Rwanda bashore imari ndetse bagure n’ibikorwa byabo uko bashatse.

Mu myaka irenga itanu ishize, Banki y’ishoramari y’u Burayi yatanze miliyoni 22 z’amayero ifatanya n’amabanki atatu y’imbere mu gihugu arimo KCB mu gufasha ishoramari mu Rwanda.

Iri shoramari kandi ryahanze imirimo irenga ibihumbi bine mu bwubatsi, inganda, ubukerarugendo, ubuhinzi n’ubwikorezi.

Guhera mu 1977, EIB imaze gutanga Miliyoni zirenga 59 z’amayero mu Rwanda, zashowe mu bikorwaremezo birimo kongerera ubushobozi ikibuga cy’indege cya Kigali, amashanyarazi n’iterambere ry’ishoramari ry’abikorera.

Inyubako y'Icyicaro cya Banki ya Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244