Kwamamaza

Banki zirindwi zasinye amasezerano ya miliyoni 275 z’Amadolari yo gucukura Nyiramugengeri

Yanditswe kuya 23-11-2016 saa 08:27' na Philbert Hagengimana


Banki zirindwi zirimo iy’Iterambere mu Rwanda (BRD) zashyize umukono ku masezerano yo gutanga miliyoni 275 z’Amadolari ya Amerika, azakoreshwa mu kubaka uruganda ruzatunganya nyiramugengeri yo mu gishanga cy’Akanyaru mu Karere ka Gisagara, rukayibyaza megawati 80 z’amashanyarazi.

Aya masezerano yashyizweho umukono kuri uyu wa 22 Ugushyingo, imbere ya Minisitiri w’Ibikorwa remezo, James Musoni.

Minisitiri Musoni yatangaje ko izo banki zasinye amasezerano ya Miliyoni 275 z’amadolari ya Amerika, izindi miliyoni 75 zikazatangwa na Sosiyete y’Abanyaturikiya Hakan Madencilik Ve Elektrik Uretim San. Tic. A.S igomba kubaka urwo ruganda rufite agaciro ka Miliyoni 350 z’Amadolari.

Ati “Harimo banki imwe yo mu Rwanda, BRD, ariko izindi ni izo hanze, harimo iz’i Burayi, n’indi yo muri Afurika na PTA Bank yo muri aka Karere, zose zishyize hamwe zishobora kuzana miliyoni hafi 280, andi arengaho akaba yaratanzwe na ba nyir’umushinga.”

Yakomeje avuga ko yose hamwe yabonetse, ba nyiri umushinga bakaba basabye ko bahabwa ukwezi kumwe bakitegura gutangira kubaka, bityo izo megawati 80 zizaboneka nyuma y’amezi 33 uhereye muri Mutarama 2017 ubwo imirimo yo kubaka urwo ruganda izaba itangira.

Izo banki zafatanyije gukusanya amafaranga yo kubaka urwo ruganda ni Africa Finance Corporation, Banki ihuriweho n’ibihugu bitandukanye bya Afurika ikagira icyicaro i Lagos muri Nigeria, PTA Bank, Afreximbank ifite icyicaro mu Misiri, Exim Bank yo mu Buhinde, Ikigo cy’Imari cyo muri Finland (Finnfund) kizatanga ikoranabuhanga rizakoreshwa muri uwo mushinga na BRD yo mu Rwanda.

Umuyobozi Mukuru wa BRD, Alexis Kanyankole yatangarije IGIHE ko ari ishema kuri iyo banki kugira uruhare mu mushinga munini nk’uwa Nyiramugengeri ya Gisagara, kuko binatuma itinyura banki z’abanyamahanga gushora imari yazo mu mishinga ikomeye mu Rwanda.

Yagize ati “Kujya mu mushinga nk’uyu bituma dutinyura na banki zo hanze kuko ziba zitamenyereye gukorera ino, ariko iyo babonye hari iyo mu gihugu yiyemeje kujya mu mushinga, bahita babona ko ari umushinga wizewe kandi ushyigikiwe […] Ikindi ariko dukora ni uruhare rwacu nka Banki itsura Amajyambere, gushyira amafaranga mu mushinga w’amashanyarazi bifite akamaro cyane kuko byongera umuriro igihugu cyari gikeneye, bigatuma inganda n’abaturage babona umuriro uhagije, bigatuma igihugu kigenda gisatira intego cyihaye yo kongera umuriro w’amashanyarazi.”

Umuyobozi wungirije wa Sosiyete Hakan Madencilik Ve Elektrik Uretim San. Tic. A.S, Hakan Karasoy, yizeza ko n’ubwo nta burambe bafite mu kubaka inganda za nyiramugengeri, bizeye kuzakora neza imirimo basinyanyemo amasezerano na Leta y’u Rwanda.

Ati “Twahisemo gushora imari mu Rwanda kuko twari twizeye ko ari igihugu cyiza kibereye gushorwamo imari, RDB yaradufashije cyane mbere y’uko dutangira, kandi Guverinoma ndetse n’inzego z’ubuyobozi bw’ibanze zaduhaye ikaze, batubwira ko gushora imari muri Nyiramugengeri ari igitekerezo cyiza.”

U Rwanda rufite toni zisaga miliyoni 155 za Nyiramugengeri ziboneka kuri hegitari 50.000, kandi 77% byayo biboneka mu nkengero z’umugezi w’Akanyaru, Nyabarongo, no mu kibaya cya Rwabusoro, yose ikaba ishobora gutanga megawati 450 mu myaka 25.

Ikigo cy’Igihugu gishinzwe ingufu, REG, kivuga ko abafite amashanyarazi bikubye inshuro zisaga icumi mu myaka 20 ishize, ariko haracyari ibigomba gukorwa ngo amashanyarazi agere ku Baturarwanda 70% bavuye kuri 24% bahari ubu, nk’uko Leta y’u Rwanda yabyiyemeje bitarenze 2018. Hateganywa ko icyo gihe u Rwanda ruzaba rufite megawati 563 zivuye ku ziyingayinga 190 zihari uyu munsi.

Bashyira umukono ku masezerano yo gutera inkunga umushinga wo gucukura nyiramugengeri mu Karere ka Gisagara
Umuyobozi wungirije wa Sosiyete Hakan Madencilik Ve Elektrik Uretim San. Tic. A.S, Hakan Karasoy (hagati) aganira na bagenzi be

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved