BDFyazamuye umumotari Mfashijwenimana ava mu gukorera abandi

Yanditswe na Mugabo Jean d’Amour
Kuya 16 Nyakanga 2017 saa 04:07
Yasuwe :
0 0

Mfashijwenimana Jean Baptiste, amaze imyaka 12 akora akazi ko gutwara abagenzi kuri moto, afite umugore n’abana batatu akaba atuye mu Karere Gasabo, mu Murenge wa Bumbogo.

Hashije imyaka ibiri gusa Mfashijwenimana atangiye gukorana n’Ikigega cya Leta gitanga ingwate ku mishinga mito n’iciriritse (BDF) ariko atunze moto ebyiri zirimo iyo akoresha n’indi ikodeshwa, amaze kugura ikibanza cyo guturamo mu Mujyi wa Kigali kandi imibereho y’umuryango we yabaye myiza.

Aganira na IGIHE, Mfashijwenimana yagize ati “Namaze imyaka myinshi nibaza uko nzatunga moto yanjye, nkaruhuka kubazwa ubukode bwa moto (versement) buri munsi. Mu 2014 ni bwo numvise ko BDF yabimfashamo ubwo mpita nyigana bangira inama y’uko nzagera ku nzozi zanjye.”

Mfashijwenimana yahise ashaka abandi bamotari batatu bo muri Kicukiro aho yakoreraga, bakora itsinda ryahise rifunguza konti mu Kigo cy’imari, COPEDU, batangira kwizigamira amafaranga, bidatinze bahabwa inguzanyo y’amafaranga miliyoni imwe n’ibihumbi 200 bishingiwe na BDF kuko nta ngwate bari bafite. Ayo mafaranga barayagabanye barayikenuza. Itsinda ryaragutse mu mezi make, rikora ikibina cy’abantu 11 bacyita ‘Ubaka Motari.’

Mfashijwenimana ati ‘‘Twaje kumenya gahunda ya COPEDU yitwa ‘Igurire Iyawe’ maze buri munyamuryango akajya atanga ibihumbi 15 buri cyumweru harimo ibihumbi bitatu by’ubwizigame n’ibihumbi 12 twagendaga duha buri munyamuryango akabasha kwikenura. Ibyo twabikoze amezi atatu duhita dusaba inguzanyo, banki irayitwemerera ariko ikibazo gisigara ari ingwate. »

Ku bwizigame bungana na 10% gusa y’ingwate basabwaga, BDF yishingiye aba bamotari kuri 90% maze COPEDU ibaha inguzanyo y’amafaranga miliyoni eshanu n’ibihumbi 200 muri Werurwe 2015, baguramo moto eshatu naho undi munyamuryango afata amafaranga ibihumbi 500.

Mfashijwenimana avuga ko nyuma y’amezi ane gusa, COPEDU yabagurije izindi miliyoni eshanu n’ibihumbi 200 baguramo moto enye ndetse mu ntangiro za 2016, bongera guhabwa miliyoni imwe n’ibihumbi 300, undi munyamuryango agura moto, haba habonetse moto umunani mu kibina.

Yagize ati ‘‘Ubu imibereho yanjye yarahindutse, ndakora ntuje, ubundi nakoranaga igihunga ndwana no kubona 5000 Frw bya buri munsi bya nyiri moto, ariko ubu mfite moto yanjye nkoresha nkagira n’indi ikodeshwa, ubu nanjye nabaye umukoresha. Mfite abana babiri biga kandi mbasha kubarihira amashuri neza ndetse n’imibereho y’umuryango yabaye myiza, buri wese akabasha kubona icyo yifuza.’’

Yongeraho ko ubu yamaze kubona ibyangombwa byo kubaka inzu mu kibanza yaguze ibihumbi 700 Frw mu Gatenga mu Karere ka Kicukiro ndetse anateganya kuzagura imodoka yo gukoresha akazi ko gutwara abagenzi.

Ati “Umuntu wese, by’umwihariko urubyiruko, akwiye kugira umushinga w’icyo yifuza gukora, udafite ingwate akagana BDF ikamwishingira. Ndashimira cyane Guverinoma yashyizeho Ikigega cy’Ingwate, BDF, kigafasha abatagira ingwate. Sinari kuzibonera ingwate ngo mbashe kwitungira moto ariko ubu ngejeje kuri ebyiri.”

Ubu abanyamuryango bose b’ikibina ‘Ubaka Motari’ bamaze kwiteza imbere kuko bafite moto zabo, hari abafite amazu mu nkengero z’Umujyi wa Kigali, hari abafite ibibanza, amaduka, batunze imiryango yabo neza, abandi baguze amatungo n’ibindi bikorwa bitandukanye.

Umuyobozi w’ishami ry’amategeko no gukurikirana imishinga muri BDF, Umugwaneza Monique, yatangaje ko kuva mu 2011 iki kigega gitangiye, hamaze gutangwa ingwate ingana na miliyari zisaga 41.2 Frw ku mishinga igera ku 6000, mu gihe imishinga 11, 663 ifite agaciro ka miliyari 4.2 Frw yahawe inkunga.

Bitewe n’umushinga, BDF itanga ingwate iri hagati ya 30% na 75% naho imishinga y’ubuhinzi n’ubworozi igahabwa inkunga ya Leta ingana na 20%-25% y’inguzanyo yahawe.

Ingwate BDF itanga igarukira kuri miliyoni 500 Frw ku mishinga y’ubuhinzi n’ubworozi naho indi mishinga igahabwa ingwate itarengeje miliyoni 300 Frw.

Mfashijwenimana Jean Baptiste yafashijwe na BDF
Mfashijwenimana yafashijwe na BDF, abona moto ku nguzanyo, yamaze kuyishyura none amaze amezi abiri aguze iya kabiri ikodeshwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza