Bralirwa yungutse miliyari 2.6 Frw mu 2016

Yanditswe na Rabbi Malo Umucunguzi
Kuya 21 Mata 2017 saa 11:47
Yasuwe :
0 0

Uruganda rukora ibinyobwa bisembuye n’ibidasembuye(Bralirwa), rwatangaje ko inyungu yabonetse mu 2016, mbere y’uko havanwaho umusoro yari miliyari 2 na miliyoni 666 z’amafaranga y’u Rwanda.

Imibare Bralirwa yashyize ahagaragara kuri uyu wa Kane tariki 20 Mata, yerekana ko kugeza kuwa 31 Ukuboza 2016, nyuma yo kwishyura umusoro habonetse inyungu ya miliyari 1.398 Frw.

Uru ruganda rusobanura ko izamuka riringaniye ry’inyungu yarwo ryatewe n’uko ingano y’ibinyobwa rwacuruje yagabanutseho 1.4%, ahanini bishingiye ku biciro by’ibinyobwa bidasembuye byazamutse mu mwaka ushize.

Inyungu ntiyabaye nyinshi nko mu mwaka wabanje, kuko mu gihe nyuma yo gutanga umusoro mu 2016 habarwa miliyari 1.3 Frw, mu 2015 zari 7.1Frw.

Umuyobozi wa Bralirwa akaba n’Umuyobozi Mukuru Wungirije w’Inama y’Ubutegetsi, Victor Madiela, yavuze ko bagerageje gukora ku buryo bagira inyungu nyinshi nubwo ubucuruzi butari bworoshye.

Yagize ati “Twabashije kuzamura inyungu y’uruganda nubwo aho dukorera ubucuruzi hatari horoshye, aho ingano y’ibinyobwa bidasembuye twacuruzaga yagizweho ingaruka n’izamurwa ry’ibiciro.”

“Ikindi twakomeje gushora imari mu bucuruzi bwacu ku bw’ibihe biri imbere, uyu mwaka tukaba twarasoje gahunda y’ishoramari rikomeye mu kongera ubushobozi bwacu kugira ngo Bralirwa ikomeze kwagura ibikorwa, izane udushya ku isoko kandi irusheho kurengera ibidukikije.”

Muri Gicurasi 2012 nibwo Bralirwa yatangaje ishoramari rya miliyoni $41 mu bikorwa byayo, ryagombaga kugera ku rwengero rw’inzoga ku Gisenyi n’ahakorerwa ibinyobwa bidasembuye ku Kicukiro mu mujyi wa Kigali.

Muri Kanama uwo mwaka kandi yazamuye ibiciro by’ibinyobwa bya Fanta, aho nk’iya Cl 30 yaguraga 300 Frw yashyizwe kuri 350Frw. Nibwo bwa mbere byari bizamuwe mu myaka itanu, hagamijwe kuziba icyuho mu izamuka “ry’ikiguzi cy’ibikorwa mu gihe ifaranga ryakomezaga guta agaciro”, igabanuka ry’ingano y’ibinyobwa bicuruzwa ikaba “yari yitezwe”.

Umwaka wa 2016 kandi wasize Bralirwa izanye inzoga nshya ku isoko arizo Mützig Lite na HUZA n’ibinyobwa bidasembuye bikoze muri PET byanabashije koherezwa muri Repubuklika Iharanira Demokarasi ya Congo.

Byatumye amafaranga Bralirwa yinjije yiyongeraho 5.6% ugereranyije na 2015, kuko yavuye kuri miliyari 84.1 Frw akagera kuri miliyari 88.8 Frw.

Ubuyobozi bw’uru ruganda buvuga ko umwaka wa 2017 witezwemo inyungu nubwo ibibazo by’ubukungu byugarije Isi bizakomeza kugira ingaruka ku bihugu bya Afurika, ariko kuba ubukungu bw’u Rwanda bukomeje kwihagararaho hari icyizere bitanga.

Mu itangazo Bralirwa bwagize buti “Intego yacu mu mikorere ni uguhanga udushya, kuzana ibinyobwa bishya ku isoko no kugabanya umuzigo w’ideni ryacu nibyo bintu bizaza ku isonga y’ibikorwa mu 2017 hagamijwe gushyira ibintu ku murongo.”

Ikigo cyo mu Buholandi, Heineken N.V gifite 75% muri Bralirwa na ho 25% ikaba iri ku isoko ry’imari n’imigabane.

Biteganyijwe ko 73.5% by’inyungu yabonetse izahabwa abanyamigabane, aho umugabane umwe uzatangwaho ifaranga 1.00, nubwo mu 2015 yari 5.00Frw. Gusa bizabanza gufatirwa umwanzuro mu nama y’Inteko rusange iteganyijwe kuwa 24 Gicurasi 2017.

Uruganda rwa Bralirwa rwenga inzoga ku Gisenyi
Umuyobozi wa Bralirwa akaba n’Umuyobozi Mukuru Wungirije w’Inama y’Ubutegetsi, Victor Madiela

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza