CBA igiye kwegukana Crane Bank Rwanda

Yanditswe na Mukaneza M.Ange
Kuya 10 Gicurasi 2017 saa 09:34
Yasuwe :
0 0

Nyuma y’igihe Crane Bank Uganda igurishijwe, mu minsi mike ishami ryayo riri mu Rwanda rishobora kwegukanwa na Banki Nyafurika y’Ubucuruzi (CBA), kuko ibiganiro biri hafi kugera ku musozo.

Crane Bank Uganda yaguzwe na DFCU Bank, nayo ikorera muri iki gihugu, ni nyuma y’uko iyi banki igize igihombo gikabije ndetse imicungire yayo ikegurirwa Banki Nkuru y’Igihugu.

Ibibazo by’imari Crane Bank Uganda yahuye nabyo ariko ntibyigeze bigira ingaruka ku mashami yayo mu Rwanda, ahanini bitewe n’ibisabwa kugira ngo abanyamahanga bafungure banki mu Rwanda.

Kugira ngo Ikigo cy’imari gitangire gukorera mu Rwanda gisabwa kuba gifite imari shingiro itari munsi ya miliyari 1.5 z’amanyarwanda, mu gihe banki yuzuye yo isabwa nibura miliyari eshanu z’amanyarwanda.

Amakuru agera kuri The New Times avuga ko ibiganiro ku kugura Crane Bank Rwanda yatangiye gukorera mu Rwanda mu 2014 byatangiye mu minsi ishize, ndetse ko CBA ishobora kuyegukana bidatinze.

Guverineri wa Banki Nkuru y’Igihugu, BNR, John Rwangombwa, yavuze ko bategereje kumenyeshwa n’ugurisha aho bigeze, kuko bo bativanga mu biganiro byo kugura banki no kuyigurisha igihe itagaragaje ko ifite igihombo gikabije.

Muri Mutarama 2017, nibwo CBA y’abanya-Kenya yatangiye gukorera mu Rwanda nk’Ikigo cy’imari iciriritse, ku bufatanye na MTN Rwanda yahise itangiza serivisi yo kubitsa no kuguriza hakoreshejwe telefoni igendanwa izwi nka MoKash.

Kwegukana Crane Bank Rwanda, bizatuma CBA ihita iva mu cyiciro cy’ibigo by’imari, itangire gutanga serivisi zose za banki.

Mu Rwanda habarizwa Banki 17, zifite amashami 194 n’udushami (sub-branches) 174. Kugeza mu Ukuboza 2016, umutungo wazo zose wabarirwaga muri miliyari 2 378 z’amanyarwanda, uvuye kuri miliyari 2 133 z’amanyarwanda mu 2015.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244