‘Ebano’, igisubizo kuri ba rwiyemezamirimo bagorwaga no kubona igishoro

Yanditswe na Mukaneza M.Ange
Kuya 10 Nyakanga 2017 saa 11:09
Yasuwe :
1 0

Ni kenshi humvikana amajwi ya ba rwiyemezamirimo, abagitangira cyangwa abamaze igihe bikorera, binubira kuba bagorwa no kubona amafaranga aba akenewe ngo barusheho guteza imbere ibyo bakora.

Uretse kuba kubona aya mafaranga bigorana, niyo abonetse usanga azana n’uburyo bwo kuyishyura bugoye ndetse n’inyungu iri hejuru abatari bake bagatinda kuyafata birinda ingaruka zirimo no kuba bahomba.

Ibi byatumye hatekerezwa ku buryo bwo gukemura iki kibazo kitari mu Rwanda gusa ahubwo na Afurika yose muri rusange, hatangizwa urubuga rwitwa Ebano rufite intego yo guhuza abakeneye amafaranga, n’abashoramari barimo abo mu bihugu biri ku mugabane w’u Burayi, Amerika na Aziya.

Ebano yatangijwe muri Nyakanga 2016 na François Jay na Bruno Agier, itangira gukora neza muri Mutarama 2017.

Mu kiganiro IGIHE yagiranye na Jean Jacques Mutabaruka, umwe mu bagize uruhare mu gutuma Ebano itangira gukorera mu Rwanda, yavuze ko usanga hari abantu benshi by’umwihariko ku mugabane w’u Burayi bafite amafaranga , ariko bagorwa no kumenya ahari amahirwe y’ishoramari muri Afurika, mu gihe kuri uyu mugabane haba hari benshi bayakeneye.

Ati “Kimwe mu bibazo bikomereye ubukungu bwacu ni icyo kubona amafaranga akenewe ngo ba rwiyemezamirimo babashe gukora ibyo bifuza gukora. Ariko noneho hakaza ikibazo cyo kuvuga ngo ayo mafaranga ari buze mu buryo bwo gufata imigabane cyangwa inguzanyo arava he, ndetse nanaboneka aze ahendutse.”

Yakomeje asobanura ko Ebano yibanda ku guhuza ba rwiyemezamirimo n’abashoramari biteguye kubaha amafaranga, ariko bakibanda mu gufatamo imigabane kuko aribyo bihendutse ndetse binoroshye kugenzura.

Nk’uko Mutabaruka akomeza abisobanura, ngo impamvu bibanda ku migabane ni uko ariyo yoroshye gucunga, ndetse umushoramari akaba afite inshingano yo gufatanya na rwiyemezamirimo mu bikorwa byose bigamije gutuma ubucuruzi bwabo butera imbere.

Gukoresha urubuga Ebano nta kiguzi bisaba

Mutabaruka ubusanzwe uyobora Sosiyete yitwa Convergencium itanga serivisi z’ubujyanama mu bijyanye n’ubukungu n’ikoranabuhanga, yavuze ko gutangira gukorana na Ebano nta kiguzi bisaba, ndetse imishinga yose yaba iyatangiye cyangwa itarangira ikaba idahejwe.

Ati “Kubera ko intego nyamukuru ya Ebano ari ugushora imari mu migabane, abashoramari usanga akenshi baba bashaka ibigo by’ubucuruzi byatangiye gukora. Bitavuze ariko ko ibitaratangira nabyo bidashobora kwiyandisha.”

Kwiyandikisha unyura kuri ebanofinance.net, ukuzuza ibisabwa byose ndetse ugashyiraho inyandiko zikubiyemo amakuru yatuma umushoramari ashishikarira kuza gushora imari mu bucuruzi bwawe.

Amafaranga make ashobora gushorwa mu kigo cy’ubucuruzi cyiyandikishije kuri Ebano ni 5 000 by’amadolari, ni ukuvuga guhera kuri miliyoni enye z’amanyarwanda kuzamura.

Jean Jacques Mutabaruka, umwe mu bagize uruhare mu gutuma Ebano itangira gukorera mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza