Ikigo Africeramics Ltd kigiye gutangiza uruganda rukora ibikoresho birimo amakaro i Nyanza

Yanditswe na Habimana James
Kuya 18 Gicurasi 2019 saa 12:16
Yasuwe :
0 0

Ikigo Africeramics Ltd n’Akarere ka Nyanza byasinyanye amasezerano yo gutangiza uruganda rukora bimwe mu bikoresho birimo amakaro, amasahani, ibikombe n’ibindi.

Aya masezerano yashyiriweho umukono ku Cyicaro cy’Ikigo cy’Igihugu cy’Iterambere (RDB) ku wa 17 Gicurasi 2019.

Akarere ka Nyanza kazaba gafitemo imigabane mike nk’ingurane y’ubutaka katanze ahubatswe urwo ruganda rwa Africeramics Ltd.

Umuyobozi w’Akarere, Ntazinda Erasme yabwiye IGIHE ko uru ruganda ruzatangira mu myaka ibiri.

Yagize ati “Nk’Akarere twishimiye kugira iki gikorwa cy’ishoramari kandi dufite byinshi dutegereje muri uyu mushinga. Ndashima Africeramics Ltd mu gushora imari mu karere kacu kuko bizateza imbere ubukungu kandi twiteguye gufasha uyu mushinga.”

Mu cyiciro cya mbere cy’urwo ruganda, ruzatangira rukora amakaro ibihumbi icyenda buri munsi ariko nyuma akazikuba kabiri mu guhazai isoko ry’imbere mu gihugu no mu karere.

Ibindi byiciro bizibanda mu gukora bimwe mu bikoresho birimo ibikombe bigezweh0 n’ibindi.

Umuyobozi w’Ikigo Milbridge Holdings ari nacyo gifite Africeramics Ltd, Francesco De Martino, yashimye uko boroherejwe gutangiza ishoramari ryabo.

Yagize ati “Ndifuza gushimira RDB, Minisiteri y’Ubucuruzi n’Inganda n’Akarere ka Nyanza ku nkunga baduhaye kugira ngo tube tugeze kuri iki gikorwa gikomeye. Twishimiye uburyo byihutishijwe ngo bikorwe vuba n’uburyo twafatanyije n’inzego zose mu Rwanda. Twahisemo Akarere ka Nyanza mu gushyirayo uru ruganda kuko ni ahantu heza ho kuvana ibikoresho byo kuzifashisha.”

Umuyobozi Mukuru wungirije wa RDB, Hategeka Emmanuel, yavuze ko iri shoramari rijyanye na gahunda y’u Rwanda yo kugabanya ibyo igihugu gitumiza mu mahanga.

Yagize ati “Iri shoramari rijyanye n’isoko ry’imbere mu gihugu mu kugabanya ibyo u Rwanda rukoresha mu kugura ibivuye hanze cyane cyane ibikoresho byo kubakisha, ariko hongerwa ibijyanwa mu mahanga no guhanga imirimo. Kuba uru ruganda rujyanwe mu Karere ka Nyanza bijyanye no gushyira iterambere mu bice by’icyaro hongerwa ubukungu bwaho.”

Yashimiye kandi kuba uru ruganda rugiye gukorera mu Rwanda.

Uruganda ruzubakwa na Africeramics Ltd rwitezweho gutangirana n’abakozi 100 bahoraho bo mu Karere ka Nyanza n’abandi barenga 300 badahoraho.

Ikigo Africeramics Ltd kigiye gutangiza uruganda rukora ibikoresho birimo amakaro mu Karere ka Nyanza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza