Imvano y’idindira ry’umushinga ’Amarembo’ uzakura amatongo mu Mujyi wa Kigali rwagati

Yanditswe na Ishimwe Israel
Kuya 25 Mata 2019 saa 03:07
Yasuwe :
0 0

‘Amarembo’ ni umwe mu mishinga y’ubwubatsi itegerezanyijwe amatsiko muri Kigali rwagati, uzaba ugizwe n’inyubako zikomeye zizasanga urusange rw’izindi zitatse ubwiza bw’Umujyi wa Kigali.

Uzubakwa mu kibanza kiri ahahoze Akagera Motors, Ets. Verma, Mironko na Mukangira, hagati ya Kigali City Mall [yahoze yitwa Union Trade Center] na Kigali City Tower.

Uzaba igizwe n’inyubako zizashyirwa ku buso bwa metero kare ibihumbi 120, byateganywaga ko zizaba zifite ahantu hagenewe ubucuruzi, ibiro, imyidagaduro, parikingi yo mu nzu hasi no hejuru, hoteli, ubwogero n’ibindi.

Uyu mushinga watangiye mu 2004 uhuriweho n’abantu benshi ariko biza guhinduka nyuma y’imyaka itatu, bitewe nuko bamwe bashatse kubaka ku giti cyabo, bikoma mu nkokora iyubakwa ry’umushinga uhuriweho wagombaga gutwara miliyoni $120.

Ibyo byatumye ugabanywamo imishinga itatu isa neza n’uwari uhuriweho ariko ikubakwa bijyanye n’igishushanyo mbonera cy’Umujyi wa Kigali. Irimo igice kizakomeza kwitwa Amarembo City Center kizubakwa aho Akagera Motors yakoreraga kumanuka ahahoze hitwa kwa Venant n’agace kareba ahahoze sitasiyo.

Uwa kabiri ni uwa Mironko mu gice kirebana no kwa Rubangura, na Costa uzubakwa mu gice kireba kuri rond-point n’ubwiherero rusange. Byateganywaga ko umwaka wa 2017 wari gusiga imishinga y’iyo miturirwa izaba ifite amagorofa 14, 11 na 10, yose itangiye.

Nyamara kugeza muri Mata 2019, iyo utembereye ahazazamurwa izo nyubako uhereye imbere yo kwa Rubangura ukazamuka ukagera imbere ya Centenary House, icyo gice cyose usanga hakiri imirimo yo gusiza, ahandi ni amatongo y’inzu zasenywe.

Umuyobozi w’Umujyi wa Kigali, Rwakazina Marie Chantal, yabwiye IGIHE ko umushinga watindijwe n’ubwumvikane buke hagati y’abagomba kuhubaka, batahise bumva neza ko bashobora kuwukorera hamwe.

Ati “Biracyari mu bintu Abanyarwanda n’Abanyakigali tugomba guhinduramo imyitwarire n’imitekerereze. Umuntu aracyashaka kubaka akantu ke ku butaka bwe kandi ya gahunda yo kubukoresha neza iradusaba kubihindura. Ikintu cyawe ntikibe icyawe kuko gishinzwe hasi, gishobora kuba icyawe kubera ko ari apartment ku rwego rwa kabiri cyangwa rwa gatatu. Iyo mitekerereze iracyatera ikibazo.’’

Yavuze ko icyatwaye umwanya ari ukubumvisha ko bafite amafaranga n’ubutaka bw’agaciro, bakwiye gutanga igishushanyo mbonera kimwe ndetse bakubakira hamwe, buri mushoramari akagira imigabane muri iyo nzu.

Yavuze ko mu cyumweru gishize habaye ibiganiro kuri uwo mushinga ndetse byitezweho gutanga umusaruro.

Ati “Tubifatanyije na RDB twabonye baduha icyizere, ibiganiro twakoranye na bo byaduhaye icyizere, wenda izo mpungenge bagira ngo uyu muntu ashaka amafaranga akatubwira ko yamuhenze cyangwa igishushanyo cyamuhenze, bakagira uko babyumvikana.’’

“Uko rero nababonye ni abantu batatu bafatanyije umushinga w’Amarembo, bose wabonye bishimiye ko atari Umujyi wa Kigali wabahaga ubutaka n’ibyangombwa byo kubaka gusa, ahubwo waje no mu kumvikana kwabo.”

Umujyi wa Kigali uvuga ko abantu bakwiye kumva ko gukorera hamwe byoroshya ibikorwa kuko bituma habaho kunganirana mu bushobozi no guhendukirwa kuri buri muntu.

Inkuru wasoma: Bite by’umushinga w’inyubako iteye ubwuzu ‘Amarembo City Center’ ?

Iki gice kimaze igihe kitubakwa kiri mu mujyi wa Kigali rwagati
Hamaze gukura ibiti kubera ko imishinga ihagenewe yadindiye
Umushinga Amarembo witezweho guhindura isura y'Umujyi wa Kigali
Umuyobozi w'Umujyi wa Kigali Rwakazina Marie Chantal mu kiganiro yagiranye na IGIHE mu cyumweru gishize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza