Imwe mu mpamvu yatumye u Rwanda ruba icyitegererezo mu ishoramari muri Afurika

Yanditswe na Philbert Girinema
Kuya 31 Nyakanga 2016 saa 08:04
Yasuwe : XX
0

Iyo uvuze umugabane wa Afurika mu ruhando rw’abashoramari mpuzamahanga wumvikana nk’ahantu hari ibibazo byinshi bikeneye inkunga kuruta ibindi.Iyi myumvire ituma n’amahirwe mu bucuruzi ari kuri uyu mugabane ataboneka, nubwo hari ibihugu birimo u Rwanda, Afurika y’Epfo na Kenya bidahwema gukora iyo bwabaga kugirango aterwe imboni n’abo banyemari.

Dufashe urugero ku Rwanda, rwagiye rukora amavugurura menshi agamije korohereza abashoramari no gukuraho izo mbogamizi ari nabyo bituma ruba icyitegerezo.

Umuyobozi w’Umuryango w’Ubucuruzi muri Afurika y’Iburasirazuba n’Amajyepfo (COMESA), Sindiso Ngwenya avuga ko ibihugu nk’u Rwanda, Afurika y’Epfo na Kenya ari byo bituma Afurika ikomeza kugaragara nk’ahantu h’amahirwe menshi mu ishoramari.

Ati “Ibihugu byose bikomeje gukurikira uyu murongo, umugabane waba uri kugana mu nzira zo kuba igicumbi cy’ishoramari n’ikoranabuhanga.”

Uku koroshya no guteza imbere ishoramari nibyo byatumye u Rwanda rutoranywa kuzakira Inama y’isi yiga ku ishoramari rya Afurika, izaba ibereye bwa mbere muri Afurika (TGAIS-COMESA Rwanda).

Umwe mu bagize komite itegura iyi nama, Paul Sinclair yavuze ko u Rwanda rukomeje guhindura imyumvire binyuze mu bikorwa bigamije guteza imbere inganda, ubuhinzi, ndetse n’ibikorwaremezo.

Yakomeje avuga ko gushyira imbaraga mu guteza imbere ikoranabuhanga byatumye u Rwanda rubasha kugera ku ntego zarwo zatumye rutangira gushakishwa n’abashoramari.

Sinclair kandi yagaragaje ko muri Afurika hari amahirwe menshi y’ishoramari ahanini biturutse ku mubare munini w’abaturage bakomeje kwitabira gukoresha ikoranabuhanga ririmo telefoni zigendanwa na Internet.

Umuyobozi w’Ikigo cy’Igihugu cy’Iterambere, RDB, Francis Gatare, yavuze ko Afurika igenda igira uruhare mu guhindura imyumvire y’abumva ko icyeneye inkunga aho ibihugu nk’u Rwanda bikomeje kuba igicumbi cy’iterambere ry’ishoramari no gushyiraho gahunda zituma rurushaho gukurura abashoramari.

Ati “Ibindi bihugu bikomeje gukora ibishoboka ngo bishyireho amategeko yorohereza ishoramari no kugabanya imisoro mu rwego rwo gukurura abashoramari b’abanyamahanga. Iyi nama y’isi yiga ku ishoramari rya Afurika izaba ari urugero rwiza rw’ibyo Afurika ishoboye. Azaba ari amahirwe adasanzwe yo kubaka ubufatanye no guteza imbere ishoramari nk’imwe mu nkingi zo kugera ku iterambere twiyemeje.”

Inama y’Isi yiga ku Ishoramari rya Afurika izaba kuva ku itariki ya 5 kugera kuya 6 Nzeli 2016, ikazahuza abakuru b’ibihugu, abayobozi ba za guverinoma , abashoramari bo mu karere n’abandi mpuzamahanga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza