Kwamamaza

Kigali: BRD n’Abanya-Maroc bagiye kubaka inzu 5000 zo guturamo

Yanditswe kuya 20-10-2016 saa 15:29' na Cyprien Niyomwungeri


Guverinoma y’u Rwanda ibinyujije muri Banki itsura amajyambere y’u Rwanda, BRD, yaraye isinyanye amasezerano na Sosiyete yo muri Maroc, Palmeraie Development Group agamije kubaka inzu 5000 ziciriritse zo guturamo.

Aya masezerano yasinywe ku munsi w’ejo ku wa Gatatu tariki 19 Ukwakira 2016 mu ruzinduko rw’iminsi itatu umwami wa Maroc Mohammed VI akomeje kugirira mu Rwanda. Ku ruhande rw’u Rwanda yashyizweho umukono n’Umuyobozi mukuru wa BRD, Alex Kanyankole, naho ku rwa Maroc asinywa na Hicham Berrada Sounni wa Palmeraie Development Group na Othman Benjelloun uyobora Bank of Africa.

Izi nzu zizubakwa mu kibanza gifite ubuso bungana na hegitari 20 giherereye mu murenge wa Ndera, mu Karere ka Gasabo. Ku ikubitiro hazubakwa icyiciro cya mbere kigizwe n’inzu 2000.

Umuyobozi mukuru wa BRD, Alex Kanyankole, yabwiye IGIHE ko uriya mushinga wose uzatwara miliyoni 68 z’amadolari ya Amerika, arimo miliyoni 40 z’amadolari azatangwa na Bank of Africa nk’inguzanyo.

Nyuma yo gusinya amasezerano hagiye gutangira kunonosorwa gahunda y’ishyirwa mu bikorwa ry’umushinga kugira ngo uhite utangira. Iri nonosora rizarangirana na Gashyantare 2017 ku buryo mu gihembwe cya kabiri cy’umwaka utaha ibikorwa nyir’izina byo kubaka izo nzu bizatangira.

Kanyankole asanga bizafasha Abanyarwanda n’abaturarwanda kubona inzu zihendutse zo guturamo.

Yagize ati “Ni ibintu bizafasha mu gihugu cyacu kongera umubare w’inzu zihendutse kuko ubona ko izo muri urwo rwego zihendutse zitaraboneka, turumva uyu mushinga uziye igihe kugira ngo dusubize icyo kibazo.”

Umuyobozi Mukuru wa Palmeraie Development Group, Hicham Berrada Sounni, yatangaje ko aya masezerano yo kubaka amacumbi ari urugero rwiza rw’umubano ibihugu byombi bifitanye.

Ati “Uyu mushinga w’ubwubatsi ni umwe muri gahunda z’iterambere ikigo cyiyemeje gukora muri Afurika, cyifashishije ubunararibonye gifite mu kubaka inzu zo guturamo. Kirashaka kuba intangarugero mu bufatanye bw’ibihugu byombi.”

Kanyankole avuga ko nubwo hataragenwa ibiciro by’izo nzu, ngo bishobora kuzaba biri munsi cyane y’ibiciro byari bimenyerewe.

Ati “Iyo turebye imibare y’ibanze turi gukora y’ukuntu ingengo y’imari izagenda kuri izo nzu, turi kubikora ku buryo izo nzu zizaba zihendutse ku buryo ayo tubona ku isoko ubu ngubu wafata nka kimwe cya kabiri cyayo.”

Muri izo nzu harimo izizaba zifite ibyumba bibiri, bitatu na bine. Amacumbi nk’aya asanzwe yubakwa n’ikigo cy’igihugu cy’ubwiteganyirize, RSSB, ibiciro byayo bihera ku mafaranga miliyoni 25 kugeza kuri Miliyoni 32 z’amafaranga y’u Rwanda bitewe n’ibyumba inzu umuntu ashaka ifite.

Icyakora hari n’iza miliyoni hagati ya 50 na 70 z’amafaranga y’u Rwanda. Ibi bisobanuye ko izo nzu zigiye kubakwa na BRD na Palmeraie Development Group zazaba zihagaze kimwe cya kabiri cy’izubakwa na RSSB.

BRD na Palmeraie Development Group bashyize umukono ku masezerano yo kubaka inzu 5,000 i Ndera

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved