2016: Isoko ry’impapuro z’agaciro-faranga ryiyongereyeho miliyoni 43.8

Yanditswe na Kanamugire Emmanuel
Kuya 4 Kanama 2016 saa 11:04
Yasuwe : XX
0

Isoko ry’Imari n’Imigabane (Rwanda Stock Exchange) ryagaragaje ko amafaranga yinjiye binyuze mu mpapuro z’agaciro faranga(Bonds) yiyongereye mu mezi atandatu ya mbere y’umwaka wa 2016.Impapuro z’agaciro faranga zinjije miliyoni 514.5 z’amafaranga y’u Rwanda avuye kuri 470.7 umwaka ushize.

Izamuka ry’umusaruro w’impapuro z’agaciro faranga ryatewe n’imbaraga guverinoma yashyize mu gukangurira Abanyarwanda kuzishoramo imari mu gihe cy’umwaka umwe n’igice gishize.

Izo mbaraga zirimo gahunda yo gushyira ku isoko impapuro z’agaciro faranga buri gihembwe, zatumye abashoramari bato barimo koperative zo kubitsa no kugurizanya(SACCOs), batera imbere bava ku gipimo cya 1% mu 2014 bagera kuri 14.6% muri Gicurasi uyu mwaka, mu gihe ibigo by’ abashoramari n’amabanki byo byagegeze kuri 50.39%,ubwitabire bugera ku gipimo cya 35%.Ibigo by’abashoramari byari ku gipimo kiri munsi ya 10% mu 2014.

Amafaranga yabonetse mu mpapuro z’agaciro faranga yakoreshejwe mu gutera inkunga imishinga y’ibikoremezo no gufasaha mu guteza imbere Isoko ry’Imari n’Imigabane imbere mu gihugu.

Agaruka ku kuba ibijyanye n’imigabane bitaragenze neza, Umuhuzabikorwa w’Isoko ry’Imari n’Imigabane, Celestin Rwabukumba, yavuze ko muri rusange amasoko y’imari n’imigabane yahungabanyijwe n’ibibazo by’ubukungu bw’Isi umwaka ushize, kugeza ubu ngo ntarasubira ku murongo.

Yagize ati “Twabonye ihungabana ry’amasoko bitewe n’igabanuka ry’ibiciro, abashoramari ku masoko barimo abo mu Rwanda ntibaguze imigabane myinshi bigira ingaruka ku nyungu yabonetse.”

Yongeyeho ko bamwe mu bashoramari bato batihangana, aho usanga badashaka kugura imigabane mu gihe ibiciro biri hasi.

Gusa Rwabukumba yongeraho ko abashoramari baturuka hanze y’igihugu ari bake bitewe no kuba isoko ry’u Rwanda ari rito, ibyo bikagira ingaruka ku musaruro w’isoko ry’imari n’imigabane.

Ati“Turateganya ko ibindi bicuruzwa bicye byagera ku isoko.Ibyo bishobora gutuma habaho kwiyongera kw’imirimo no kudahindagurika kw’ibiciro. Muri rusange turateganya imikorere myiza uyu mwaka hashingiwe ku mibare ihari.”

Kuva muri Kamena kugera Ukuboza 2015, umubare w’abashoramari bagaragaraga ko bahari ku isoko ry’imari n’imigabane mu Rwanda bagera ku 13 861 barimo 79% baturuka mu Rwanda, 17.9% baturuka mu Muryango wa Afurika y’i Burasirazuba na 2.9% baturuka hanze y’akarere.

Umuhuzabikorwa w’Isoko ry’Imari n’Imigabane, Celestin Rwabukumba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza