Itsinda ry’Abahinde ryasuye u Rwanda muri gahunda yo kwagura ubufatanye ibihugu byombi byagiranye

Yanditswe na IGIHE
Kuya 26 Kanama 2017 saa 06:00
Yasuwe :
0 0

Itsinda rya ba rwiyemezamirimo b’Abahinde bagera kuri 25 riri mu Rwanda muri gahunda yo kunoza ubufatanye ibihugu byombi byagiranye mu ntangiriro z’uyu mwaka.

Muri Gashyantare uyu mwaka ni bwo Visi Perezida w’u Buhinde, Hamid Ansari yagiriye uruzinduko mu Rwanda agirana ibiganiro na Perezida Kagame, ku ngingo zitandukanye zirimo ubucuruzi no guteza imbere urwego rw’ubuvuzi mu gihugu.

Ni na bwo hatangijwe porogaramu y’ubufatanye hagati y’ishami rishinzwe siyansi n’ikotanabuhanga mu Buhinde n’Ikigo cy’u Rwanda gishinzwe guteza imbere ubushakashatsi mu by’inganda (NIRDA), bugamije gukemura ibibazo by’ubukungu bw’u Rwanda binyuze mu guhuza inganda zo mu Rwanda n’inzobere z’Abahinde mu ikoranabuhanga rigezweho ryifashishwa mu guhanga udushya (India-Rwanda Innovation Growth Programme:IRIGP).

Kuri ubu Abahinde 25 baturutse mu bigo bitandukanye by’ubucuruzi bamaze kugera mu Rwanda aho bazagirana ibiganiro no guhererekanya ubumenyi mu ikoranabuhanga na ba rwiyemezamirimo n’ibigo by’imbere mu gihugu.

Ba rwiyemezamirimo bo mu Buhinde bavuga ko bafite ubushake bwo kugira uruhare batanga mu mizamukire y’ubukungu bw’u Rwanda, bifashishije udushya bahanze tukabyara umusaruro mu gihugu cyabo nk’uko byatangajwe na Munish Gupta,Umujyanama wa Porogaramu ya IRIGP.

Yagize ati “Ikintu cy’ingenzi kurusha ibindi ni uko leta y’u Buhinde n’iy’u Rwanda zishaka gufatanya mu guhanga imirimo, gutangiza ibigo mu Rwanda no kuzamura ubukungu bw’igihugu.”

Biteganyijwe ko aba Bahinde bazitabira imurikagurisha mpuzamahanga riri kubera i Kigali kuva ku itariki 22 Kanama kugeza ku ya 6 Nzeri 2017.

Muri ubu bufatanye biteganyijwe ko bamwe muri ba rwiyemezamirimo b’Abanyarwanda bazagirira ingendoshuri mu Buhinde hagamijwe gukuza umuco wo guhanga udushya no kuzamura ubumenyi mu gukoresha ikoranabuhanga rigezweho.

Umuyobozi w’Ikigo cy’Igihugu gishinzwe iterambere mu Rwanda, Clare Akamanzi, yavuze ko u Buhinde bufite ubunararibonye mu nzego zifatiye runini ubuzima bw’abaturage zirimo inganda zitunganya umusaruro ukomoka ku buhinzi, izikora imiti, imashini z’ubwoko butandukanye, porogaramu za mudasobwa n’izindi igihugu gikeneye gushyiramo imbaraga.

Iri tsinda ryasuye u Rwanda bigizwemo uruhare n’inzego zitandukanye zirimo RDB, Urugaga rw’abikorera(PSF), NIRDA , Ambasade y’u Buhinde mu Rwanda na Minisiteri y’Ubucuruzi, Inganda n’Ibikorwa by’Umuryango wa Afurika y’Iburasirazuba.

Kuva rwasohoka muri Jenoside yakorewe Abatutsi, u Rwanda ni igihugu cyakomeje kuba intangarugero mu kwihuta mu iterambere ry’ubukungu bituma abashoramari mpuzamahanga barushoramo imari uko bukeye n’uko bwije.

By’umwihariko hagati ya 2011-2016 Abahinde bashoye imari mu mishinga 66 ifite agaciro ka miliyoni $317, harimo ikomeye nka Airtel, Zinc Hotel na Kaminuza ya Mahatma Gandhi. Bafite kandi ishoramari mu ruganda rw’icyayi rwa Gisovu, Imana Steel, Sahasra Electronic Pvt Ltd n’ahandi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza